Oranjestad-Siman pasa Minister Yrausquin a entrega e Comicion Financiero di Parlamento un nota financiero cu ta duna un bista riba e presupuesto di 2014 pa nos Pais. E presupuesto mes no a keda entrega ainda na Parlamento di Aruba pa su tratamento. Pero pa acelera e tratamento di e presupuesto y pa contesta mas pregunta cu ta posibel pafor di e debate publico, Minister Yrausquin a presenta e nota aki cu ta contene entre otro e medidanan cu Gabinete Eman tin prepara pa Pueblo den 2014.
E medidanan cu lo keda introduci den 2014 pa un suma total di mas di 100 miyon florin ta lo siguiente:
1. Subida di edad di pensioen di ambtenaar APFA di 60 pa 65 aña pa yega na spaar 30 miyon florin.
2. Lo manda 270 trahador di gobierno cas, cu ta consisti di 180 arbeidscontractant y 90 persona cu ta bay cu pensioen no lo wordo reemplaza of no lo wordo brinda un contract pa keda. Asina lo spaar 7 miyon florin.
3. Lo kita 9 di e 90 hendenan cu ta den e overtolligheidspool pa spaar 1 miyon florin.
4. Lo retira 50 ploeg cu ta haci limpi banda di caminda pa spaar 5 miyon florin.
5. Lo corta den subsiduo di Fundacion Facilidadnan Deportivo pa aspaar 1 miyon florin.
6. Lo reduci e duurtetoeslag, un componente di pensioen di ambtenaar, pa spaar 11 miyon florin.
7. Lo corta den inventario di kantoor, telefoon, fax, internet, huur di edificio, lease di auto, conseho di experto, subsiduo y placa destina pa fondonan special pa por spaar 23 miyon florin.
8. Lo corta den overtime di Polis, CEA, Brandweer, KIA y den overtime traha den Ministerio di Salubridad, Cuido di Grandinan y Deporte pa spaar 5,7 miyon forin.
9. Lo corta den presupuesto di DOW y colegionan di estado manera Parlamento, Raad van Advies y Algemene Rekenkamer pa spaar 6,5 miyon florin.
10. Lo corta subsiduo den AZV y pidi AZV pasa medida (3 florin pa receptregel, 15 florin bishita huisartsenpost, 50 florin bishita Eerste Hulp den oranan scur) pa yega na e fondonan pa cubri e gastonan pa spaar Gobierno 6 miyon florin.
11. Lo cobra 25 florin pa piki sushi na cas.
12. Lo kita bijstand y onderstand pa handicap pa spaar 4 miyon florin.
13. Lo corta den subsiduo pa deporte pa spaar 1,8 miyon.
14. Lo keda sin cumpra aparato pa Landslaboratorium pa spaar 900 mil florin.
15. Lo corta den subsiduo di Arubus pa spaar 2,8 miyon florin.
16. E seccion di control aereo di Directie Luchtvaart lo bira NV mas tarda 1 di november 2014 y tur empleado lo perde status di ambtenaar pa asina spaar 7 miyon florin.
17. Lo corta den subsiduo pa stichting di Gobierno pa spaar 2,3 miyon florin.
18. Lo cobra fianza pa estudio mas rigidamente y lo pone mas regla severo pa por bin na remarke pa un fianza pa estudio pa spaar 7,3 miyon florin.
Tur e medidanan aki lo afecta Pueblo sea directamente door cu Pueblo mester bay paga extra pa AZV, pa piki sushi, lo perde trabou, keda sin bijstand of onderstand, paga mas pa transporte, paga mas pa cuido di grandi, of indirectamente door cu servicio di Gobierno ta bira pio, salubridad ta bay atras, criminalidad ta aumenta y inseguridad ta crece mas. Tur esaki siendo cu Minister Eman a keda ripiti den eleccion cu su Gobierno no lo bin cu ningun medida. Awe danki na e desastre haci cu nos finanzas publico e presupuesto di 2014 ta yena cu medida cu lo afecta e Pueblo.
Johnnyhabibe-Anchorman 