Archive for March, 2014

Lider di Mep Eveline Wever Croes

Lider di Mep Eveline Wever Croes

Oranjestad-Aruba tin hopi anja ta lucha cu e problema di sushi, y e gobierno aki deliberadamente pa 4 anja largo no a hasi nada pa soluciona e problema aki structuralmente. Nan a yega y para tur loke MEP tabata tin andando, pero no a bin cu net net nada na su lugar.
 
Y pesey awor tur caminda e dumpnan ta yen, y mester crea mas dump, awor den Santa Cruz. Pero e problema ta cu gobierno no ta tene cuenta cu tur e requisitonan encesario na momento di crea un dump of ‘landfill’. Prome cu bin cu un ‘landfill’, mester pasa e proceso di hindervergunning, mester informa y scucha e bario, mester warda procedura di obheccion (bezwaar). 
Mester prepara e lugar debidamente cu un fondo evita cu sushi ta sijpel bai den e tera.No ta djis un buraco bo ta cuminsa yena! NO ta djis bo ta wak rond, cual di bo amigonan of esnan cu a dunabo hopi placa den campanja bo por ydua atrobe, y bo ta sacrifica bienestar di centenares di hende!
Y mester tene na cuenta cu e molester di holor, e huma, e bestianan cu e landfill aki lo causa, tur lo afecta e calidad di bida di esnan cu ta biba den e area afecta. Y no lubida cu door di e direccion di biento, esaki por afecta masha hopi hende. Djis puntra esnan cu ta biba banda di Gabillan, esnan cu ta biba na Simeon Antonio. Nan ta keha di molester pero tambe problema di salud.

 

E problema aki no tin color politico, tur esnan cu ta biba den e barioy  cu ta stima e bario di Santa Cruz a uni den un accion di firma, y pesey mi ta sostene e accion di e bario pa bisa NO na e dump na Santa Cruz.

Universidad Corsow

Universidad Corsow

Oranjestad-Diahuebs dia 20 di maart representante di Universidad di Corsou Dr. Moises da Costa Gomez(UoC), Universidad di Aruba (UA), Universidad di St. Martin (USM) y Instituto Pedagogico Arubano (IPA) a firma un combenio di cooperacion, e asina yama UniCarib. Pa hopi tempo caba esaki tabata un deseo di cada partner. Locual cu e institutonan tin en comun ta, cu nan ta ofrece enseñansa superior den region di Caribe of den Reino Hulandes. Nan ta mira e necesidad pa reforsa educacion academico y investigacion pa e universidadnan Caribe-Hulandes y otro institutonan di enseñansa superior den region. Door di intensifa e cooperacion mutuo, e partnernan ta kere di por yega mas cerca na otro pa realisa e meta aki.

Segun e acuerdo, e parternan lo aspira pa coopera pa reforsa enseñansa y investigacion den sentido mas amplio. E tres universidadnan y e instituto pedagogico lo explora e posibilidadnan pa ofrece programa educativo nobo, haci intercambio academico y cuminsa cu un programa di investigacion colaborativo. E partnernan lo busca cooperacion substantivo di personal di nivel halto y training pa studiante, transformacion di logronan scientifico y tecnologia encuanto IT E-learning y biblioteca. Cada forma di cooperacion specifico lo ser poni den un combenio di acuerdo cu lo elabora riba detayes. E combenio tin un duracion di dos aña den cua intencion ta pa renoba esaki automaticamente despues di evaluacion.

Pa e partnernan den UniCarib, Maestro Kompas ta e prome proyecto di e cooperacion mutuo desea. Proyecto Maestro Kompas ta iniciativa di y ta controla pa Ministerio di Educacion Hulandes (OWC). Maestro Kompas tin e tarea pa sigura e desaroyo structural y garantisa e calidad di nivel di educacion di Caribe cu ta forma parti di Hulanda. E programa di desaroyo ta encera tur tipo di actividad educativo, variando di profesionalisacion di docentenan den region. Alabes explora riba metodo nobo pa ofrece programanan educativo. Tur e partnernan envolvi den UniCarib primordialmente a expresa nan intencion pa establece , en cooperacion cu Maestro Kompas, un plataforma cu ta haci posibel pa studiante den Caribe sigui estudionan acredita di Maestro na nivel di Bachelor. E programa lo ta ambos na Hulandes y Ingles. Bunita di e programa ta cu e ta uno ‘blended’ cual ta haci cu e studiantenan por studia den nan region y no mester sali pa exterior. Cada partner di UniCarib ta responsabel pa e ehecutacion di su programa. Den e prome siman di April 2014 e partnernan lo contra na UoC pa yega na un acuerdo con pa sigui cu e proyecto Maestro Kompas.

