Johnnyhabibe-Anchorman

SANTA CRUZ — Fraccion di MEP atraves di medionan social  a cuminsa alerta pueblo di Aruba cu Parlamento Hulandes e siman aki ta trata e ley di cambio di color di paspoort. E intencion cu nan tin ta pa apesar cu tur hende cu ta nacionalidad hulandes tin e paspoort cora di Union Europeo, mescos cu tur otro pais den Europa, toch pa duna un color diferente pa esnan cu ta nasi na Aruba, otro color na esnan nasi na Korsow, y otro color na esnan nasi na Sint Maarten.

E meta ta pa di leew bo reconose ki ora un Antiyano o Arubiano ta yegando.

Hopi ta comenta cu esaki ta parse tempo di Hitler, cu di leew e hudiwnan mester a wordo reconosi, y pesey mester a pone un strea na nan panja.

Den e afan di cierto politico hulandes pa sigi discrimina demas paisnan den Reino, awor kier cambia color di pasport pa cada pais. MEP a cuestiona y critica esaki fuertemente den pasado, y a laga sa cu Hulanda lo bolbe scucha e bos di nos pueblo atraves di MEP! Mas alew MEP ta informa cu protesta a bai Hulanda caba.

Pero MEP ta cuestiona tambe unda e ministro presidente di e pais aki ta? Na momento cu su yiunan di tera ta wordo discrimina, insulta, ofendi, unda e supuesto “lider” di e pais aki Mike Eman ta? Cu su cabes scondi bow tera atrobe? Esey ta e lider cu e pais aki merese? Un lider cobarde cu nunca ta defende su yiunan di Hulanda? Pasobra durante e tratamento di e ley di Bosman dos siman pasa, tampoco Mike Eman a duna ningun comentario. El’a djis sinta wanta su yiunan di tera wordo discrimina. Berguensa!

Siman pasa, despues cu politico hulandes Geert Wilders a ofende Marocanonan, tur politico hulandes a condena e expresion ey, pero awor si nan ta cla pa ofende nos Arubianonan. Hulanda berdad ta midi cu dos midi. Acaso Hulanda ta bai cambia e color pa e Turco y Marocanonan tambe, of ta di Arubianonan so?

Y tanten e “lider” di e pais aki ta keda cu su cabes scondi den tera, MEP lo sa di sali na vanguardia di e pueblo aki un biaha mas. Un mensahe cla y raspa a bin padilanti di varios comentario, ta cu mester informa Hulanda cu si berdad kier cambia e color di e paspoort pa Arubianonan, hasi’e color di oro pa asina recorda e hulandesnan di e oro cu nan a horta di Aruba.