Oranjestad-Minister Otmar Oduber a duna di conoce cu siman pasa a inicia e trabounan pa instala e sistema di iluminacion di zebrapad na e skina di Southbeach Mall na Palm Beach y e siman aki e lo ta funcionando. Di e forma aki lo aumenta seguridad pa tanto local como turista cu ta cruza e caya aki tur dia. Ademas e ta eleva e calidad di Producto Aruba.
Minister Oduber a duna di conoce cu e proyecto aki cu ta wordo financia dor di Tourism Product Enhancement Fund (TPEF), esta e fondo pa mehoracion di Producto Aruba y a wordo haci conhuntamente cu Ministerio di Husticia y Ministerio di Infrastructura. Den e cuadro aki el a gradici DOW y Cuerpo Policial pa nan input pa por a logra pone e iluminacion na ya caba diferente zebrapad. E proyecto aki ta wordo instala pa e compania All-In Energery N.V.
Mas aleu Minister di Turismo ta bisa cu e proyecto aki a wordo realiza pasobra kier pa nos producto ta uno cu ta impresiona e turistanan tur dia y cu ta crea un sentido di seguridad mas amplio cu ta posibel.
E sistemanan nobo di iluminacion di zebrapad a wordo ubica ya caba dilanti Parlamento, dilanti Bestuurskantoor, dilanti Arubus banda di waf y dilanti Royal Plaza y awor Palm Beach tambe por conta cu uno.
E mandatario a bisa cu pa mayoria e luznan aki riba e zebrapad y riba e borchinan ta trece un alerta for di leu unda cu e autonan ta baha velocidad for di un distancia pasobra nan ta wak luz blanco riba caya y ta wak e borchinan cu luznan oranje ta cende paga indicando cu nan ta yegando na un zebrapad.
Finalizando, Minister Otmar Oduber a expresa cu esaki ta trata di un proyecto cu no solamente ta enfoca riba seguridad, pero tambe ta mustra cu Aruba ta bayendo riba e caminda di mehora e nivel caminda e espectativanan di nos bishitantenan por wordo surpasa.
Johnnyhabibe-Anchorman 