Oranjestad-
Luna di Movecion
Dia 6 di april ta dia Mundial di Actividad Fisico. E tema di e aña aki ta ‘Physical Activity: A Golden Goal for Health’, ‘Actividad Fisico: E Gol di Oro pa Salud’. Mundialmente e dia aki ta wordo celebra entre e fecha di 1 di april pa 31 di mei. Ta organisa diferente actividad y evenemento durante di e periodo aki. Algun ehempel ta caminata, seminario, conferencia di prensa y anochinan deportivo.
Meta di e dia aki ta pa:
1. Motiva tur hende pa ta mas activo den nan ora liber, den transporte y na trabou.
2. Duna e informacion na comunidad, na cas, na scol y na trabou.
3. Crea e ‘link’ entre actividad fisico y menos uzo di tabaco, alimentacion saludabel, menos violencia, menos stress, menos isolacion social et cetera.
Dia 7 di april ta dia mundial di Salud. Den e cuadra aki tambe IBiSA kier a pone enfacis riba e link directo entre actividad fisico y salud.
IBiSA tin diferente actividad den cuadra di Luna di April, Luna di Movecion:
• Yamada na tur scol primario y secundario pa dedica atencion na importancia di actividad fisico den forma di por ehempel ‘ochtendgymnastiek’ di 7.45 – 8.00 am, of actividadnan den klas durante e siman di dia 7 di april of durante henter e luna di april.
• Yamanda na tur gym of scolnan di deporte pa organisa algo special e luna aki pa motiva esunnan cu ta desea di join un gym haya un empuhe extra pa haci esaki. Algun ehempel ta organisa un ’open dag’, ‘free day pass’, duna descuento e luna aki pa clientenan nobo et cetera.
• Dia 6 di april ta duna inicio na e luna di movecion pa medio di un actividad riba linear park cuminsando for di 7’or y cual ta dura te cu 10’or di mainta. Nos enfoke e dia aki ta bay ta un dia di actividad hunto cu famia. Nos tin diferente premio pa mucha cu participa. Algun actividad ta:
• Weganan pa mucha y famia cu premio;
• Bus di Salud tey presente pa haci screening di salud;
• Sportsmassage gratis;
• PriceSmart tey cu informacion y un trampoline pa e muchanan haci uso gratis di dje;
• Footfit ta presente pa malcria e pianan y duna informacion di sapato adecua;
• Oportunidad pa haci test cu un acelerometer;
• Fitness test;
• Demostracion di Smoovey y Capoeira.
• Desde dialuna 7 di april te cu fin di april IBiSA ta ofrese na tur empresa interesa, un instructor di deporte pa duna 30 minut di actividad fisico na pia di trabou. Por yama IBiSA na 582-4987 pa reserva lugar pa bo empresa.
• Dia 10 di april e Bus di Salud ta staciona for di 1’or di merdia pa 8’or di anochi na San Nicolas Sport Center.
• Dia 11 di april e Bus di Salud ta staciona riba parkeerplaats di Compleho Deportivo Guillermo Prospero Trinidad di 1’or di merdia pa 8’or di anochi.
• Diasabra dia 12 di april tin diferente actividad deportivo na San Nicolas Sport Center cuminsando for di 5:30 di atardi pa 7:30 di anochi caminda un y tur ta bon bini.
• IBiSA ta presente pa organisa diferente weganan riba beach durante vacacion escolar di pasco grandi na e beachnan di Arashi dia 22 di april y dia 24 di april na Baby Beach. Horario ta di 5’or di atardi pa 7’or di anochi.
• E Luna di April, Luna di Movecion ta wordo clausura cu un bataya di bowling entre e sector salud. Ken lo ta e mihor? AZV, SVB, Ministerio di Salubridad y Deporte, Departamento di Salubridad Publico, Horacio Oduber Hospitaal, ImSan ta bataya pa hiba e titulo maximo den bowling den e sector salud di Aruba. Keda pendiente pa invitacion y inscripcion.
IBiSA ta invita un y tur pa cuminsa participa na nos eventonan den luna di april y asina (cuminsa) haci actividad fisico pa mantencion y mehoracion di salud.
Tambe nos ta invita un y tur pa participa na e caminata ‘Actividad Fisico: E Gol di Oro pa Salud’ cu ta tuma lugar dia 6 di april cuminsando pa 7’or di mainta riba linear Park. Inscripcion ta Awg. 5,- y ta dura henter e siman aki na oficina di IBiSA.
Johnnyhabibe-Anchorman 