Archive for April, 2014

 

Xiomara Ruiz Maduro Mep

Xiomara Ruiz Maduro Mep

Oranjestad-E siman tras di lomba e compania di rating Standard and Poors (S&P) tabata na Aruba y nos haya chens pa sinta cu nan na mesa pa asina papia riba e situacion pesimo cu nos finanzas publico ta aden na man di Gabinete Eman. Un cita cu no tabata facil pa haya ya cu nos Minister di Finanzas a indica cu e biaha aki S&P no lo sinta cu opocicion. Pero asina mes nos a logra reuni cu S&P ya cu ora bo tin bo Pais su interes na pecho tur porta ta habri pa bo.

E ta conoci cu tur aña e compania S&P den luna di april ta bishita nos pa asina haci su evaluacion di e situacion financiero y economico di nos Pais y ta trece su opinion dilanti den un rapport cu ta keda publica na juni. Aña pasa caba Gabinete Eman a logra degrada e rating cu S&P ta duna nos Pais di un A pa un BBB y e biaha aki nos mester tene nos curazon pa e rating aki no wordo degrada mas, como cu Gabinete Eman a keda fiesta cu placa di Pueblo trahando mas debe riba nos cabes.

Mester remarca cu e ehecutivonan di S&P ta masha sceptico riba e plan di Gabinete Eman pa drecha nos finanzas publico, como cu nan ta mira cu kier baha gasto, pero Gobierno no ta haci nada pa aumenta entrada. Pa termino mediano nan ta kere cu e bahamento di gasto lo por yuda un tiki, pero pa termino largo nan ta premira cu si Gobierno sigi e rumbo cu e ta den, nos Pais lo wordo degrada aun mas cu e consecuencia cu inversionista no lo tuma nos na serio mas of lo presta nos placa na un interes cu nos no por paga mas.

E rating di S&P ta importante no solamente pa inversionista pero tambe pa Hulanda ya cu Hulanda ta duna ok pa Aruba fia placa riba mercado internacional despues di tira bista riba entre otro e rapport di S&P. Mester indica cu na juni awor despues cu e presupuesto di nos Pais keda aproba, Pais Aruba atrobe lo mester bay fia placa extra riba mercado internacional y e rapport di S&P cu awor ta wordo produci lo tin un effecto grandi riba e decicion cu Hulanda lo tuma.

Ta keda nos awor pa warda riba e resultado di e evaluacion di nos Pias door di S&P cu lo keda publica na juni cu e speransa cu nos Pais no lo wordo degrada mas cu locual Gabinete Eman a hacie caba. Ta di spera tambe di no tende ni Minister Eman, ni Minister de Meza y ni Minister Yrausquin bin bisa cu ta opocicion di MEP su culpa cu cos no ta bon. Pasobra e unico personanan responsabel pa e dania nos finanzas publico y cu esaki dania nos rating ta e ministernan menciona di Gabinete Eman.

YARDSALE KINGSDAY

YARDSALE KINGSDAY

Oranjestad-Diasabra dia 26 di April 2014 ta dia di Rey y e aña aki pa prome biaha e team di Rancho Monte Azul  ta organisa un Trendy Luxery Fasion Fundraising Yardsale. Mescos na Hulanda cu ta conosi pa organisa ‘Vrijmarkt’ riba e aña di la reina (sigiendo riba dia di Rey awo), e team di Rancho Monte Azul a opta pa organisa esaki y no bende solamente fashion items nobo pero tambe items segundo mano cu ta manera nobo.
Lo bay tin paña pa tur edad, di baby te cu adulto di hende homber y hende mohe.    E variacion di articulonnan lo ta grandi, di paña casual te shimis di gala. Tin tas, sapato, accessorios, articulonan di cas y hopi mas cuminsando for di Awg. 5,00 so bay ariba.
E Kingsday Yardsale aki ta tuma luga na e caminda grandi di Paradera, diagonaal di Hong Kong Supermarket. Pasa libremente entre 10.00 di mainta y 4.00 di atardi. E contribucion ta pa e team di “Rancho Monte Azul” por participa na e di 10 Mundial di Jinetes y Amazonas Paso Fino na juli 2014 representando Aruba internacionalmente. Pa mas informacion por yama 5949678 of 5689960.

