Oranjestad – Siman pasa Minister Otmar Oduber a reuni cu e Scheepvaart Beveiligings Commissie caminda a elabora riba diferente temanan di impotancia pa loke ta trata seguridad nacional. Importante pa bisa ta cu Aruba ta wordo usa como un ehempel den nos region pa loke ta cumpli cu e International Ship and Port Facility Security Code (ISPS).
Presidente di e comision, Alto Comisario Dolfi Richardson a indica cu esaki ta un di e reunionnan structural cu ley ta prescribi. Cada determinado tempo e comision mester informa e mandatario riba e progresonan cu ta tumando lugar den e comision.
Diahuebs mainta nan a reuni cu Minister Oduber y a informe unda nan ta na e momentonan aki como tambe riba e puntonan cu mester bay pone atencion den e proximo lunanan.
Sr. Richardson a indica cu hopi di e discusionnan cu ta tuma lugar ta di caracter confidencial mirando cu ta atende cu puntonan sensitivo y pesey no por informa riba e contenido di e reunionnan, si el a bisa cu ta trata aki di puntonan relaciona cu seguridad na nos wafnan, aeropuerto pa mehora esakinan y pa ta sigur cu Aruba ta cumpli cu ISPS.
Ultimo bishita cu Aruba a ricibi di coastguard Mericano tabata hopi positivo, nan tabata hopi contento cu e progreso cu Aruba a logra durante aña y hasta ta usando Aruba como ehempel na paisnan den nos region pa con pa ta ISPS compliant.
Johnnyhabibe-Anchorman 