Ministro Gabinete Eman 2
Oranjestad-Minister Otmar Oduber den cuadro di su maneho pa haci di San Nicolas nos di dos capital turistico, a indica cu lo conta cu tourbusnan cu lo core specifamente e ruta di San Nicolas.
Ta asina cu un total di 15 permiso pa tourbus a (y ta den proceso di) wordo otorga pa por conta cu mas bishitante pariba di nos isla. Intencion ta pa por lo menos un 40% di nos bishitantenan bay pariba di nos isla y conoce tur loke e parti aki tin di ofrece, cual ta un ambiente local, cultural, historico cu ta papia di nos herencia como isla multicultural.
Manera ta conoci, Minister Oduber a anuncia algun luna atras cu el lo elimina e moratorium pa tourbusnan, pero unicamente pa cubri e ruta di San Nicolas, es decir, e destino final di e tourbusnan aki mester ta San Nicolas. E permiso aki ta cay bou di un clausula hopi mas detaya compara cu esun ya existente cu ta un permiso habri.
E mandatario ta splica cu a habri e moratorium mirando e meta principal di atrae turistanan pa conoce San Nicolas. Usando esaki como un di e rekisitonan den e permiso particular aki pa e tourbus, unda mester pasa pariba cu e turistanan y e di dos ta e forma cu e busnan lo mester identifica nan mes. E identificacion lo tuma lugar atraves di e Fondo di Mehoracion di Producto Aruba (TPEF) , cu lo percura pa identifica tur e tourbusnan aki cu caracteristicanan di pariba.
E ruta nobo aki cu destinacion San Nicolas lo haya un mercadeo fuerte tambe na di parti Oficina di Turismio (ATA), cu lo haci promocion riba nivel local pa motiva e turistanan cu a yega Aruba pa conoce San Nicolas.
Minister Otmar Oduber ta indica cu di parti di Gobierno y su banda, lo haci nan maximo esfuerzo pa logra loke a wordo poni dilanti pa e futuro di San Nicolas.
Johnnyhabibe-Anchorman 