Johnnyhabibe-Anchorman

Ministro Otmar Oduber

Durante biahe di Minister Otmar Oduber na Hulanda siman pasa, el a haya oportunidad di reuni cu Director di Nationaal Restauratie Fonds, Pieter Siebinga. Tambe na e reunion aki tabata presente tambe Jan de Jong, representante di Minister di Onderwijs Cultuur y Wetenschap, como tambe Anne Witsenburg, Directora di Stichting Monumenten Fonds Aruba. E reunion aki a bay den hopi bon ambiente y tabata hopi positivo pa loke ta restauracion di monumentonan na nos isla, cu atencion special pa San Nicolas. Na 2009 Aruba y Hulanda a yega na palabracionnan di cooperacion riba tereno di mantencion y reconstruccion di edificionan valioso pa loke ta trata herencia cultural di ambos pais. Como adicion na e acuerdonan di 2009 riba cuido di monumentonan, Hulanda ta ofrece sosten den e creacion di diferente formanan di modelonan di financiamento pa e mantecion y reconstruccion di e monumentonan. Ya caba Aruba a haya 1.5 miyon Euro cual a wordo inverti na entre otro renovacion di e watertorennan. Durante e reunion Stichting Monumenten Fonds Aruba a presenta loke nan a haci den ultimo añanan y danki na esaki a logra haya 500 mil Euro adicional cu lo wordo inverti entre otro den e restauracion di Nicolaas Store cu a wordo recientemente adkiri y cu lo ta cas di Community Museum. Mester bisa cu e suma di placa aki ta wordo financia na un porcentahe hopi abou y e prestamo tin un duracion di 60 aña. Durante e reunion a palabra tambe cu lo entrega un overzicht di proyectonan di renovacion pa San Nicolas pa Nationaal Restauratie Fonds por evalua y aloca mas fondo na un interes hopi abou. Minister Oduber a keda sumamente satisfecho cu e reunion aki mirando cu Hulanda a traves di e fondo di restauracion a bin ta mustrando su sosten pa restauracion y mantencion di nos monumentonan y a mustra cu nan lo sigui brinda nos e sosten necesario pa engrandece nos cultura a traves di nos monumentonan.