 

 

 sonrisa Doet

Asociacion di Mayor Sonrisa y Stichting Trampolin pa Trabao kier a felicita Cede Aruba conhuntamente cu Oranjefonds pa cu Aruba Doet 2014. E aña aki Centro Sonrisa y Stg. Trampolin pa Trabao a participa den e projecto di Aruba, dunando oportunidad na esnan interesa pa bin duna un man na ambos lugar.

Como projecto pa Arubadoet 2014 Centro Sonrisa tabata tin e trabao di cambia e waya di cura, mirando cu algun parti di e hekinan esakinan tabata tin buraco. Cual tabata haci peligroso pa e clientenan di Traimerdia Sonrisa. Centro Sonrisa kier a agradece ‘Hot Coco Group’ cual tabata studiantenan di Colegio EPI unit Hospitality and Tourism.

En cambio Stichting Trampolin pa Trabao tabata como projecto di expande e green house cu ‘aquaponic’, planta simiya, planta mata nobo y drecha e green house. Tambe Trampolin tabata tin un parti di embeyesimento di nan gebouw. Unda cu a wordo planta yerbe dilanti e gebouw, a cambia e tera pa e matanan dilanti. Trampolin kier a agradece Parlamento Hubenil y MedWork Caribbean cu a elegi Trampolin pa Trabao cu nan instancia pa contribui cu nan trabao voluntario pa Arubadoet!

Stichting Trampolin pa Trabao ta un projecto cu a sali for di e Asociacion di Mayor Sonrisa, cual tin como meta stimula e parti di integracion di e clientenan cu limitacion den e sector laboral. E gebouw di Stichting Trampolin pa Trabao lo funciona como un Café unda cu e clientenan cu limitacion mes lo zorg pa sirbi, cushina y bende. Directiva di Stichting Trampolin ta spera cu pa e aña aki mes lo por habri ‘Café Trampolin pa Trabao’.

Asociacion di Mayor Sonrisa conhuntamente Directiva di Stichting Trampolin pa Trabao kier a agradece tur voluntario cu a yuda durante Aruba Doet, al igual cu Burger King Aruba, Tropical Bottling, Albo, Romar Trading, ETIOB, Fantastic Garden, Retraco, Santa Rosa, Aruba Conciente, Don Jacinto Cafe y Aruba Wine and Dine cu sin nan nos projecto durante Arubadoet no por tabata un exito!

 

 

Rene Bernabela

Rene Bernabela

Oranjestad – Rene Bernabela presidente di sindicato Topa a informa nos di johnnyhabibe.net cu riba e aspecto y medida cu e gobierno di gabinete Eman2 ta treciendo y cual ta masacrando e pueblo Arubiano. Por a tuma nota di locual falta ainda pa bin cu otro medida caminda cu poco poco ta biniendo cu e medidanan pa cu e pueblo trahador y e pueblo den su totalidad.

Bernabela ta sigi expresa cu lo bin cu aumento riba recogemento di sushi na cada cas.Den un comunicado ta sali cu gobierno lo cuminsa cobra pa recoge sushi na cada cas aki na Aruba na un suma di afl 35,- pa florin pa luna. Esaki ta e punto culminante despues di tur e otro medidanan ja tuma y dia tras dia ta biniendo mas medida den un un forma indirecto y dirigi strit riba e pueblo.

Sr.Rene Bernabela ta amplia e noticia mas via nos Player:

 

Oduber 4

Oranjestad-Den e actualizacion di Banco Central di Aruba pa loke ta e estimacion di Aruba su Producto Domestico Bruto (PDB) pa 2013 y 2014, por lesa for di e entidad renombra aki cu nan ta estima cu e actividadnan economico den 2013 a expandi cu 3,9% den termino real, pa un gran parti causa dor di un crecemento fuerte di e demanda turistico.

Minister di Turismo Otmar Oduber ta sumamente satisfecho cu e resultado aki, cual ta demostra cu e trabounan cu a bin ta haciendo ultimo añanan conhuntamente cu sector priva y partnernan den e industria aki a bin ta dunando su frutanan.

