MINISTER SCHWENGLE ATROBE CU ATAKE CONTRA PUEBLO, PERO AWOR CONTRA NOS GRANDINAN!!!

Posted: April 29, 2014 in Noticiero 94

 

Oranjestad-Den medionan di comunicacion e minister di Salubridad atrobe ta demostra su “rabia” contra esnan cu ta preocupa pa cu nan obligacion como dirigente responsabel manera sr. Rokebrand di SABA, y tambe su falta di interes pa cu nos Grandinan cu ta interna den SABA.

E minister ta remarca cu ta parce cu tin hende cu ta hasi mas politica cu su mes persona, manera sr. Rokebrand y e hunta di supervicion di SABA. Enbes di yega serca dje, nan a prefera di acerca media.
Si mi memoria no ta fayami, minister Schwengle a bishita SABA prome cu eleccion, y ela indica cu ela wordo informa detayadamente kiko e “dolornan” ta cu SABA ta pasa aden, y ela hasi e promesa di yuda e instituto aki asina e bira minister.
E storia no ta caba aki pasobra ela bishita SABA despues tambe como minister. Ta kiko el a bay hasi anto durante su bishita na e instituto aki? Nos sa cu e ta “mediageil”, pasobra constantemente e ta den prensa ta hasi declaracion cu pa colmo no ta al caso tampoco. E modus operandi di e minister aki ta birando mas cla: sconde su falta di experiencia, no cumpli cu promesa hasi durante elecion, pero mas pio ainda ta, cu e ta sigui tira culpa riba pueblo manera awor aki contra SABA cu no a acerke mas prome, y awor te hasta e ta saca su gal contra nos Grandinan.

Pa cuminza, e director di SABA no ta mete den politica, pero den mi concepto simplemente a demostra su obligacion pa ta transparente y responsabel pa cu e maneho cu e ta hiba. Pero tambe e ta un muestra di “machteloosheid”, pasobra abo como minister no a scucha nan pena, y si algo bay “fout” lo bo ta e prome pa culpa e directiva di e instituto.

Den e mes articulo bo ta hasi mencion cu solidaridad ta caba un caminda y cu cada ciudadano mester bira responsabel pa atende e gastonan cu su viehes lo trece cune.
E minister kiermeen cu e personanan cu no tin edad ainda pa pensioen, mester cuminsa spaar??

Aki mi tin un paar di remarke pa e minister:
1. e minister por bisa nos cuanto e gastonan, por ehempel pa por wordo admiti na SABA, lo ta aki 5 of 10 anja, y cuanto lo ta e suma minimo cu mester spaar ?
2. e minister por splica nos con lo nos mester spaar awor aki e suma ey, pasobra un cantidad grandi di nos pueblo ta gana minimumloon of no ta keda cu placa mes pa por spaar drechi?
3. e minister por splica nos cuanto lo keda den nos cartera pa spaar despues di e tanto medidanan cu su gobierno ta tumando contra nos pueblo?
4. E minister por splica por ehempel con e trahador di hospital lo por spaar despues cu e baha cu pensioen, na unda e ta ricibi un miserabel pensioen, particularmente ora nos compara esaki cu den regio?

Pa finalisa e minister ta laga sa cu medidanan cu su gobierno tin di hasi, ta pa recupera e stabilidad financier, pero cu nos Grandinan no mester bira victima y cu e medida mester wordo revoca. Pero minister, bo no tabata sa esaki for di un principio caba? E minister di finansas a laga sa cu cada ministerio mester a baha gasto. Ta kende a hasi e “huiswerk” aki p’e anto? No ta abo mes a haci esaki? Ta kende bo ta culpando awor anto: e minister di finansas?
Esaki ta e manera cu e ministernan ta atende cu otro den e gabinete di Mike Eman 2?

Si e minister aki kier baha gasto, anto pakiko mester paga companianan di PR asina hopi plaka? Por hasi uso di BUVO toch!
Si ta e compania di PR ta dune conseho kiko pa bisa, mi mester bisa cu ta un super mal trabow nan ta hasiendo y pueblo tin cu paga!

Minister Schwengle, cada bes cu bo papia bo ta demonstra bo ignorancia y bo cobardia.
Te ki dia nos pueblo mester sigui acepta e falta di maneho aki, no solamente di e minister di salubridad, pero di henter e gabinete di Mike Eman.
By the way Minister Schwengle, ainda mi ta warda contesta riba mi preguntanan.
Awor un mas, bo tambe ta haya parti di e bolo di 42.000.000,= florin (42MIYON) cu nos pueblo lo mester bai paga extra?  Si bo scohe voluntariamente pa keda keto un biaha mas, mi mester saca mi conclusion: ” wie zwijgt, stemt toe”!
Ta un pueblo so por salba un pueblo!
Y manera sr. Betico Croes d.f.m. semper ta bisa: “VOX POPULI, VOX DEI!!”

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s