 

Willemstad – Invitadonan i miembronan di kuerpo konsular di Kòrsou a selebrá

djaweps anochi na Sta. Barbara Resort e di 70 aniversario di e organisashon.

E anochi a kuminsá ku palabranan di sekretario di Kuerpo Konsular Kòrsou

Kathryn Pruneti kende a representá dekano di e kuerpo Helga Mensing kende no

por tabata presente debí na malesa di un famia.

Kuerpo Konsular Kòrsou a keda fundá dia 22 di aprel 1944, riba petishon di

honorabel gobernadó di Kòrsou Doctor Piet Kasteel. Meta tabata pa fasilitá i

mehorá koperashon entre gobièrnu di Kòrsou i e komunidat di kònsùlnan

akreditá i tambe pa e relashon entre e kònsùlnan mes.

Kathryn Pruneti a bisa di ta orguyoso ku e kuerpo konsular pasando dor di

tantu kambio i reto polítiko, ekonómiko i sosial a kumpli ku su meta i di

por tabata un faktor positivo pa un mihó Kòrsou, su hendenan i paisnan

representá.

‘Awe, selebrando e aniversario di platina, mi ta hasi uso di e oportunidat

pa gradisí gobièrnunan insular di Kòrsou i tambe gobièrnunan sentral, pa e

sosten durante di último 7 dékada i mi ta spera sinseramente ku e koperashon

mutuamente benefisioso lo kontinuá den dékadanan benidero’.

A duna tambe atenshon spesial i un rekonosementu na Dr. Paul Ackerman,

kònsùl honorario di Israel i Antony Owers, eks kònsùl honorario pa Gran

Bretaña i Irlanda Nort pa nan kontribushon valioso na Kuerpo Konsular

Kòrsou.

Dr. Paul Ackerman a keda apuntá komo kònsùl na 1984 i e tabata den diferente

funshon den direktiva di Kuerpo Konsular Kòrsou inkluyendo komo dekano di

2005 pa 2007.

Antony Owers tabata kònsùl honorario pa Gran Bretaña i Irlanda Nort di 1997

pa 2013 i e tabata tambe tesorero den e direktiva.

Esnan presente a gosa despues di un konsierto di selebrashon spesial na

enkargo di Wim Statius Muller i Grupo Serenada i nan a eksperensiá un

tremendo entretenamentu musikal.

Dekano Helga Mensing tambe a manda un gradisimentu pa tur ku durante di

añanan a kontribuí i sostené Kuerpo Konsular Kòrsou.

Riba e potrètnan  por mira momentunan durante di selebrashon di e di 70

aniversario di Kuerpo Konsular Kòrsou.

 

Ministro Oduber

Ministro Oduber

Oranjestad-Diahuebs mainta Minister Otmar Oduber a sinta cu e diferente companianan cu ta representa nos isla na Merca pa asina analiza e inversionnan cu ta haciendo pa loke ta trata mercadeo na Merca.
E mandatario a indica cu a invita tur e partnernan, den e caso aki tur e companianan cu cual Aruba tin un contract cu nan pa haci publicidad, relacionnan publico y mercadeo digital pa analiza si tur e fondonan cu ta invirtiendo na e momentonan aki ta hayando e mihor ‘return on investment’.
Tambe e encuentro tabata pa analiza hopi di e cambionan den strategia cu a implementa. “A pesar cu tin 3 pa 4 aña cu nos ta bayendo den un crecemento continuo aña tras di otro, semper ta bon pa analiza. Tin hopi trabou cu nos a cuminsa na 2012 y cu 2013 a conoce frutonan. Un di nan ta e presentacion cu nos a caba di haya cu un compania cu nos a adkiri nan ta analiza tur e carchinan cu turistanan ta yena y awor aki mas di 9 miyon for di final di 2012 te awor aki a wordo digitaliza.