Importante pa menciona cu Banco Central ta indica cu turismo stay-over a aumenta cu 8,3% y cu ta premira cu e ingresonan relata na esaki lo subi cu 6,1%. Mas ainda, nan ta menciona cu pa 2014 economia lo sigui wordo sosteni pa sector turistico. Nan ta anticipa cu apertura di Ritz Carlton y renovacion di cambernan di Holiday Inn lo duna un boost adicional, mientras cu e ciere y renovacion di Westin lo mitiga e boost aki.

Banco Central ta expresa tambe den su relato cu e aumento den inversion y e prestacion fuerte premira den sector turistico lo aumenta e cantidad di personanan emplea, cual lo por causa un crecemento den consumo priva cu 2,0%.

Esaki ta cifranan hopi positivo cu ta refleha e atencion cu industria di turismo a bin ta hayando caminda e parti importante ta cu for di 2009 a tuma e decision di estrecha e lazonan cu e partnernan tanto local como internacional, buscando asina e mihor desaroyo pa nos principal pilar economico enfocando riba calidad sin lubida cantidad.

painting arubian soul

painting arubian soul

Oranjestad 24 maart, – Cu Aruba tin hopi talentonan musical no ta informacion nobo, mirando e gran cantidad di musiconan cu a toca den carnaval. Pero dicon no uni tur nos talentonan local den un album di colaboracion? Y brinda nan un plataforma adecua manera nos teatro local?

Esey ta lo cual Arubian Soul ta encera. Otro siman diamars dia 1 di April, Cas di Cultura lo host e prome concierto unda tur e musiconan local cu a traha riba e album “Arubian Soul”, produci cu e sosten financiero di Unoca, lo presenta nan cancionnan na publico presente.  Por disfruta di un dushi Tumba, Jazz of hasta Son Montuno.

Artistanan famoso como Michelangelo Koolman, conoci pa su cancion exitoso “Mundo ta un Milager”, Martin Buitenweg cu a aregla casi tur e guitara pa e album, Miguel Genser, conoci no solamente pa su bonita voz pero tambe ta e actor principal den e pelicula popular “Abo So” ta djis un par di nombernan presentando nan obra e anochi aki.

Otro musiconan participando ta Ron Martis, cu e cantica “ Mi kier sa’  Jelitza Croes cantando e tumba “ Mihor nos separa”, Chantal Quandt pa e cantica ‘ Un Bon Muhe”  y Ruthjean Landaeta Helder hunto cu su casa Rajiv Landaeta lo canta “ Awe te cos” y e wals Antiano“ Aruba ta mi cas”.

Tickets pa e show bunita aki ta obtenibel na Cas di Cultura. Fecha: Diamars dia 1 di April, 8:00-10:00pm.

Stuart Smith

Oranjestad-Aruba 23 maart.Den e ultimo dos añanan varios atleta elite a haya e ayudo financiero necesario di Lotto pa hiba un debido preparacion den exterior. Comision di Subsidio atrabes di su Comision Tecnico kendenan ta haci e trabou di control riba dicho atletanan ta esnan cu ta duna e conseho positivo pa e atleta por realisa e biahe aki. Comision di Subsidio y Lotto ta kere cu tur ayudo avansa den exterior ta na beneficio di nos atletanan unda e conocimento amplio lo yuda hisa e nivel di nos atletanan y nan coachnan.
Como algun luna pasa Comision di Subsidio cu financiamento di Lotto a yuda e atleta den e deporte di taekwondo, Stuart Smit pa bay entrena na Monterey, Mexico unda ela hiba su preparacion pa competi den e Weganan Suramericano cu recientemente a tuma lugar na Santiago de Chile. Mirando e resultado obteni pa e atleta Stuart Smit na Chile cu ta un medaya di brons, Comision di Subsidio, Lotto y Ministerio di Deporte ta felicita e atleta pa su gran logro na Chile. Alo largo sacrificio, trabou duro y perseverancia a converti den un medaya pa Aruba.

Algun dia atras e atleta Smit a regresa Monterey, Mexico unda elo sigui cu su preparacion, awor pa su clasificacion pa e Weganan Centro Americano y del Caribe cu lo tuma lugar den luna di November na Veracruz, Mexico.

Pabien y hopi exito na nos medayista den taekwondo, Stuart Smit.

