Gabinete Eman ta logra pone nos Pais bou curatela debi na e mal maneho financiero cu ta ser hiba

Posted: April 13, 2014 in Johnny Habibe

Oranjestad-

Xiomara Ruiz Maduro

Xiomara Ruiz Maduro

Oranjestad-For di basta aña caba nos a bin ta adverti Pueblo y Gabinete Emam cu e rumbo cu nos finanzas publico a tuma na man di Gabinete Eman no ta uno sostenibel y si nos sigi asina nos lo termina bou curatela di Hulanda. Nos a splica di e MEGADEBE y su consecuencia, pero hopi bou di un maipulacion fuerte a prefera di sera wowo y conforma nan mes cu e noticianan positivo den prensa. Pero awor e ora cero a yega. Nos Pais ta perde su autonomia financiero y mester pasa esaki over na Gobierno di Reino (lesa Hulanda) kende lo dicidi riba e cartera di nos Pueblo. Di e manera aki Gabinete Eman ta logra pone nos Pais bou curatela debi na e mal maneho financiero cu nan ta hibando.

Awor e realidad a toca na nos porta y ta manifesta su mes den e cantidad di medida cu Gabinete Eman ta introduciendo na nos Pais for di comienso di e aña aki. Asina bo ta haya e subida di prima di AOV, e subida di loonbelasting, cobransa pa recohe sushi, eigen bijdrage AZV di 3 florin pa remedi, cortamento den enseñansa, cortamento den onderstand y ainda falta mas na e lista largo di medida cu ta wordo prepara na e momento aki.

Tur e medidanan aki ta bin awor ya cu placa a caba cu Gabinete Eman y no por haya placa fia facilmente mas riba mercado internacional manera a bin ta haci e ultimo añanan. E cifranan di nos Pais no ta alentador pa niun inversionista y nan no ta dispuesto mas pa duna un interes pagabel pa nos Pais. Y mirando cu ya caba e gastonan di interes di nos Pais ta birando impagabel, nos no por permiti e luho di presta placa na e interes halto cu ta ser pedi. Fia suma grandi di placa na Aruba mes tampoco ta un opcion, ya cu asina Gabinete Eman lo “crowd out” e sistema financiero di nos Pais formalmente limitando cu Pueblo y negoshi por haya fianza pagabel stancando asina nos economia.

E unico salida pa Gabinete Eman awor ta haya e suma aki presta via Hulanda na un interes reduci. Pero e solucion aki tin condicionnan severo mara na dje. Hulanda no ta presta placa sin supervision di su mesun hendenan y sin tin hopi di bisa den e trahamento di presupuesto pa nos Pais. Pues condicionnan cu ta hala nos mesun organonan di conseho un banda y ta duna Parlamento di Aruba un brevet van onvermogen. Algo cu nos tabata sa di aña pasa caba ora cu Minister Eman a firma e Protocol di Diahuebs Santo na Hulanda.

Pues ta bisto cu e medidanan cu awe Gabinete Eman bou precion di Hulanda ta pasando riba lomba di Pueblo, ta nada mas cu e ehecucion di e Protocol di Diahuebs Santo pa asina por yega na placa pa por paga pa e deroche di placa di 4 aña di Gabinete Eman. Nos mester ta conciente di e hecho cu Hulanda no ta presta placa sin cu Ministernan Eman y Yrausquin demostra promer cu nan por tuma medida pa frena gasto y cobra Pueblo mas belasting. E curatela aki cu e perdida di nos autonomia financiero ta djies e comienso di kiko ainda falta pa bin pa nos, danki na e mal maneho financiero di Gabinete Mike Eman.

 

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s