A V B
ORANJESTAD-Den su afan di mehora futbol Arubano, Arubaanse Voetbalbond a continua e siman aki cu e preparativonan di e plan strategico. Manera cu a wordo informa dos siman pasa, cu tres representante di FIFA tawata di bishita na Aruba, pa duna un workshop na e miembronan ehecutivo di AVB como tambe algun di su stakeholders. Esaki riba iniciativa di AVB mes. E workshop aki a wordo duna entre otro door di Aruba su propio yui di tera, cu ta señor Gregory Engebrecht, kende ta ocupa e puesto di FIFA Development Manager – Americas, señora Angenie Kanhai, cu ta ocupa e puesto di FIFA Development Officer – North West Caribbean y señor Gerard Nijkamp, cu ta un FIFA technical consultant y Johan van Geijn, Coordinator International CSR Projects | WorldCoaches. Dicho workshop a yuda enormemente, ya cu tur e miembronan ehecutivo di AVB tin un idea mas claro di ‘unda nan ta para’ na e momento aki como tambe unda cu nan ta desea di ta aki un par di aña. Riba e ultimo dia di dicho workshop, e personal di FIFA y KNVB presente, den consulta cu President di AVB Ing. Richard Dijkhoff y Secretario Generaal, señor Randolph Lacle, a apunta miembro ehecutivo di AVB, señor Lysander Besselink como Project Manager, pa e projecto aki cu ta e plan strategico. E tarea dificil di e proyect manager lo ensera tanto e supervision como tambe preparacion di e plan strategico, cual tin tareanan individual cu ta mara na fechanan cu esaki mester keda cla y presenta na e development officer di FIFA, esta señora Angenie Kanhai, cu ta encarga cu e supervision general. Den henter e proceso aki, tur miembro ehecutivo y tambe stakeholders lo hunga un rol grandi, teniendo na cuenta cu nan opinion ta di sumo importancia pa e federacion Arubano. Pesey mes, durante e siman aki, miembronan ehecutivo di AVB a reuni cu otro, pa termina cu algun punto di atencion di henter e plan strategico menciona. Esaki a ensera entre otro e revision di e asina yama, ‘stakeholder analysis’, ‘vision – mision and values’, ‘strategic goals’ y tambe ‘objectives for each goals’. Pesey mes miembronan ehecutivo ta di opinion, cu tur loke cu a y ta wordo haci na e momentonan aki, ta un muestra cu Arubaanse Voetbalbond realmente ta na bienestar y interes pa cu mehoracion di futbol Arubano.
Johnnyhabibe-Anchorman 