Junior National Championships
Oranjestad, 22 maart 2014. Ya ta mas cu un anja cu e hoben atleta di e deporte di landamento sincroniza, Kyra Hoevertsz, a establece su mes na California, pa eynan continua su estudio y tambe desaroya su mes den su deporte como miembro di e club Walnut Creek Aquanuts.
Siman pasa e equipo completo a participa na e “West Zone Junior Championship” na Mesa, Arizona, caminda cu nan mester a logra supera e puntuacion di 73 punto pa por a gana e derecho di participa na e campeonato nacional di Merca cu equipo den e categoria “junior”, cu ta di 14 te cu 18 aña di edad.
Diabierna durante e “West Zone Junior Championships” a toca e prome mitar di e competencia, esta den e figuranan tecnico, y tabata tin no menos cu 119 participante. Figuranan tecnico ta un di e fortalezanan di Kyra y e tabata tin confianza cu esaki lo a bai bon. Como e unico landadora no procedente di Merca, Kyra a logra un puntuacion total cu a posicion’e na di 8 puesto entre e 119 landadornan, lagando pues un tremendo impresion atras.
Diadomigo a tuma lugar e competencia cu ta e rutina riba musica. Cu un presentacion tremendo di e equipo di “Walnut Creek Aquanuts” a impresiona e jueznan y na final di e presentacion, e puntuacion a wordo presenta: 82.500 punto! Mas cu suficiente punto di loke nan mester a alcanza pa por a clasifica pa e campeonato nacional! Fuera di esei nan a gana Medaya di Oro!! Cu un cara di alegria, Kyra hunto cu su team tawata masha contento mes, nan a logra nan meta!
Bista awor ta cambia pa e Campeonato Nacional Junior di Merca, cu ta tuma lugar na Oro Valley, Arizona, den luna di april. Eynan Kyra ta competi cu su club Walnut Creek Aquanuts den e evento di equipo y tambe den e evento di Combo.
E anja aki Kyra no ta preparando pa competi cu solo, ya cu e ta den un programma di preparacion pa bai competi cu su Duet Partner di Aruba esta Anouk Eman den e luna nan juni, juli y augustus representando Aruba den diferente competencianan. Tur esaki pa hasi un preparacion pa e Weganan CAC cu lo tuma lugar na luna di November na Vera Cruz, Mexico, y na unda Kyra hunto Cu Anouk lo representa Aruba.
Johnnyhabibe-Anchorman 