Awor nos por wak precies di unda e hendenan ta bin, cuanto nan ta keda, unda nan tabay…Nos ta haciendo un mercadeo directo cu e grupo aki y den e ultimo 6 pa 7 lunanan nos a manda 2.7 miyon e-mails pa diferente persona y e respuesta riba dje ta hopi positivo. Antes 17% tabata reacciona ora ATA tabata manda un e-mail pa e grupo, awendia e la bira 70%”, Minister Otmar Oduber a duna di conoce.
E ta agrega cu ta haciendo uso di un database cu nos tabatin pa hopi aña, pero cu lamentablemente no tabata analiza e datonan ni hincanan structuralmente pa haci uso di nan pa haya sa exactamente unda mester bay, unda ta haya e clientela cu tin un entrada halto pa aña. Tambe Minister Oduber a indica cu ta enfoca riba e categoria di entrada cu ta riba 100 mil Dollar pa aña. “Awor aki cu nos tin e data base cla desde aña pasa, e cambionan den strategia lo bay ta cla e aña aki pa Merca”.
Den e cuadro aki Minister di Turismo a bisa cu por a mira den e ultimo 15 pa 17 luna un aumento substancial for di Merca y awor lo ta bay ta mas preciso y concreto riba e partinan den Merca caminda mester haci algun tipo di esfuerzo pa por logra un turismo cu no solamente ta crece, pero ta crece dirigi, es decir, den nos caso, e turistanan cu ta gasta mas una bes nan yega Aruba.
E database crea aki ta bay tin hopi influencia no solamente pa e propaganda cu ta wordo haci, pero tambe pa e relacionnan publico cu ta wordo haci, pa e parti di mercadeo digital, cu otro palabra, henter e strategia di loke Aruba ta haci ta bay tin un direccion nobo a base di e database.
Minister Oduber a expresa cu su cuestionamento ta keda si ta invirtiendo e placa corectamente, cu si ta hayando e maximo pa e placa inverti, pero cu despues di e presentacionnan di diahuebs mainta e ta reconoce cu ATA a haci un tremendo trabou cu e companianan y partnernan na Merca. Awor cu e datonan adicional, tur e partnernan por cambia nan strategia y redirigi placa pa inversion logrando un ‘return on investment’mas grandi ainda.
Cu e cambio y avancenan aki ta duna mas forza na logra e meta estableci pa den e proximo 4 añanan aumenta e cantidad di placa cu turistanan ta gasta na Aruba y no crece asina hopi den cantidad di hende.

comision seyo nacional comision seyo nacional

Oranjestad-Diaranson Minister Otmar Oduber a haya un presentacion di e Comision Seyo Nacional pa Artesania cu ta wordo maneha pa Departamento di Cultura (DCA). E comision aki tin e certificacion oficial di Gobierno di Aruba Seyo Nacional pa Artesania.
Mester bisa cu e preparacion pa Seyo Nacional a cuminsa na 2010 pa medio di un investigacion y documentacion pa haci esaki posibel. Un comision a wordo crea cu ta consisti di diferente stakeholder importante pa por a logra e exito di Seyo. DCA como encarga di e proyecto bou guia di Vicky Arens ta prepara y promove artesanonan pa participa y pa forma parti di e proyecto aki cu tin metanan grandi su dilanti.
Durante e presentacion Vicky a mustra e importancia cada bes mas grandi cu productonan local y nan proceso di realizacion ta hayando rond mundo y con mas y mas bishitante ta pidi pa e artefactonan localmente produci. Tambe el a presenta con tin peticionnan pa un centro cu ta promove, stimula y engrandece atesania y artesanonan.
Den e cuadro aki a presenta diferente plannan y a discuti hunto cu Minister Oduber riba diferente proyectonan y posibilidadnan cu tin pa engrandece e industria di artesania mas ainda den diferente parti di nos isla, teniendo semper na cuenta e importancia di ta produccionnan local y tambe habriendo e portanan pa exportacion di nos propio artesanianan.
Mirando e importancia cu Minister Otmar Oduber y Gabinete Mike Eman den su totalidad ta dunando na San Nicolas, caminda kier haci di dje e di dos capital turistico di Aruba, poniendo enfasis riba e aspecto cultural, diferente sugerencia y ideanan a wordo intercambia pa incorpora e parti importante aki di nos cultura, manera ta artesania den e desaroyo di pariba di nos isla.
Minister Otmar Oduber a keda hopi satisfecho cu e reunion/ presentacion y a mustra cu e ta sostene e plan y proyectonan di Seyo.

