Gate Way Hub
ORANJESTAD – For di comienso di Gabinete Mike Eman I a cuminsa sondea e posibilidad y despues traha riba establecimento di un prestigioso scol di arte y diseño na Aruba, manera Rietveld Academie. Den continente Americano tin hopi interes pa tipo di estudionan aki, pero hopi biaha e distancia entre e continentenan ta hunga un rol grandi. Cu un academia prestigioso y respeta rond mundo ta establece su mes na Aruba ta trece cu ne un cooperacion win-win, tanto pa e scol, cu ta expande su mes, pero tambe pa Aruba, cu ta bira un hub pa e scol aki, perfectamente situa entre Europa y continente Americano. Leynan y exigencianan halto di Aruba, cu ta practicamente e mesunnan cu tin na Hulanda, ta percura pa e integridad y e nomber di e instituto.
Prome Minister Mike Eman, cu ta un di e motornan tras di e iniciativa aki, tabata presente fin di siman pasa na e tereno net dilanti di unda Rietveld Academie ta situa den Wilhelminastraat. Sr. Eman tabata eynan relaciona cu cuminsamento di e trabounan pa crea un parke publico net dilanti di e academia. “Nos ta hopi contento pa e prome paso di Rietveld Academie su cooperacion cu Aruba a wordo inicia awe hunto cu e prome studiantenan y tambe hunto cu Minister Plasterk di Hulanda cu ta e Minsiter encarga cu asutonan di Reino di Hulanda,” Prome Minister Eman a splica, “ta importante pa e Minister di Relacionnan den Reino experiencia e oportunidadnan cu e tipo di cooperacion, manera Aruba como un centro importante pa un Hub, pa locual ta trata institutonan di Europa y di Hulanda y cu esaki por funciona.”
Un gran cantidad di studiante na Aruba, pero tambe studiantenan internacional kier forma parti di un instituto manera Rietveld. Esaki ta pa motibo cu nan no tin nodo di bay te Hulanda y na Aruba mes nan por haci tur e preparacionnan pa nan por drenta den e academia. “Nos ta mira cu esaki ta desemboca tambe den Rietveld Academie completo na Aruba y cu esey Aruba ta haya un instituto mas for di e diferente institutonan for di Reino cu nos tin hopi interes pa establece nan mes Aruba,” Sr. Eman a splica y a enfatisa cu esaki ta, “haci realidad e funcion di Gateway y Hub cu Aruba ta asina interesa den dje.”
Sr. Eman a bisa tambe cu personalmente, pero tambe na nomber di henter Gabinete Mike Eman, “nos ta hopi contento cu e propietario di e edificio a dicidi di agrega na e edificio aki un parke pa e studiantenan por bay busca mas inspiracion, recrea y haci nan trabou den aire liber.”
E parke cu a wordo diseña pa un arkitecto renombra cu a duna hopi contexto tambe di Rietveld, di arte, di cultura, di libertad di arte den e diseño y den e arkitectura di e parke. E parke, agrega na e instituto cu tin aki y su dilanti un parke ta duna muestra di un instituto cu a cuminsa cu un infrastructura completo y creativo. E instituto sigur tin un bon futuro na Aruba y pa Aruba.
Johnnyhabibe-Anchorman 