Parlamento
Oranjestad-Diamars Parlamento a trata e Beloodsingverordening y mester bisa cu e tabata un reunion hopi positivo, e la bay den un hopi bon ambiente y unamimente a aproba e proyecto di ley aki.
Minister Otmar Oduber tabata hopi contento cu e desaroyo di e reunion publico y na final el a indica cu e ley a wordo acepta unanimemente mescos cu ta un amienda presenta pa fraccion di AVP. El a indica cu e amienda aki ta fortalece e ley ainda mas y a conta cu su sosten, mescos cu e resto di fraccionnan den Parlamento.
E ley cu a wordo trata ta uno cu no a wordo regla for di tempo cu Aruba a haya su Status Aparte manera por ehempel cierto reglanan cu mester tin pa loke ta trata barconan cu ta drenta y e parti di loods cu mester acompaña esaki.
E mandatario a comenta cu den corte te cu poco tempo pasa ainda tabatin un caso pa loke ta un daño cu tabatin riba un barco na momento cu e la drenta nos wafnan. Casonan asina por tin consecuencia di miyonnan pa nos isla, pero awor a traves di e ley aproba dor di Parlamento ta duna proteccion na Pais Aruba y tambe ta duna proteccion na esnan cu ta traha den e loods. Ta solamente ora constata cu tabatin mala fe of cu ta pa malo algo a wordo haci of nalatigheid lo por culpa of pone responsabilidad cerca esnan cu ta traha den loods.
Minister Otmar Oduber a indica cu e ta sumamente satisfecho cu e trabou cu a wordo haci pa Directie Scheepvaart mirando cu leynan sumamente importante a wordo pasa, leynan cu pa añanan largo a keda den lachi manera ta e caso di e Beloodsingverordening cu pa 27 aña no a pasa den Parlamento manera cu mester ta. Awor a pasa e ley aki cu ta trece trankilidad y proteccion pa nos pais.
Bolbiendo riba e tratamento, Minister Oduber a expresa cu Parlamento tabatin preguntanan sumamente al caso, sugerencianan pa cambionan cu tambe tabata sumamente importante. “Mi ta kere cu tur cu tur nos tin un producto di ley tremendo poni riba mesa cu ta na ventaha di loke ta trata e parti maritimo y e reglamentacion cu mester tin den nos awanan teritorial”.
Johnnyhabibe-Anchorman 