Johnnyhabibe-Anchorman

Oranjestad-Durante presenacion di Minister Otmar Oduber na inversionistanan y entrepreneurs na Malietoren Zaal na Hulanda unda cu el a elabora riba importancia di turismo y su impacto riba nos economia, el a indica diferente desaroyo y cambionan positivo den nos industria turistico y con maneho di ultimo 4 añanan a presenta resultadonan sumamente positivo pa loke ta nos pilar economico.

Entre e puntonan cu e mandatario a resalta den su presentacion, el a indica cu sostene y aumenta servicio aereo tabata un obhetivo principal. “Ta impresionante pa wak e coneccion cu un isla asina chikito manera Aruba tin cu un total di 33 gateways y 30 aerolinea, incluyendo e aerolineanan principal di Merca, America Latina y Hulanda, conectando Aruba cu mundo”.

Aki el a agrega cu aeropuerto no solamente tin facilidadnan excelente, pero tambe a wordo premia como e mihor den mercadeo pa e aerolineanan. Tambe el a bisa cu Aruba Airport Authority, opera pa Schiphol Group tambe ta respalda e vision di Gobierno pa Aruba por bira un hub entre Europa y America Latina, reforzando e potencial di Aruba como un ‘gateway’.

E vision di Promer Minister Mike Eman pa Aruba ta cuadra, ta stimula y ta enforza e desaroyo di un turismo sostenibel. Pa contribui cy un desaroyo sostenibel a mantene un maneho di restringi e crecemento di hotelnan, ta encurasha e hotelnan ‘green certified, a baha e invoerrechten pa productonan no dañino pa medio ambiente y ta sigui traha pa aumenta e beneficionan deriva di turismo pa henter comunidad, Minister Otmar Oduber a splica esnan presente na Malietoren Zaal.

Siguientemente el a conta cu Cultura a wordo agrega na su portfolio y e tin un lugar halto den su agenda. “San Nicolas ta bay wordo transforma den e capital di herencia cultural di Aruba. San Nicolas ta un ciudad cu hopi potencial pa inversion y icentivonan fiscal ta aplicabel pa cierto inversionnan. E lo bira e di dos capital turistico di Aruba y lo stimula un economia cultural. Algun monumento a wordo restaura y tin hopi mas cu yen di potencial pa inversion y uso”, tabata palabranan di Minister Oduber.

Tambe e titular di Turismo a mustra riba e obhetivonan ambicioso cu a wordo stipula pa e proximo 4 añanan: kier logra un crecemento continuo den yegada di turistanan  di 2.5% pa aña, aumento di placa cu turistanan ta laga atras di 4% anualmente y un aumento di ganashi pa camber disponibel di 9% indicando un crecemento continuo di turismo di calidad.

“Concluyendo, nos lo sigui construi un economia mas fuerte a traves di turismo. Como pais nos lo continua cu e esfuerzonan pa diversifica e economia y aumenta e potencial laboral a traves di e concepto di ‘green gateway’”, Minister Otmar Oduber a finaliza bisando.