Ministro Otmar Oduber

Ministro Otmar Oduber

Dialuna mainta Ministernan Otmar Oduber y Mike de Meza tabatin un conferencia di prensa na Baby Beach caminda e mandatarionan a anuncia e diferente desaroyonan positivo pa pariba di nos isla.
Minister Oduber a indica cu na e momentonan aki ta tumando lugar un inversion pa mehoracion di Baby Beach pa un total di 1.6 miyon Florin. Den e fase aki ta mehorando infrastructura di Baby Beach y esaki ta wordo financia dor di Fondo di Mehoracion di Producto Aruba (TPEF). Esaki ta un di e proyectonan cu ta tumando lugar na e momentonan aki y di varios mas cu lo bin pa logra e meta estableci pa Gobierno di haci di San Nicolas e di dos capital turistico di nos isla pa por sigui engrandece economia di nos isla, e titular di turismo a duna di conoce.
Banco Central ta premira cu entradanan laga atras pa turistanan na 2013 a aumenta cu 6.1% y esey ta e base pa cual e dos ministernan tabata para dialuna na San Nicolas, pa mira e continuacion riba e plannan caminda cu lo expande, mehora atraccionnan turistico pa por haci esaki pa por sigui cumpli cu expectativanan cu tin di parti di e turista cu ta bishitanos.
Dunando un pabien na su coleganan de Meza y Sevinger, Minister Otmar Oduber a bisa cu aña pasa su dos coleganan y Gabinete Mike Eman a inicia un cantidad di desaroyo rond di Postkantoor, a inicia e Carnival Village y a drecha infrastructura di diferente bario na SanNicolas pa eleva e calidad no solamente pa e turista, pero tambe pa esnan cu ta biba pariba di nos isla.
Siguiendo cu e tema di desaroyo di pariba di nos isla, Minsternan Oduber y de Meza a sinta na augustus aña pasa cu un grupo grandi di inversionista y comerciantenan. Aki a presenta e plan pa haci di San Nicolas un di dos capital turistico caminda cu mester crea un infrastructura den e centro di ciudad di San Nicolas pa por atrae esnan di pabou pa bin pariba.

Minister Oduber a duna di conoce cu a mara esaki hunto cu un cantidad di desaroyo y fondonan cu Gobierno a pone disponibel pa por crea e oportunidad di desaroyo pariba di nos isla.
Na inicio di maart Minister Otmar Oduber a haci un biahe di trabou pa New Orleans hunto cu un delegacion di 26 persona, esaki tabata pa mira con e ciudad aki a desaroya den un di e ciudadnan turistico principal di Merca. A bay cu institutonan financiero di Aruba, inversionistanan y tambe comerciantenan pa mira e similaridad cu tin cu San Nicolas y kico por wordo haci pa desaroya e parti di nos isla tambe, pero den nos mesun estilo. E recepcion haya dor di Gobierno di New Orleans tabata hopi bon y segun informacion ricibi for di Minister de Meza, e Mayor di e ciudad aki lo ta pronto di bishita na Aruba.
“Ministerio di Economia hunto cu Ministerio di Turismo y naturalmente e parti di Infrastructura di Sr. Sevinger y Gabinete Mike Eman II den su totalidad lo bay pone un empeño specifico tras di e proyecto aki y por logra e desaroyo desea”, Minister Otmar Oduber a duna di conoce.
El a agrega cu meta di e proyecto ta pa crea un atraccion nobo, algo cu no por wordo crea pabou di nos isla. Palm Beach, e promer capital turistico a wordo desaroya den un forma sumamente moderno, pero estudionan ta mustra cu tin un hamber di parti di e turista pa un area mucho mas cultural y historico caminda por haya hopi mas di e ambiente y di e artesania local, entre otro.

A indentifica San Nicolas como e lugar caminda ta bay desaroya e di dos capital turistico unda cu por haya loke e turistanan ta bsucando awendia.
“Pami ta un honor sigur hunto cu Sr. de Meza cu nos por a yega asina leu, caminda no ta un inversion aki of un inversion sporadico ta wordo haci, sino a planifica den un plan maestro di kico nos kier logra finalmente cu e area aki pariba di nos isla…y e meta mester ta cu por lomenos 40% di e turistanan cu ta yega Aruba (1 miyon cu ta bay alancanza e aña aki) mester por conoce y yega pariba di nos isla”, Minister Oduber a expresa.

