Johnnyhabibe-Anchorman

ORANJESTAD,  Aruba 26 di Maart 2014:  E Proyecto Auto-Estima Aruba (PAEA) tin apenas un luna y mey cu a cuminza cu e certificacion di un grupo nobo di participante kendenan lo bira e futuro asistentenan di e proyecto.

E personanan cu ta participando den e training aki ta pasando den diferente fase pa asina yega na nan meta, cual lo sosode na April 2015.

Actualmente e Proyecto Auto-Estima Aruba ta wordo organiza door di ELKA & Associates NV y na e momentonan aki e ta den un fase hopi avanza unda tin guia personal pa personanan di tur edad como tambe grupal.

Na 2011, Abigael Arends a tuma over e Proyecto Auto-Estima Aruba. Siguiendo e legado cu su mama Lucy Arends (QEPD) Arends a laga p’e di continua cu e Proyecto Internacional di Auto-Estima Aruba.

Hopi comentario positivo ta ser scucha di PAEA.  Ferdinandus Vasco ta un di e participantenan di e programa aki. Vasco ta trahando na Colegio EPI y el a laga sa cu e tempo cu el a tende di e proyecto e mes tabata den un proceso pa supera traumanan den bida, descubri e ser cu e ta actualmente y encontra su mes.

Ora cu el a cuminza cu e programa e tabata tin hopi expectativa ya cu el a haya sa cu e proyecto aki na Aruba a cuminza cu un persona mundialmente reconoci cu ta Bob Mandel y cu e lider Abigael Arends tin contactonan hopi importante na nivel internacional cu ta aporta na e proyecto aki.

   “Basicamente mi a expect hopi den e sentido cu mi por a sinti cu tabata tin hopi pa ricibi. Tabata tin hopi pa siña di dje”, Ferdinandus Vasco a manifesta.

El a keda hopi entusiasma di tende con ELKA & Associates NV ta envolvi den proyectonan den bario, di hubentud y Let’s Talk atendiendo e problema di gang den nos comunidad.

Segun Vasco, e ta un persona cu ta hopi den contacto cu hobennan door di su trabao como docente y como parti di e personal di Colegio EPI. Eynan e por wak unda e retonan ta y unda e dolornan ta sinta.

Casi dos luna a pasa cu Ferdinandus Vasco a bira parti di e Proyecto Auto-Estima Aruba y el a laga sa cu e ta sinti “emocionalmente mas light, liber y mas na paz cu mi mes. Bo ta wak cada caso diferente, bo ta siña hopi mas e pasonan di tolerencia, di acepta bo mes y otronan como persona. Aworaki mi por sinti un energia mas positivo y bo ta bira hopi mas aware di cierto cosnan”.

Su meta aworaki ta pa finaliza cu e certificacion completamente y sigui bay conferencianan como tambe aporta na Elka & Associates na e diferente proyecto cu nan tin tanto local como internacionalmente. “Mi kier sigui empower mi mes y sigui habri mi mes, crece no solamente personal pero riba un nivel profesional tambe”.

Ferdinandus su mensahe pa esnan cu ainda no conoce di e proyecto aki ta pa tuma e corahe y haci’e. “Just do it, den e sentido cu hopi biaha bo tin miedo di cambionan den bo bida. Loke mi a siña tambe ta cu nos tur tin cierto cosnan di  nos pasado cu ta doloroso, hopi trauma cu inconcientemente nos no ta realiza cu nan tin efecto riba nos persona y tambe riba con nos ta anda cu nos yiu, famia, pareha, coleganan, etc”.

Mester tuma e pasonan pa e sanacion, cual ta bay hiba bo na ser un mihor persona y pa tuma e mihor pasonan den bida, el a agrega.Finalmente, Ferdinandus Vasco a expresa cu e tin solamente cosnan positivo pa bisa di e Proyecto Auto-Estima Aruba y e ta conseha tur hende pa tuma e oportunidad ey di duna bo mes e chens pa ta parti di un proyecto asina.

E trayecto pa yega na un certificacion ta di un promedio di dos aña intensivo, incluyendo e parti pa ta un lider. Abigael Arends ta un persona certifica pa duna e lesnan aki y ta combina e lesnan cu e parti di conocimento y experiencia, cual ta hopi importante pa yega na e certificacion.

Actualmente Abigael Arends ta directora di ELKA & Associates NV y lider di e Proyecto Internacional di Auto-Estima Aruba. Esnan interesa den e proyecto aki por contacta Abigael Arends atravez di info@elka-aruba.com.