Johnnyhabibe-Anchorman

Oranjestad-Ministerio di Cultura, Departamento di Cultura Aruba y Grupo Corector di Papiamento cu sosten di UNOCA a organisa recientemente e competencia di Arte di Palabra cu un bes mas a sa di ta un exito.

Arte Palabra di e forma aki kier aporta pa stimula y promove bon uzo di Papiamento den nos comunidad y na mesun momento stimula specialmente e hobennan pa nan crea obranan skirbi den Papiamento.
E aña aki e competencia aki cu a tuma lugar riba 29 di maart na Cas di Cultura, a conta cu un total di 27 participante. Tur aña e acogida bou di e hobennan ta mas grandi, pues esaki a keda demostra tambe na e calidad di produccion cu a wordo entrega y presenta tambe. A conta cu hobennan di diferente scol secundario cu a presenta nan cuenta cortico y poesia dilanti un publico grandi.

Den categoria di poesia original, skirbi pa e alumno mes di klas 1 y 2: na promer lugar a keda Margelin Martijn di Colegio San Antonio cu su rima comico ‘E pushi pulushi’, na di dos lugar a sali Alan Monte di Maria College cu su obra ‘Tempo di mi tempo’ y na di tres lugar a keda Stacey Jacobs cu su poesia ‘Un mucha’.

Den e categoria di poesia original, skirbi pa e alumno mes di klas 3 – 6 / EPI 1-2: na promer lugar a keda Genesis Ramirez Boom di Maria College cu su obra impactante ‘E glas’, na di dos lugar a keda Milanchely Richardson di Maria College cu su obra ‘Amor y bida’ y na di tres lugar a keda David Quant cu su obra ‘Un carta na mi hobennan’.

Di e categoria di cuenta existente pa alumno di klas 1 y 2: e ganador tabata Oriana Baez cu e obra ‘Amiganan te morto’.

E ganador den e categoria di cuenta original, skirbi pa e alumno mes di klas 1 y 2 ta Mirzah Manga Gomez di Colegio San Nicolas cu su obra masha impactante ‘Secreto’.

Finalmente den e categoria di cuenta original, skirbi pa e alumno mes di klas 3 – 6 / EPI 1-2: na promer lugar a keda Chavel Hernandez di Maria College cu su cuenta ‘Forsa’ y na di dos lugar ‘Alexandra Lopez di Maria College cu su storia ‘Con mi ta haci’.

E ganadornan den cada categoria lo bay representa Aruba na Curaçao diasabra di 12 di april 2014 y lo competi cu e ganadornan di Corsou y di Boneiro

Pa medio di esaki comision organisatorio di Arte di Palabra Aruba kier a gradici un y tur cu di un of otro manera a aporta na e actividad exitoso aki. Specialmente kier a gradici nos sponsornan UNOCA, SETAR, Complete Logistics, Digicel, Romar Trading, Cool F.M., Elmar y De Wit & Van Dorp.

Alabes Minister di Turismo, Transporte, Sector Primario y Cultura, Departamento di Cultura Aruba y Grupo Corector kier a desea tur nos hobennan di Aruba hopi exito na Corsou.