Work Shop
Oranjestad- Dialuna ultimo Bibliotheca Nacional Aruba, Departamento di Agricultura, Cria y Pesca hunto cu Bureau Inovatie a duna inicio na e di tercer Green Education Symposium, e aña aki hibando e topico “Sustenibilidad di produccion di cuminda”.
Durante e siman di 7 pa 11 di april alumno di scolnan selecta lo tuma parti na e grandioso symposio aki asina hayando informacion valioso riba diferente topiconan cu tin di haber cu sustenibilidad di produccion di cuminda y Agricultura.
Pa cu Green Education Symposium III alumno y maestronan a haya e oportunidad special pa tuma parti na diferente workshop presenta dor di diferente profecionalnan den e mundo di Agricultura local y internacional.
Riba e promer dia di e GES III workshops un grupo grandi di alumno y maestro tabata presente na Bibliotheca Nacional Aruba unda cu hunto cu Sr. Fredrick Stoss, Sr. Geert Kooistra y Sra. Petra Maas a presenta riba e topico di “Carbon Food Footprint” cual tema ta enfoca riba concientisacion cu e impacto cu cuminda tin pa cu mundo completo.
Cu e workshop aki Sr. Geert Kooistra y Sra. Petra Maas lo collecta potret y datos cual lo wordo usa pa crea un buki cu lo recaptula e GES III, mescos cu a wordo haci durante GES II na aña 2013.
Por a tuma nota di e enthusiasmo y interes cu e alumnonan a demostra na e promer workshop di GES III unda cu den grupo a dialoga, intercambia ideanan y hasta crea un wega divertido cu lo aporta na concientisacion di “Carbon Food Footprint”.
“BAN SOSTENE NOS CULTURA, PRACTICA CRIA, PESCA Y AGRICULTURA”
Johnnyhabibe-Anchorman 