arlamentario mr. Xiomara Ruiz-Maduro: Minister di Finanzas mester por conta cu e fondonan genera pa turismo pa por suavisa e problema di likidez di Gobierno

Posted: May 26, 2014 in Johnny Habibe
Xiomara Maduro Mep

Xiomara Maduro Mep

Oranjestad-Siman pasa Minister Yrausquin a reuni cu e Comicion Financiero di Parlamento riba e presupuesto di nos Pais pa 2014 cu ainda no a keda entrega na Parlamento pa su tratamento. Pa acelera e proceso y pa evita di contesta hopi pregunta durante di e debate publico, Minister Yrasuquin a haci entrega di un nota financiero cu ta duna un bista riba e presupuesto 2014. For di e documento aki y for di e informacion brinda door di Minister Yrausquin ta sali na cla cu Gabinete Eman tin un problema severo cu falta di likidez y mester bay fia placa urgentemente pa por cumpli cu su debernan. Na su turno e falta di likidez aki ta significa cu Gobierno lo pasa medida riba Pueblo pa yega na fondo.

Den un caso asina nos ta di opinion y ta sugeri pa e Minister di Finanzas ta esun cu mester por conta cu e fondonan genera pa turismo pa por sauvisa e problema di likidez di Gobierno. Di e manera aki e Pueblo ta keda scapa di mas medida.

Na hopi ocacion nos por scucha nos Minister Yrausquin bisa cu e ta habri pa sugerencianan di opocicion pa yuda drecha e situacion financiero di nos Pais. Nos di opocicion na varios ocacion a splica e mandatario cu e solucion pa nos finanzas publico ta riba mesa desde 2007 caba y tabata wordo implementa caba pa Gabinete Oduber.

Ta Gabinete Eman no kier realisa esaki y a cambio a bay sinta experimenta y gasta fondonan publico cu a pone cu awe nos Pais ta technicamente bancarota caba. Den e reunion siman pasa cu Minister Yrasuquin, e mandatario a bolbe haci peticion na opocicion pa yude soluciona e crisis cu Gabinete Eman a hinca e Pais aki aden.

Y aki atrobe opocicion a mustre cu parti di e solucion ta bou di su mesun nanishi.

Como cu den tempo di guera no tin Misa, nos a seguri Minister Yrausquin pa laga e fondonan cu ta wordo genera pa tursimo drenta bek den e caha di Gobierno pa asina suavisa e problema di likidez cu Gabinete Eman ta pasando aden.

Ta conoci cu e fondonan genera di por ehempel roomtax y ticketlevy ta bay den e fondo special di Tourism Product Enhancement Fund (TPEF) cu ta wordo administra pa Minister Otmar Oduber y for di eynan ta wordo destina solamente pa proyectonan cu tin cu haber cu turismo. Awor cu Gabinete Eman tin problema severo cu likidez ta mas cu husto cu e fondonan aki di turismo wordo destina pa e fondo comun di Gobierno y for di eynan nos Minister di Finanzas a base di prioridad dicidi riba e fondonan aki. Pasobra no por ta asina cu den un solo Gobierno, e Minister di Finanzas no por conta cu fondo, mester bay fia placa y paga interes riba dje y mester pasa medida riba Pueblo pa yega na fondo, siendo cu nos Minister di Turismo ta sinta riba un sero di placa.

Nos ta spera cu nos Minister di Finanzas por tuma e sugerencia aki y haci algo cune. Na fin di dia e sugerencia aki ta na bienestar di nos Pais y ta scapa Pueblo di wordo suta cu mas medida. Nos ta spera cu nos Minister di Turismo por ta solidario cu e Pueblo di Aruba y compronde cu den tempo di guera no tin Misa.

E placa genera pa e unico pilar economico di nos Pais mester por wordo reparti hustamente, specialmente awor cu nos Pueblo ta wordo confronta cu yen di medida debi na e crisis cu e mesun Gabinete Eman a traha. Pesey si nos Minister di Turismo su compromiso ta cu Aruba, e mester laga nos Minister di Finanzas conta cu e fondonan genera pa turismo pa asina por suavisa e problema di likidez di Gobierno na bienestar di nos Pueblo.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s