Johnnyhabibe-Anchorman

 

Oranjesatad-

 Durante e campeonato nacional mas importante di Merca den e deporte di landamento sincroniza, cu a tuma lugar na e ciudad Oro Valley, Arizona, dos atleta di Aruba a logra bai cu e titulo máximo: medayanan di oro pa Anouk Eman y Kyra Hoevertsz! Anouk Eman a gana oro den e evento di dueto técnico den e categoría “senior”, mientras cu Kyra a logra dos medaya di oro den e categoría “junior”, tanto den evento equipo, como pa e equipo combo.   

 

Tur atleta den e deporte di synchro ta prepara henter aña pa e evento aki, cu ta e culminación di lunanan di entrenamento intensivo. Solamente e mihornan ta participa na e campeonato nacional. Pa medio di campeonatonan clasificatorio cu ta tuma lugar prome, cada atleta mester logra e derecho di participa na e Campeonato Nacional, yama oficialmente e “U.S. National Synchronized Swimming Championships”. 

Manera ta conoci, Aruba tin dos atleta di nivel halto den e deporte di landamento sincronisa cu ta biba, studie y entrena na Merca y cu durante e aña escolar ta competi pa nan Universidad of Club.

Anouk Eman ta entrena y compiti cu e equipo di Lindenwood University pa 4 aña caba. Na 2013 Anouk y su compañera di dueto a marca historia, ganando pa prome biaha a gana e medaya di oro durante e Campeonato Nacional. E aña aki, Anouk a ripiti e titulo máximo aki y a titulo di Campeon Nacional di Merca den e evento di Dueto Tecnico. Hunto cu e atleta Mary Killman, Anouk a interpreta un tremendo dueto riba un mix di musica Caribense y cu nan a yama “Aruban Fiesta”. E publico a guste y e jueznan tambe, dunando nan e puntuación mas halto di e competencia!

Kyra Hoevertsz a participa cu su club “Walnut Creek Aquanuts” den e categoria Juniors. Kyra mester a competi prome den e parti tecnico esta e “figuranan tecnico”, caminda e mester a enfrenta no menos cu 168 otro competidor. Na final Kyra a termina na di 8 lugar, pa cua ela ricibi un ribbon. 

Kyra su siguiente evento tabata e equipo, hunto cu 7 otro compañera di su club. E equipo di Walnut Creek Aquanuts a drenta e ronda final na segundo lugar, net tras di nan eterno rivalnan di Santa Claa Aquamaids, pero den e finalnan nan a presenta nan rutina asina bon, cu nan a sa di logra puntuacionnan mas halto, terminando pues na prome lugar y ganando e medaya di oro! 

Pa Kyra tabata tin mas evento riba e programa. Riba e ultimo dia di e competencia, Kyra a participa den e evento “Combo”, cu ta un rutina masha creativo cu ta combina tur e eventonan di e deporte den uno. Solo, dueto, y tur landador hunto den varios combinación ta hasi e equipo “combo” hopi gusta pa publico. Ta landa e equipo “combo” cu 10 atleta, pero tin hopi libertad den e coreografia. Cu un rutina cu a expresa “aliens”, e equipo di Walnut Creek a logra sali na promer lugar, ganando asina otro medaya mas di oro pa Kyra.

Mirando atras AZB ta hopi orguyoso di e dos atletanan di Aruba cu den e grandinan di Merca ta logra gana medayanan di oro!

Pa Kyra y Anouk e temporada escolar y pa nan club na Merca a termina y awor nan ta bai prepara nan mes pa bai landa un dueto hunto, pa representa Aruba na competencianan internacional. Na luna di Juni nan lo participa na e campeonato “Swiss Open” na Montreux, Suisa. Despues, na luna di juli, nan lo participa na e “U.S. Open”, na Nevada, Merca y na luna di augustus nan lo participa na e “UANA/Pan American Championships”, cu lo tuma lugar na Riverside, California, Merca. Tur e competencianan aki ta pa prepara e dueto di Anouk y Kyra pa e Weganan Centro Americano y del Caribe, cu lo tuma lugar na Veracruz, Mexico, na luna di November 2014. Eynan Anouk y Kyra mester busca nan clasificacion pa por participa na e Weganan Panamericano di 2015, cu ta bai tuma lugar na Toronto, Canada.

Hopi exito na Anouk y Kyra y un palabra di pabien pa e resultadonan cu nan a logra.