ORANJESTAD, Aruba 23 di April 2014: E Proyecto Auto-Estima Aruba ta conoci como e scol di self-esteem na Aruba, hibando dilanti e enseñanzanan di e conocido maestro Bob Mandel, creador di e Proyecto Internacional di Auto-Estima.
Bob Mandel ta un mericano y un experto riba tereno di motivacion y superacion personal. E ta un conferencista reconoci rond mundo y pionero den e terapia di “rebirthing” (renacimento).
E seminarionan di Mandel tabata un inspiracion pa asina crea na nos isla e Proyecto Auto-Estima Aruba, originalmente funda door di Sra. Lucy Arends (dfm).
Despues di a sigui un trayecto cu a inicia na cuminzamento di aña, e prome asociadonan di ELKA & Associates cu a sigui e programa intensivo a haya nan certificado pa loke ta e prome modulo.
Diesdos persona a cuminsa cual na final 5 a logra pasa pa e siguiente modulo di estudio. E programa ta un compromiso cu bo mes pa mehora bo mes den tur aspecto, asina Abigael Arends, Directora di ELKA & Associates a duna di conoce.
“Mi ta orguyoso di esnan cu a logra pasa e prome modulo ya cu tabata un par di luna basta intensivo y sigur no tabata facil. Bo ta haya bo den momentonan cu ta great, pero tambe cu momentonan cu berdaderamente bo ta topa cu bo mes y pa traha riba bo mes y logra transforma bo mes pa un mihor persona y siña para duro den bo zapatonan, cual pa tur persona ta diferente”, el a bisa.

 

Modulo 1

Modulo 1

Oranjestad-Pa por ta un lider bo mester por ta un persona cu ta traha riba bo mesun bida pa bo por ta ehempel pa asina guia otro y no ta egoista cu informacion cu wordo intercambia di su mesun bida y asina por yuda otro, Arends a expresa.
E Proyecto Auto-Estima Aruba lo sigui su trayecto den e lunanan aki caminda lo enfoca riba diferente areanan pa asina na final, e asociadonan haya nan diploma como Asistentenan di e proyecto.
E trayecto pa yega na un certificacion ta di un promedio di dos aña intensivo, incluyendo e parti pa ta un lider. Abigael Arends ta un persona certifica pa duna e lesnan aki y ta combina e lesnan cu e parti di conocimento y experiencia, cual ta hopi importante pa yega na e certificacion.
Esnan interesa den e proyecto aki por contacta Abigael Arends atravez di info@elka-aruba.com.

Oranjestad-Willemstad-Trabou nan pa Curaçao Drag Fest 2014 ta full den swing kaminda FAC y su Komishon Organisadó ta bai presentá na fanátiko, koredor y públiko di e deporte di drag race pa e fecha nan 29 y 30 di aprel y 1, 2 y 3 mei próksimo ku un kompetensia di drag race internashonal ku paisnan i isla nan nobo den e deporte di drag na Curaçao International Raceway na Ronde Klip.

Djasabra último den ora nan di mainta e outo nan di Aruba a load ku ta “Arends Racing” ku 1 dragster i un Altered. “Don’t Panic Racing” ku 2 dragster y un Ford Mustang. “Barnol Racing” ku nan Ford Mustang, “RJ Racing” ku 2 Ford Mustang, “Leo’s Racing Locura di Viejez” dragster, “Hulk Racing” ku Chevy Barretta, “Hubble Bubble” ku Chevy Corvette, “Rosel Racing” ku Altered y “Don Flip Racing” ku nan Roadster. Tambe P-Nuts Racing lo tei ku 6 motosaikel.

Djadumingu último ei a kontinuá ku e keintura Curaçao International Drag Fest 2014 ku e super parada ku a sali mainta 10’or for di parkeerplaats di MCB Saliña bai kore full Banda Ariba bin bek y para na Nieuwe Haven n’e kantor di Duana pa un break. Djis dje a kue kabes abou bai kore rònt Banda Bou ku un stòp na Santa Cruz. Despues di un bon sosiegu a kue kabes pa ariba i terminá na parkeerplaats di MCB Saliña.

Djaweps awor 24 di aprel tin inskripshon na Topaz Center dilanti di Frank Curiel Ballpark na Juan Hato for di 20:00 (8’or) te ku 22.00 (10’or).

Djasabra i djadumingu tin inspekshon tékniko na Curaçao Internatinal Raceway na Ronde Klip. 

Ta kuminsá for di 9’or di mainta. Djadumingu lo tin oportunidat pa hasi tèst kuminsando for di 17.00 (5’or) te ku 22.00 (10’or).

