Ben Marapin
Ben Marapin, reconocido economista na nos isla a comenta riba influencia di turismo den e crecemento economico cu Aruba a conoce na 2013 y tambe riba con e ta wak futuro di turismo na nos isla.
E ta bisa cu analizando e datonan por mira cu turismo a carga economia na 2013 den sentido cu si e performance di turismo no tabata positivo manera e tabata, e economia lo hasta por tabatin un caida na 2013. “Esey ta un punto cardinal cu nos mester tene cuenta cune: economia a mehora gran parti carga dor di turismo”.
Pa loke ta futuro, Ben Marapin ta bisa cu tin un challenge basta grandi. E ta indica cu IMF a mustra riba e hecho cu turismo a crece, nos ta den e top. “Si bo crece asina e ta bira mas y mas duro pa sigui crece den sentido no den cantidad, pero Minister Otmar Oduber tambe ta desea y purba logra, crece den calidad. Es decir, midi den placa kiermen cada turista cu ta bin, cada tourist night bo ta ricibi mas Dollar, esey ta e idea. Pero no pensa cu bo por sigui haciele manera e crecemento den pasado. Si bo cuminsa yega e top e ta bira mas dificil”.
Papiando di e desaroyo cu ta wordo pusha pa San Nicolas, esta di hacie e di dos capital turistico di Aruba cu enfasis riba e aspecto cultural, Ben Marapin ta bisa cu e idea di bin cu un cos cultural na San Nicolas lo diversifica y pone e turismo bira mas stabiel.
Tambe e economista ta indica cu un punto cardinal cu lo bay yuda eleva e calidad, esta atrae turista cu mas placa, ta por ehempel Ritz Carlton cu a habri porta y Hard Rock Hotel. E impacto directo tey, pero indirectamente tambe un destinacion turistico cu tin un Ritz Carlton, un Hyatt y djis ki un Hard Rock Hotel automaticamente ta bira un destinacion mas popular. Si bira mas popular por haya un mihor prijs pa e productonan.
Riba e aspecto di crece mas, Ben Marapin ta di opinion cu IMF a overlook e hecho cu por switch mercado cu no ta desaroya ainda cu por genera turistanan cu ta gasta. E ta kere cu Brasil ta un mercado hopi importante y e por a compronde cu ta trahando duro riba dje, “no ta algo cu bo por desaroya facil, pero poco poco mi tin confianza cu sigur sigur e approach tey pa haci esey y cu esey lo por bira un pilar dentro di turismo completamente diferente cu e pilar for di Merca, Europa of Venezuela cu lo pone turismo su calidad lo subi y turismo lo ta mas stabiel”.
Johnnyhabibe-Anchorman 