KLM
E aña aki Arubadag lo wordo celebra diadomingo 30 di maart na Rijswijk y tur cos ta mustra cu e biaha aki e lo ta un celebracion grandi un biaha mas danki na Gobierno y sector priva.
Minister Otmar Oduber ta na Hulanda caba atendiendo diferente otro reunion y naturalmente lo ta presente na e gran celebracion aki di Dia Aruba pa hunto cu nos comunidad bibando na tera friu y tambe demas invitadonan celebra esaki pa promer biaha como Minister di Cultura.
E aña aki lo tin diferente presentacionnan pa hiba un poco di e cultura y calor di nos isla na nos madre patria. Lo tin presentacion di The Failures, Tsunami, Jeon & Ata Niro, Vine Irie Offshore, Kids & Youth In Action, Recruit, Ganador di un Canto na Nos Himno y Bandera, entre otro.
Minister Oduber ta sumamente contento con e organizacion di e evento ta bayendo y e bon comentarionan ricibi te na e momentonan aki y tur esaki a pesar cu gastonan e aña aki a wordo corta cu mas di 50%.
El a bisa “Nos kier accentua cu e aña aki e gastonan ta hopi mas abou cu aña anterior y toch tur cos ta mustra cu Arubadag e aña aki lo ta uno grandi un biaha mas”. El a agrega cu e comision organisatorio ta contento cu e gastonan a wordo baha na mitad y cu nan ta wordo carga dor di Gobierno y sector priva.
Un danki special ta bay na CMB, AAA y Setar na Aruba y Boogaard y otro companianan cu hunto cu Gobierno a logra organiza e evento aki y cu diadomingo awor Hulanda lo por disfruta di dje.
Johnnyhabibe-Anchorman 