Djamars 29 di aprel tur kos ta ranka sali na Brionplein ku e Mega Car & Bike Show. Sigui ku na Curaçao International Raceway djarason 30 di aprel ku sekshon di Tèst & Tune. Y djaweps promé, djabièrnè 2 y djasabra 3 di mei ta e Festival y kompetensia mas grandi di drag racing den Caribe.

Ku partisipashon di Hulanda despues di 10 aña, Santo Domingo pa promé biaha, Merka, Venezuela, St. Eustatius, Boneiru i ku e rivalidat nan di tur tempu entre Aruba i Kòrsou.

Chek den prensa pa e pakete nan di entrada i tambe pakete nan spesial di Fun Miles.

Danki na tur e spònser nan ku ta hasi Drag Fest 2014 posibel ku ta CTB ofisina di Turismo di Kòrsou, Curoil, NAPA Auto & Truck Parts, Alcolado Glacial, Gomez Shipping, AVF Antiliaanse Verf Fabriek, Coca Cola, Apache Heavy Equipment, Hucor Holding ku Subway, Pizza Hut y KFC, Medina Cargo Services, Western Trading y Dunlop Tires, Fun Miles. 

 

 

Xiomara Ruiz Maduro

Xiomara Ruiz Maduro

Oranjestad-Siman pasa na momento cu un cantidad di contractant di Gobierno tabata haya e noticia di nan retiro, Minister Eman tabata brindando incentivo di solidaridad na su hendenan pa nan no perde trabou. Aki ta na unda e otro empleadonan di Gobierno cu a keda 100% sin trabou ta puntra nan mes, ta cu cuanto midi Gabinete Eman ta midi?

Den un articulo di prensa nos Minister Eman a splica cu pa yega na un presupuesto balansa na 2017, esaki ta rekiri un maneho hopi strak, bahamento di gasto den tur ministerio y decicionnan fuerte. Como ehempel e mandatario a splica cu den su ministerio a toke pa baha gasto di personal. Pero como cu e no kier manda ningun hende cas a yega na e acuerdo pa duna su hendenan un incentivo di solidaridad den cual ta baha nan salario cu 5 pa 8%. Pues asina tur empleado rond di Minister Eman ta keda cu nan trabou y solamente ta haya un reduccion di nan salario.

Sinembargo na otro departamento di Gobierno manera Belastingdienst, Sociale Zaken y Arbeidszaken, empleadonan a wordo notifica di nan retiro pa cual nan ta keda 100% sin trabou. Constatando e diferencia aki, hopi ta puntra nan mes, ta cu cuanto midi Gabinete Eman ta midi? Con por ta posibel cu esnan rond di Minister Eman por haya rebaho di salario entre 5 cu 8% kedando cu nan trabou, siendo cu otro trahador di Gobierno ta haya retiro cu 100% di rebaho di nan salario? Pakiko Gabinete Eman ta discrimina hasta su mesun hendenan di e forma aki?

Mester remarca cu si Minister Eman di berdad ta un homber di palabra y si di berdad e ta stima hende mescos cu e ta brazanan y sunchinan, e mandatario di basta dia lo mester a intermedia cu Ministernan Yrausquin y Croes pa nan tene hende na trabou cu salario reduci enves di manda nan cas cortando100% di nan salario. Pesey e conseho na esnan cu a wordo retira ta, pa bay serca Minister Eman y pidi e mandatario pa e por ofrece e mesun incentiva di solidaridad cu ela ofreve na su hendenan, na tur esnan cu nan salario a wordo corta cu 100%. No por ta asina cu ta midi cu mas cu un midi den un solo Gobierno dunando algun hende incentiva di solidaridad y lagando otro 100% sin trabou.

 

