Johnnyhabibe-Anchorman

Xiomara Ruiz Maduro

Oranjestad-Den e dianan aki hopi ta esnan cu ta traha den e aparato publico cu a recibi nan carta di retiro bisando cu no lo prolonga nan contracto mas cu Gobierno di Aruba. E medida aki a bin despues cu a bira bisto cu no tin placa pa por paga tur e trahadornan nobo cu Gabinete Eman a hinca den e aparato publico. Minister Yrausquin a cuminsa cu e racha di kita hende for di trabou na Belastingsdienst y na Douane, siendo cu na otro departamentonan di Gobierno carta a yega pa e diesthoofden reduci e cantidad di contractant cu 50%. Locual cu hopi a comenta ta e hecho cu Minister Eman mes kende ta e promer yama pa reduci gasto mester a duna ehempel y reduci su gabinete di 9 pa 7 minister.

E ta conoci cu Gabinete Eman II a tarda pa wordo forma debi cu mester a busca un forma pa por a cumpli cu tur promesa cu a ser haci den campania electoral. Asina mester a cumpli cu e promesa pa banda di e 7 Ministernan di Gabinete Eman I, nombra sr. Croes y sr. Yrausquin tambe como Minister den e gabinete nobo. Di e manera aki Gabinete Eman a pone e promer medida riba lomba di Pueblo ya cu mas Minister ta significa mas gasto pa Gobierno y mas gasto pa Pueblo cubri.

Awor cu placa a bolbe caba cu Gabinete Eman y cu no por fia placa asina facil mas riba mercado internacional, Gabinete Eman a haye ta reduci gasto y pasa medida riba lomba di Pueblo. Esaki ta algun di e condicionnan cu Hulanda a pone pa Aruba por haya placa fia via Hulanda. Presta placa via Hulanda ta e unico salida cu ta keda nos Pais pa nos no haya bati bancarota y nos florin perde su balor. Pesey bou di e ansha aki pa cumpli cu condicionannan cu Hulanda a impone, Gabinete Eman a cuminsa na kita grupo grandi di persona for di trabou y pasa medida pa loco riba e Pueblo di Aruba.

Ta remarcabel con keto Minister Eman a keda riba locual ta pasando na nos Pais. Vooral si nos tene na cuenta cu den eleccion na hopi ocacion Minister Eman tabata bisa cu no lo pasa medida y awor medida ta yobe riba lomba di Pueblo y riba dje ta kita hende di trabou. Di Minister Eman nos a spera cu elo a duna un mihor ehempel door di cuminza reduci e gastonanan di su gabinete promer door di cuminsa pa reduci e cantidad di Minister di 9 pa 7. Pero ta bisto cu Minister Eman ta prefera di keda keto y laga Minister Yrausquin haci e trabou sushi di pasa machete den e aparato publico, sin cu e mes ta move un dede of bisa algo.

Si Minister Eman di berdad ta stima e Pueblo aki manera cu e ta pretende ora di braza y sunchi hende, anto elo mester duna ehempel y reduci su gabinete di 9 pa 7 Minister, promer cu e castiga e Pueblo aki cu retiro di trabou y medida pa loco.