Johnnyhabibe-Anchorman

Oranjestad-Director di Departamento di Cultura, despues di a finaliza e rondanan consultativo cu tur e stakeholders cu Cultura, a comenta cu nan ta bezig ta analizando tur e puntonan cu a bin dilanti y asina incorpora esakinan den e maneho integral di cultura cu lo wordo presenta na e Cumbre di Cultura cu lo tuma lugar durante e promer siman di juni.

El a indica cu na Departamento di Cultura nan ta analizando tur e input ricibi di e stakeholders y ta bay presentanan como direccion den e maneho integral di cultura cu lo ta pa 2014 te cu 2017.
Director di Departamento di Cultura comentando riba algun di e resultadonan cu a bin dilanti for di e rondanan, a indica cu stakeholders cu a atende e rondanan consultativo ta kere tambe cu e parti di herencia cultural, e parti di arte y educacion di arte na scol mester haya hopi atencion di Gobierno. E ta bisa cu ta hopi importante pa involucra muchanan for di chikito cu e parti di herencia cultural, historia di Aruba y tambe e parti di nos herencia tangibel (edificionan y monumentonan) y intangibel (idioma, folklore, norma y balornan).
Lo cual cu a bin dilanti ta cu mester investiga mas y documenta mihor pa esakinan por wordo procesa den material cu por bin bek na scolnan. “Nos sa cu curriculum di Departamento di Enseñansa ta bezig cu diferente programa, desaroyando material pa scolnan cu ta pone e contexto Arubiano mas den luz. Esey ta bon, pero mester di mas atencion y esey ta lo cual cu gremio cultural ta bisando”, Siegfried Dumfries ta duna di conoce.
E ta agrega cu a trata di 13 rondanan sumamente intensivo, pero cu a yega na un input cu ta di gran balor pa Pais Aruba. Un di e puntonan di interes cu a bin dilanti segun Director ta cu Departamento di Cultura hunto cu Departamento di Enseñansa mester pone mas atencion pa por dune un forma pa e material por wordo investiga, documenta y traha y asina trece na scolnan.
Un otro aspecto cu a haya hopi atencion durante e rondanan ta e parti di idioma. Sr. Dumfries ta indica cu cientificamente a wordo comproba cu ora cu un mucha/hoben domina su idioma materno mihor, ta bira un poco mas facil pa adapta su mes pa siña un otro idioma.
Sr. Dumfries duna di conoce cu pa Departamento di Cultura como deparamento di maneho, investigacion y documentacion e informacion cu a bin dilanti durante e rondanan ta hopi importante y cu lo bay traha conhuntamente cu Departamento di Enseñansa riba e puntonan aki pa yega na un plan di accion. Nan lo usa e informacion aki y traha algo cu tin un balor agrega pa nos cultura, pa nos herencia cultural, pa nos hobennan y pa nos educacion. Es decir, e parti di maneho ta bay haya mas atencion, mescos cu e parti di investigacion y documentacion yegando na un maneho dinamico.