Guillfred Besaril

Guillfred Besaril

Oranjestad-Ta varios ta e personanan cu durante ultimo tempo ta perdiendo nan trabou riba nos pida baranca. En pricipio tabata trata esnan cu ta labora den sector priva, pero Diamars ultimo a toca turno na esnan cu ta labora como “contractant” den servicio di Gobierno di Aruba. E grupo aki di trahador a wordo notifica, “de la noche a la mañana”, tanto por escrito como verbal, cu Gobierno lo no mester di nan servicio mas. E unico motibo pa e accion aki ta: E “Mega Debe” crea pa Gobierno di AVP! Simplemente gobierno MESTER bai over na reduci nan gastonan, paso no tin mas placa!
Perde trabou ta un hecho sumamente dificil, paso ta trata dibo entrada cual bo ta depende di dje pabo biba y/of percura pa bo famia. Por medio di e articulo aki, nos Fraccion den Parlamento y na nomber di e famia di Movimiento Electoral di Pueblo, kier manda palabranan di forza na tur esnan cu ta perdiendo nan trabou den e dianan aki. Partido MEP ta compronde e momento dificil cu e clase trahador ta pasando aden y ta convivi 100% cu nan.
Segun partido AVP, e situacion riba nos pida baranca en especial di Gobierno ta asina bon, cu kier sigui benta santo den wowo di Pueblo cu un asina yama: “Aruba di 5 Strea”. Pero e realidad cu ta reina bou di e clase trahador ta uno totalmente diferente. Loke ta reinando na Aruba ta un incertidumbre grandi pa loke ta e mercado laboral. Por ehempel: Hecho ta cu Valero keto bai ta sera y sin destino fiho. Un cantidad grandi di esnan cu a labora den e refineria no a haña trabou na Aruba y mester a laga nan famia atras pa bai traha na Corsow, Surinam, Dubai of Saudi Arabia. Companianan tradicional manera Ecco of Bon Bini Bazaar a bisa “Ta Basta” y a sera na porta. Companianan cu mester ta stabiel manera un Arvefa a manda hende cas pa baha nan gastonan operacional. Mescos ta conta pa Bohama N.V. Tiara Air tambe a manda riba 50 hende cas pa por salba e compania. Y awor, como cherry riba e bolo, Aruba a sera conoci cu un minister cu desde Diamars 15 di April 2014 en adelante ta carga e bijnaam di “JUAN MACHETASO” den Pueblo!
“JUAN MACHETASO” a cuminsa pa manda mas di 50 hende cas cu ta labora como “contractant” den Servicio di Impuesto y Douane. Den un carta cu a circula den diferente media (Boletinextra.com y Masnoticia.com), Fraccion di MEP den Parlamento por a constata un storia bunita pa cu e situacion den Douane. Pues cu pa motibo di no ta hasi uzo mas di un systema computarisa (SAP), cu den actualidad a wordo reemplaza pa e systema ASYCUDA,  no tin espacio mas pa 24 trahador. Un storia conciso, pero E incognita grandi awor: “Kiko lo ta e motibo pa manda mas cu 30 hende na Servicio di Impuesto cas anto? Kiko ta e motibo pa corta mas hende den e aparato gobernamental? Systema di Computer tambe? Con a para cu e trahadornan den servicio di Gobierno cu ta labora na por ehempel Directie Informatievoorziening y Automatisering (DIA)? A bisa nan caba cu a papia cu Setar pa tuma nan tareanan over? Ta computer tambe ta e excusa pa retira un X cantidad di trahador for di Departamento di Asuntonan Social (DSZ)? Cuanto trahador mas den servicio di Gobierno ta riba e “Bobo List” di “JUAN MACHETASO”?
Gobierno a demostra di ta un tremendo madrasta, pa motibo cu a regla un Ley di Labor cu ta duna mas atencion na e posicion huridco di e clase trahador den sector priva (uitzendbureaus y contratistanan den hotel), pero na e mesun momento ta un MAL MAMA ya cu ta scohe pa neglisha esnan cu ta laborando cu contrato pa hopi tempo caba cu den servicio di Gobierno. Den sector priva mes bo ta bira vast despues di 2 luna, awor net den Gobierno cu mester ta esun principal na duna ehempel, esaki ta laga grandemente di desea cu periodonan di labor di 5, 6, 7 y hasta mas aña di servicio, sin cu ta regla e posicion huridico di e trahador. Pa colmo desde Diamars ta scohe sin pordon pa pasa Machete y manda e trahadornan aki cas!
Nos di partido MEP a core un campaña cu e intencion principal di concientisa e Pueblo di loke e Gobierno di AVP a hasi y ta sigui hasi cu entre otro nos Finansas Publico. Simplemente un debacle total. Standard & Poors a advirti, IMF a advirti, Fitch a advirti, y hasta Banco Central a lanza un grito, pero sin oido alguno di nos Gobernantenan. MEP como partido serio y responsabel a cumpli cu adverti Pueblo di e “Mega Debe” y cu si no bin un cambio den e rumbo cu ta maneha e Pais, Aruba lo cuminsa cana bai den e direccion den cual hopi lo cuminsa perde nan trabou.
Awe loke nos partido tabata teme p’e, poco poco a cuminsa bira un realidad teribel. Awe nos por cuminsa papia di un “Kiezersbedrog” durante campaña 2013. No menos cu 33 mil persona a wordo engaña por medio di un lema bunita y ideanan futuristico. Ironico paso e realidad di awe ta, cu partido AVP a scohe pa aumenta e cantidad di Ministerionan di 7 pa 9, nan gastonan di operacion ta sigui aumenta, no ta mishi cu e cantidad di coordinadornan rond di nan, pero lamentablemente ta e clase trahador, e homber y muhernan balente cu kier saca nan famia pa dilanti cu nan sudor di nan frenta, tin cu paga e prijs pa AVP sigui luha.
Nos Fraccion den Parlamento, nos Partido den su totalidad, ta condena e hecho cu pa motibo di un mal maneho di nos Finansas Publico, e consecuencia awe tin di cai riba lomba di e humilde trahadornan. Esaki ta loke AINDA FALTA? Increibel pa un Aruba den pleno 2014!

