Johnnyhabibe-Anchorman

Lider Di Mep Eveline Wever Croes

Oranjestad-Líder di MEP ya pa basta tempo ta masha critico riba tur e problemanan cu nos grandionan ta enfrenta, y en bista di e welga di trahadornan di SABA a mustra su desaprobacion pa e maneho di gobierno.

“Trahadornan di SABA tin e tarea noble di cuida di nos grandinan. Ya pa basta tempo mi ta boga pa trata e empleadonan cu mas respet, pasobra nan trabou ta hopi duro. Varios biaha nan ta sufri problema di salud debi cu e trabou ta duro.

Ta un crimen cu gobierno no kier atende cu e asunto di nan pago manera debe ser. Nos grandinan merese un cuido digno, y pa nan haya esaki e trahadornan di SABA mester haya locual nan tin derecho riba dje. Ya caba e salarionan no ta cos di gaba, pasobra gobierno no kier pone mas placa disponible pa e empleadonana ki. Pero pa kita locual nan tin derecho riba dje, ta un crimen.

E hecho cu empleadonan mester welga pa pidi nan derecho ta un berguensa pa e gobierno aki. Principalmente pasobra gobierno tin cantidad di placa pa biahe, pa fiesta y te hasta pa core go-kart.

E siman aki MIke Eman a bolbe biaha cu un delegacion grandi pa Merca, cu ta costa nos pueblo mas di 50 mil florin. Despues e ta bolbe biaha bai Hulanda cu un delegacion hopi mas grandi ainda, y nos ta pendiente pa tende e costo di e biahe ey.

Nan fiestamento tampoco ta caba, pasobra te hasta un fiesta a organisa pasobra Mike Eman ta bai aparese na television hulandes.

E escandalo di asfalt cu a wordo usa pa por core go-kart ainda ta fresco den memoria di tur, otro deroche di placa atrobe.

Pa tur e locuranan aki si tin placa, pero pa duna empleadonan di SABA locual nan merese, no tin placa. Esaki ta algo condenable di e gobierno aki. Nos lo cana tur caminda posibel te yega na e punto cu e empleadonan haya locual nan merese”, lider di MEP Evelyn Wever-Croes a duna di conose.