Oranjestad-
Fundacion Lanta Papiamento
Fundacion Lanta Papiamento (FLP) a mira luz cinco aña pasa na mei 2009. A lansa e Fundacion cu e meta fundamental pa conscientisa nos pueblo Arubiano den un sentido amplio tocante identidad y balor di Papiamento. Den su trayectoria cortico, pero consciente y dirigi riba e obhetivo ey, FLP a bin ta realisa un variedad di actividad educativo y cultural relaciona cu, entre otro, investigacion y presentacion linguistico y literario, evento literario, acto di homenahe y concurso di ortografia.
Fundacion Lanta Papiamento (FLP), manteniendo su dinamismo y e esfuersonan cu e ta desplegando pa medio di un serie di actividad continuo, y inspira na un manera particular pa nos Aña di Papiamento y pa su principio fundamental di promove conocemento di nos lenga nacional, aña pasa, dia 19 di october 2013, a organisa un les publico di Papiamento cu sosten financiero di UNOCA, un actividad linguistico educativo cu un caracter popular y didactico. E les tabata un exito rotundo, caminda cu e cursistanan a haya les di docente di Papiamento suficientemente cualifica y cu ta dispone di suficiente experiencia den dunamento di les di Papiamento. E demanda tabata asina grandi cu ainda tin hende riba lista di espera pa participa na un siguiente les. Debi na e tantisimo interes aki, FLP, atrobe cu sosten di UNOCA, lo ripiti e actividad linguistico educativo aki diasabra dia 3 di mei 2014 na Instituto Pedagogico Arubano (IPA) na San Nicolas.
E programa di e dia ey lo consisti atrobe di les di Papiamento pa tur persona interesa. E personanan aki mester ta persona cu nunca no a haya les di Papiamento ainda. E les mes lo contene dos materia: un les di gramatica y un les di ortografia. E programa di les tin ademas un prueba -o sea un serie di tarea- tocante e dos materianan duna. E lesnan ta na nivel elemental. Lo cera e programa cu dunamento di un certificado na tur e participantenan. Y atrobe e docentenan encarga cu e dunamento di les lo ta docente suficientemente califica y cu suficiente experiencia cu docencia di Papiamento. E idea tras di e les publico aki ta, fuera di promove conocemento di Papiamento, pa despues (yuda) organisa of promove organisacion di curso completo di Papiamento (na diferente nivel) pa nos comunidad. E programa lo brinda e participantenan tambe un lunch di cortesia y e lesnan mes tambe lo ta completamente gratis.
Fundacion Lanta Papiamento cortesmente kier invita tur persona interesa pa cera conoci cu e dos aspectonan menciona -gramatical y ortografico- di Papiamento, pa inscribi via e-mail na ramontodd@setarnet.aw pa mas tarda dia 24 di april pa nan por participa na e Les Publico di Papiamento. FLP encarecidamente ta pidi tur persona cu a inscribi aña pasa y NO a haya chens di participa pa inscribi di nobo notificando esey. Henter e programa di Les di Papiamento lo tuma luga na Instituto Pedagogico Arubano (IPA) na San Nicolas, diasabra dia 3 di mei 2014, entre 10 or di mainta y 3 or di atardi. Esnan cu inscribi y wordo acepta lo ricibi via e-mail un programa di e dia. Fundacion Lanta Papiamento di antemano kier gradici tur interesado!
Johnnyhabibe-Anchorman 