Johnnyhabibe-Anchorman

ORANJESTAD – Green Education Symposium, organisa door di Biblioteca Nacional y diferente partner, a cera e simposio diabierna cu presentacion di Prome Minister Mike Eman. Diferente mandatario di Gabinete Mike Eman II a hiba palabra e siman aki pa pone e conexion entre maneho sostenibel y salubridad, p.e. of cu Santa Rosa su produccion. 

Prome Minister Eman a wordo presenta door di directora di BNA, Astrid Britten, kende tabatin elogio pa e maneho di Gobierno, cual maneho e institucion aki ta sigui tambe cu organisacion di Green Education Symposium.
E mandatario den su mensahe a elogia y a pidi e studiantenan un aplauso pa nan scol EPI, cu ta e prome instituto educativo cu tin un parke solar den nan cura. “EPI a pone e “trend” y a demostra cu e scol ta cana padilanti, ta mira e necesidad di tuma e direccion sostenibel. Pero tambe e sistema con educacion ta wordo duna awor na EPI ta cu e tema aki ta forma parti integral di educacion. Mi kier felicita tur esnan di EPI. Studiantenan, boso por ta orguyoso,” Eman a duna di conoce.
Ademas e tabatin palabranan di elogio tambe pa institutonan cu ta sigui e vision pa desaroya un Aruba sostenibel, manera Biblioteca Nacional “cu ta carga e vision aki cu pasion y tur dia ta yuda nos transmiti e mensahe aki”. Pero tambe IBISA cu a bin ta haciendo un bon trabou pa conscientisa e ciudadanonan riba un bida saludabel. Otro ehempel cu e mandatario a duna ta Santa Rosa cu un tempo tabata wordo considera algo for di moda pero “awe e ta un necesidad importante”. Si Aruba, e mandatario a bisa e hobennan, kier ta un pais sostenibel, esey ta nifica cu no solamente e coriente mester bini di fuentenan sostenibel manera biento y solo, pero tambe riba tereno di produccion di cuminda. Den esaki, Santa Rosa ta hunga un rol importante. Ta e deseo cu tur cas na Aruba tin un par di mata di berdura y fruta, of bestia, ya cu di e forma aki “ta bay percura cu Aruba ta mas sostenibel”. El a duna e ehempel di un scol cu a impresion’e masha hopi, cu ta e “school gardening” na EPB Sta. Cruz y ta spera cu otro scolnan por sigui e iniciativa aki.
Pa finalisa, e mandatario a bisa cu hopi di loke ta wordo haci riba tereno di sostenibilidad manera Happy Community Conference, Green Conference, ta iniciativanan di “Creative Team” cu a cuminsa cune den e prome Gabinete Mike Eman, pero tambe hopi programanan cu tin di haber cu bario. Esaki ta e motibo tambe cu awendia e Ministerio di Asuntonan General ta conta cu un oficina cu yama Buro Innovatie, cu a yuda den organisacion di e Green Education Symposium.
Di e forma aki e mandatario a ilustra con e pensamento pa un Aruba sostenibel a bin ta creciendo ultimo añanan.