Jim Hepple
Ornjestad-Jim Hepple, Presidente di AHATA a comenta riba e ultimo cifranan publica pa Banco Central relaciona cu turismo y su importancia den nos economia.
El a bisa cu e cifranan aki ta mustra cu turismo stay-over a aumenta cu riba 8% aña pasa y cu e placa cu turistanan a laga atras den nos economia a aumenta cu mas di 6%. E cifranan aki, segun Presidente di AHATA ta hopi consistente cu loke nan a wak den sector hotelero aña pasa, unda cu e prijs pa camber disponibel a aumenta cu 6% y e ganashi pa camber disponibel a aumenta cu 3%, esaki mirando cu e cantidad di cambernan a aumenta (cambernan di Holiday Inn a drenta den operacion atrobe y apertura di Ritz Carlton). Si mira e total di ganashi pa camber disponibel, es decir, tur e Dollarnan cu a drenta dor di benta di cambernan, esaki a aumenta cu 8%.
Jim Hepple den su declaracionnan a mustra cu AHATA ta sigui e liña di maneho stipula pa Minister Otmar Oduber, cual kier concentra riba aumento di calidad, enfocando riba e cantidad di placa cu turistanan ta laga atras, pero naturalmente sin lubida e cantidad, specialmente teniendo na cuenta cu cambernan adicional a bin acerca, manera ta e cambernan di Holiday Inn cu a habri despues di a pasa un periodo largo di renovacion, como tambe e apertura di Ritz Carlton.
Tambe e Presidente di AHATA a bisa cu en berdad a conoce un crecemento continuo den cifranan di turismo desde 2009 y esaki ta debi na e recuperacion di e crisis financiero mundial, pero na mes momento e ta bisa cu aña pasa (2013) por a mira cu e resultadonan a surpasa esunnan di 2005 y AHATA ta contento cu esaki y tur indicacion ta mustra cu industria di turismo lo sigui mira un crecemento continuo
Johnnyhabibe-Anchorman 