Edmiro Atanita
Oranjestad-Willemstad,E konosido kantante Shamiro Anita, di kantikanan manera “Move Tur Montaña” i “Un Brasa Si Mi Ke”, a kaba di kumpli 24 aña djasabra 5 april. Ku e edat hoben aki ya Shamiro a logra saka 4 album hopi eksitoso. Su kantikanan ta hopi gusta na Korsou, Aruba, Bonaire, Hulanda i Medellin Colombia i na Merka. Den 2011 e Asosiashon di Musika AMAK a entrega Shamiro e premio di Edgar Surpriano. Su Gran konsierto “Move Tur Montaña” a ser deklara komo e miho konsierto di aña, mientras ku su konsierto“Un Brasa So Mi Ke” i “Christmas Gala Show 1 & 2 a sold out yenando e salanan di WTC i Renaissance Hotel yen yen. Den un kompetensia grandi di kanto na Nashville Merka, Shamiro a resulta e di 3 finalista. Su kantika “Un Brasa Si Mi Ke” a sali e miho kantika di alabansa, mientras ku Shamiro mes resulta e miho kantante di alabansa den aña 2012. Pa su bos uniko Shamiro a ser nombra komo e miho vokalista maskulino di aña 2012 i 2013 dor di Binwak.com. Varios di su kantikanan na papiamentu i spaño, manera “Move Tur Montaña”, “Un Brasa So Mi Ke”, “Volare”, “Mover Todas Las Montañas” i No Soy Igual Que Ayer e logra puestonan haltu den e Top di Musika tantu na Korsou, Medellin Colombia komo riba website internashonal di Musica Cristiana. Shamiro a bishita algun dje Pais grandinan manera Hulanda, Nashville, Miami, New York i Colombia kaminda e la impakta tur ku a skucha su musika. Riba tereno Internashonal e ta hasi uso di kada oportunidat ku e haña di bai presenta, pa alabes promoviendo nos Dushi Korsou.
Esaki ta prueba ku Korsou tin hobennan potenshal ku por logra hopi, basta nan haña e edukashon, apoyo, amor, sosten i bendishon nesesario. Aktualmente Shamiro a produsi un album kompletamente na Spaño. Mientras e ta kabando su estudio di Master na Universidat di Korsou (UNA) e aña aki. Shamiro su meta ta pa sigui trese mensahenan positivo ku e palabra di Dios pa mas i mas hende pa medio di su musika. Su musika i bos uniko ta sigui impakta tur ku skuch’e kanta, kreando dushi ambiente di Pas i Bendishon. Su orashon ta Dios sigui yud’e pa e por sigui traha kantikanan ku lo krea pas, amor i bendishon pa tur esnan ku mester di esaki.
Djasabra 5 april Shamiro i su famia tabatin dòbel selebrashon, paso Shamiro wela Irena “Nena” Anita tambe a kumpli 73 aña. Un pabien grandi ta bai na Shamiro i su wela Nena. Dios bendishona Shamiro i su wela pa nan gosa hopi aña mas di bida i salu.
Hopi ta su Amigunan i fannan ku a manda palabranan di pabien pa Shamiro via Facebook bou di “shamiro anita” i tambe ta siguiendo tur su desaroyonan musikal i wak tur potret di su presentashonnan. Tur su CDnan ta bayendo hopi bon i ta optenibel na Koko Loko, Mensing, Tik Tak i Kas di Beibel.
Riba e potretnan por mira Shamiro durante un grabashon di su videoclip nobo na Cartagena Colombia.
Johnnyhabibe-Anchorman 