Johnnyhabibe-Anchorman

Oranjestad-Minister Otmar Oduber a duna un declaracion relaciona cu e caso den corte pa loke ta trata permisonan di taxi, un lucha cu el a bin ta luchando durante 4 aña y mey.

El a bisa cu lamentablemente un veredicto practicamente definitivo a sali pa loke ta trata un bataya cu el a bin ta hiba pa mas o menos 4 aña y mey riba un decision cu tabatin di ex minister di Transporte, Sr. Eddie Briesen bou di gobernacion di MEP. E tempo ey, a duna 52 toezegging di taxi y firma un MB despues di a perde eleccion. 

Den medionan di comunicacion a mustra diferente biaha con cartanan tabata bay di Promer Minister Sr. Oduber pa Sr. Eddie Briesen caminda tabata bisa ‘yuda e nombernan aki pasobra esaki ta hendenan di MEP, ta hendenan di nos y nos mester yudanan promer cu bay cas’ siendo cu e tempo ey tabatin un moratorio cu tabata poni sin cu tabatin un estudio of algo cu a wordo haci pa wak si por amplia of no e 400 taxi. 

Den corte diferente biaha a duna veredicto, a bay bek, a bay den Hoge Beroep, a cumpli cu loke huez a bisa di bin cu MBnan nobo, cu motibonan nobo y a hustifica pa kico ta kere cu no ta corecto e toezeggingnan aki, fuera di e motibonan politico.

Mientras tanto Minister Oduber a percura pa un estudio wordo traha dor di Deloitte na 2011 y publica na 2012 cual a mustra den ki direccion mester bay. A base di esey a anuncia dos aña mas di moratorio riba taxi, es decir, esaki lo termina na 2015. Esaki ta demostra cu durante e 4 aña y mey di gobernacion di signatura berde, na ningun momento a duna un permiso di taxi adicional na e 400nan existente.

“Ayera lamentablemente un veredicto practicamente final a cay, pasobra e ta bisa cu practicamente no por move for di e decision aki cu a wordo tuma den e periodo di MEP dor di Sr. Briesen y cu mester otorga e taxivergunningnan aki na e personanan”, Minister Oduber a duna di conoce.

El a agrega cu a consulta cu abogado y conseheronan riba e punto aki, pasobra tin un moratorio vigente na e momentonan aki pa salvaguardia e 400 taxistanan te ora un Ritz Carlton habri su portanan, pero den e caso aki no a pensa cu Westin lo a cera su portanan pa 8-9 luna. Pesey pa 2015 ora Westin habri como un RIU hotel, adicional na Ritz Carlton y cambernan adicional cu lo tin, ta bira e momento pa evalua si ta habri of no e moratorio. Pa tal motibo a tuma e decision cu ta bay cumpli cu veredicto di huez cu mester otorga e vergunningnan aki, pero ta keda mara na e moratorio cu ta vigente te otro aña, na e momento ey lo cumpli cu veredicto di huez y lo conoce un ampliacion pa loke ta e cantidad di taxistanan na Aruba. 

Un total di 21 persona a bay corte pa haya nan permiso di taxi y riba esaki Minister Oduber a bisa cu lo haci un estudio di kendenan ta esnan cu ta warda pa hopi tempo y kico ta e cantidad cu ta verwacht a base di e rapport di Deloitte.