Despa
Oranjestad-Departamento di Salud Publico Aruba (DESPA) ta tene tur aña campaña pa conscientisa pueblo riba e importancia pa elimina criadero di sangura di Dengue (Aedes aegypti). En conexion cu esaki e aña aki DESPA ta entregando na tur kleuter, lagereschool y scolnan pa enseñansa special un “Lespakket Dengue” renoba. E “lespakket Dengue” a wordo adapta, teniendo na cuenta e nivel di enseñansa di tur mucha. E “lespakket” ta contene un “lesbrief” cu informacion necesario pa docente y informacion en general di Dengue manera entre otro con bo por reconoce e sangura (Aedes aegypti) cu ta transmiti Dengue, con Dengue ta wordo transmiti y con bo por evita Dengue y criadero di sangura Aedes aegypti.
Tambe e ta contene diferente material manera entre otro un dvd informativo, buki Gino y e sangura di Dengue y ilustracionnan educativo pa diferente nivel di enseñansa. E prome “lespakket Dengue” a wordo entrega dialuna dia 7 di april riba dia Mundial di Salud na scol basico Kudawecha. Durante e siman cu ta bin Gele Koorts en Muskieten Bestrijding (GKMB) lo ta repartiendo e “lespakket Dengue” na tur otro scolnan di enseñansa preparatorio, basico y enseñansa special na Aruba.
Cu esaki DESPA ta spera di por aporta mas na e conocemento di e malesa Dengue cerca nos muchanan y asina promove e importancia di prevencion pa cu esaki. Pa mas informacion por tuma contacto cu Departamento di Salud Publico, telefon 522-4200 of cu GKMB na 585-3325.
Johnnyhabibe-Anchorman 