Johnnyhabibe-Anchorman

2014_resultadonan2013

A base di registracionnan haci na 2013, Dienst Huur- en Consumentenzaken a compila un lista di nomber di empresa cu mas tanto biaha a comete un sorto di infraccion contra leynan cu ta trata proteccion di consumido. Dienst Huur- en Consumentenzaken ta registra tur keho di consumido pa asina entre otro por acumula inteligencia riba e sorto di irregularidad cu ta sosode cu e consumido. Ademas di keho di consumido, empresanan tambe ta yama Dienst Huur- en Consumentenzaken pa informacion of conseho riba store policy, implementacion di garantia segun ley of condicionnan di contract. E intencion ta pa por uza tur e informacion aki pa por sigui e desaroyo riba mercado di cerca.

Den 2013 Dienst Huur- en Consumentenzaken a registra total 125 keho di consumido, di cual 46 registracion tabata pa informacion general con pa atende cu nan keho, 56 a pidi pa intermediacion pa yuda resolve e keho, 22 tabata kier registra un irregularidad cu a sosode cu nan. E luna cu a registra mas caso tabata Augustus 2013. Promedio a drenta 10 caso pa luna y e keho ta trata un suma promedio di mas of menos AWG 4900 pa cada caso.

A base di cada keho Dienst Huur- en Consumentenzaken ta evalua e keho y si constata cu berdaderamente e negoshi a comete un infraccion, Dienst Huur- en Consumentenzaken ta avisa e negoshi pa remedia esaki mas pronto cu ta posibel.

E keho cu mas tanto a sosode tabata pa motibo cu e servicio no a keda entrega of apenas un parti, especialmente na garashi di auto, companianan di construccion, etc. Hopi keho tabata tocante producto defecto y negoshi cu ta nenga di cumpli cu garantia. Un otro keho cu ta sosode ta tocante condicionnan di pago riba e acuerdonan di credito huurkoop. E casonan aki ta en total 24. Mas caso a bin di e sector di tiendanan cu a bende aparatonan electronico sigui pa garashi di auto y servicio di telecomunicacion of Internet. Un otro sector cu hopi registracion di irregularidad a drenta tabata di viahe, pero di locual mayoria tabata pasobra e compania ‘Dutch Antilles Express’ a bay bancarota.

Dienst Huur- en Consumentenzaken su obhetivo ta pa entre otro cuida e interes di of brinda proteccion na e consumido mediante control y promocion di comercio husto entre negoshi y consumidor y tambe concientisa e consumido riba su derecho. E consumido su derecho ta amplio y ley ta protehe e consumido riba diferente aspecto ora ta trata compra di producto of uzo di servicio.

Pa mas informacion riba leynan cu ta trata derecho di consumido, haci un keho of registra un abuso contra consumido yama of pasa personalmente na Dienst Huur- & Consumentenzaken na Wayaca 33, tel: 5829914, bishita nos website: www.dhc.aw , “like” nos of comparti un anecdota riba facebook, sigui nos via twitter of e-mail nos na info@dhc.aw.