 

Parlamentario Dangui Oduber

Parlamentario Dangui Oduber

Oranjestad – Dangui Oduber parlamentario pa partido Mep ta bisa cu siman e la denuncia e asfalt gate di partido AVP,placa di pueblo fondonan publico a wordo husa na un evento di himno y bandera di partido AVP unda D.O.W a drecha henter un area specialmente pa un careda di Go Cart. Oduber ta sigi splica cu awor e pregunta ta cu si ta go Cart Sr.Prome Ministro kier a core un sonjo di dje pa bira realidad,tin un pista profesional na Busiri,pakiko no a hasi e evento aki ajanan. Pakiko a escoge pa husa fondonan publico,placa di pueblo specialmente pa e careda di Go Cart aki. Siman cu a pasa nos a ricibi mas informacion segun Sr.Oduber y a tuma nota tambe di un declaracion di parlamentario Marlon Sneek di Avp uno hopi swak y uno hopi lamentabel tambe unda di hasi su trabow y hasi pregunta na e ministro y cuestiona e asunto aki a escoge pa bay defende algo cu e no por a defende. Sr.Dangui Oduber ta sigi amplia via nos Player :  

Aruba Doet 3

Oranjestad-Diasabra cu a pasa Fundacion CRECIENDO tambe a participa cu e tremendo iniciativa di Aruba Doet, clausurando esaki cu un exito total y rotundo.

Despues di hopi siman di preparacion caminda hopi instancia, fundacion, organisacion y scolnan a inscribe nan trabou pa participa cu Aruba Doet, den transcurso di fin di siman nan a haya e oportunidad pa hunto cu voluntarionan durante un dia logra un meta mas.

Pa Fundacion CRECIENDO e oportunidad pa participa cu Aruba Doet pa logra un meta cu nan tin 2 aña trahando riba dje ta sigur un momento hopi grandi cu ta demostra cu e fundacion aki lo sigui lucha pa nan causa.

Fundacion CRECIENDO ta un fundacion relativamente nobo exstiendo solamente 2 aña cu ta boga pa e derecho pa tur mucha y hoben den situacion di risico haya e oportunidad pa conoce nan talento por medio di arte pa nan sigui crece den esaki. E fundadoranan di e fundacion aki ta kere firmemente den e metodo di arte terapia usando 5 diferente disciplina e.o. musica, hardineria, arte graphico, baile y teatro pa logra guia nan mucha y hobennan riba e caminda corecto.

Los di nan meta tambe nan ta conoci di ta yuda e grupo di mucha y hobennan aki cu tas pa bay scol, actividad den bario di San Nicolas y actividadnan creativo cu ta cuadra cu nan meta.

Bou di a e hala di Aruba Doet, Fundacion CRECIENDO trahando hunto cu Ministerio di Sector Primario y Santa Rosa a logra un soño grandi di e fundacion, cu ta drecha hardinnan den diferente bario rond di Aruba, cuminsando cu cuatro hardin den bario di De Vuyst , San Nicolas.

Den cuadro di e maneho di Sector Primario y Santa Rosa pa cu  sostenibilidad di di matanan di fruta y berdura di Aruba, a logra hunto cu voluntarionan, manera Minsiter Otmar Oduber, ENNIA, Santa Rosa, Parlamentarionan y mas importante a conta cu e hobennan di e bario mes cu a uni pa ‘planta simia pa cosecha hobennan fuerte pa mañan.

Tabata un momento di hopi orguyo pa e hobennan aki pa mira tanto persona importante den nos comunidad uni pa yuda nan haya nan hardin cu lo aporta na nan conocemento diario y cu lo yudanan concoe un ofishi nobo. Los di esaki sigur e cosecha di cada mata lo bay na e hogar di cada un mucha y hoben di e bario aki.

Fundacion CRECIENDO kier gradici Minister di Sector Primario Otmar Oduber, Santa Rosa y Team, Oranje Fonds, CEDE Aruba, ENNIA, Parlamentarionan Sr. Baba Herde, Sra. Jenifer Arends-Reyes, Sra. Mervin Wyatt-Ras, Sr. Donny Rasmijn, Sra. Lorna Varlak, Sr. Norman Roos, Sr. Jeffrey Kelly, Sra. Desiree Croes, Giannis Group, Comicion Stichting de Vuyst, Reina Hubenil di Aruba Dana Arendsz y tur Voluntario cu a yuda di un forma of otro y a sali pa uni ya desde oranan trempan di mainta pa yuda nos muchanan den bario di De Vuyst.