Ruella & Abigael

Ruella & Abigael

ORANJESTAD, Aruba 9 april 2014: Dos studiante cu actualmente ta na Hulanda y cu ta pertenece na e team di Elka & Associates y e Proyecto Auto Estima Aruba, esta Nyohmi van der Biezen & Ruella Arends kier felicita tur participante di e Proyecto Auto-Estima Aruba. “Na caminda pa un mihor Aruba hunto nos ta mas fuerte”!
Nan tin un bunita mensahe pa comparti cu e comunidad di Aruba: “Como dos studiante cu nos curazon ancra na Aruba nos kier mira nos futuronan di mañan prospera. Nos futuro ta den man di nos muchanan, nos hobennan. Ora nos planta simianan for di un edad hoben nos comunidad por disfruta di nan despues.
Un proyecto manera Auto Estima Aruba ta di super importancia caminda e hoben ta siña balora, stima, aprecia su mes persona. “Un persona por stima na e momento cu e sa con pa stima su mes na prome lugar”.
Un persona cu tin un autoestima halto ta willing pa purba mas biaha cu un persona cu un autoestima abou. Na e momento cu nos unlock e secretonan cu nos tin, nos ta bira personanan mas exitoso cu nos por a conoce.
Na e momento cu nos traha riba nos autoestima automaticamente tur area di nos bida lo sigui florece.

Tur cos por ta mihor na e momento cu bo persona dicidi cu bo kier mihor”.
Tanto Nyohmi como Ruella nan tambe ta na caminda pa nan certificacion na Hulanda pa asina asisti
e ekipo di e Proyecto Auto-Estima Aruba na Hulanda y pa apoya e studiantenan.
Nyohmy y Ruella tambe lo wordo certifica pa ta trahando cu e ekipo di Aruba su studiantenan. Mayornan y studiantenan cu lo tin mester di ayudo personal den e area di desaroyo, miedonan y guia lo por acudi cerca Abigael Arends di ELKA & Associates NV pa asina drenta den contacto y pa por coach e studiantenan bayendo Hulanda. Mayornan tambe por tuma contacto tambe pa sesionnan di coaching y guia na Hulanda.
Banda di esaki un invitacion special tambe ta bay na comunidad henter pa asisti na e “Self-Esteem Conference Aruba” cual lo tuma lugar na Cas di Cultura, e dianan 28, 29 y 30 di April pa por scucha mas di e programa di studiante na Hulanda cu ELKA ta organiza.
E trayecto pa yega na un certificacion como Asistente di e Proyecto Auto Estima Aruba ta di un promedio di dos aña intensivo, incluyendo e parti pa ta un lider. Abigael Arends ta un persona certifica pa duna e lesnan aki y ta combina e lesnan cu e parti di conocimento y experiencia, cual ta hopi importante pa yega na e certificacion.
Actualmente Abigael Arends ta directora di ELKA & Associates NV y lider di e Proyecto Auto-Estima Aruba. Esnan interesa den e proyecto aki por contacta Abigael Arends atravez di info@elka-aruba.com.
Riba potret por aprecia e momento cu Abigael Arends tabata na Hulanda pa asina por a inicia negociacionnan cu dos asociado nobo pa lo cual ta trata e Proyecto Auto-Estima Aruba.