Archive for May, 2014

supla
Oranjestad-Ta dicon ultimo anja nan tin tanto problema cu KIA? Tempo MEP tabata den gobierno, cu hopi menos placa, por a run e instituto coreccional mucho mas mihor, y por a tene cualquier disturbio paden den e instituto. E tempo ey un director hunto cu e minister di Husticia Rudy Croes, por a domina e instituto.
Pero awor ta varios management team Minister Dowers a apunta, pero nan no por a tene cosnan bou controla, simplemente pasobra no tin vision ni guia pa parti di gobierno.
A cuminsa persecucion politico contra e director sr. Geerman, djis pasobra ela wordo nombra tempo di gobierno di MEP. Esey combina cu un minister di husticia Dowers cu no sa kiko ta come ni bebe den institutonan coreccional, a causa awe e drama cu nos ta mira den KIA.
Pero e unico persona responsabel ta Mike Eman. Pasobra Mike Eman ta instrui su gobierno pa hasi show so, y no hasi locual ta necesario pa hiba e instituto riba bon caminda. Mike Eman a malgasta tur placa di pueblo den campanjadornan riba payroll di gobierno, na biahenan rond di mundo, yenando business class di KLM tur siman, y na propaganda y fiestamento. Anto awo no tin placa pa pone suficiente vigilancia den KIA. Mike Eman ta e UNICO responsabel pa esaki.
BULA CABES DI DOWERS
Y awor pa colmo a bula cabes di Minister Dowers, y a core bai pidi minister di defensa di Hulanda pa ayudo cu Marina Hulandes. Ta kiko esaki ta bisabo? Cu Aruba su gobierno no tin confiansa mas den Minister Dowers, ni den autoridad Arubiano mes. Asina tanto Mike Eman a degenera nos pais y nos institutonan. Aruba, un tempo un orguyo, awe ta chercha y centro di critica di cantidad di organisacionnan internacional, y tur danki na Mike Eman. Ta tempo pa Mike Eman saca su conclusion, y hala un banda pa otronan cu si tin e conosemento y compromiso pa hiba nos pais padilanti, por goberna nos pais.

💔💔

Oranjestad-Na Sint Maarten a keda presenta diaranson den presencia di Prinses Beatrix e buki di historia “Eenheid en verscheidenheid – 200 jaar Koninkrijk. Nederland en de zes Caribische eilanden in jaartallen”. Ank Bijleveld, presidente di Comite Nacional 200 aña Reino, a entrega un prome ehemplar na binti alumno di Sint Maarten Academy.

“Dos shen aña di Reino nifica, cu Hulanda y e islanan Caribense ta comparti hopi historia. Ta importante pa conoce e historia ey, pasobra ta asina so nos por compronde e desaroyonan di awe y hunto nos por construi futuro”, segun presidente di NC.
Esey ta cuadra cu e tema di Parlamento Hubenil di Reino cu ta tuma luga actualmente (di 20 pa 22 di mei) na Sint Maarten. Cincuenta hoben ta debati tocante loke ta uni nos den Reino, awor y den futuro. Parlamento Hubenil di Reino ta e di tres evento (nacional) den cuadro di celebracion di 200 aña di Reino.
E buki ta trata e historia comun den Reino for di 1813 te awor. Pero e epoca for di descubrimento di e islanan aki pa e Spañonan tambe ta keda trata. E enfoke ta riba e momentonan historico den e relacion entre e islanan y entre e islanan cu Hulanda. Ta un mescla di asunto di gobernacion y acontecimento importante riba tereno di deporte, cultura, economia y comunidad.
Ta publica e cronologia aki na ocasion di e celebracion di 200 aña di Reino Hulandes y e mester ta un recuerdo permanente pa e alumnonan di e klasnan mas halto di VSBO/Mavo y e ciclo basico di Havo/VWO. Ademas e cronologia aki ta yuda e docentenan pa bay mas profundo den e historia di Reino.
Despues di e presentacion na Sint Maarten Academy lo distribui mas cu 11.000 ehemplar na tur otro scol na Sint Maarten y na e cinco otro islanan den Caribe. Pa haci e buki mas accesibel posibel, a traduci e obra na Ingles, Papiamentu y Papiamento.

Den e parti Caribense di Reino por tende hopi biaha cu e hobennan di e islanan sa hopi mas di Hulanda cu e hobennan di Hulanda sa di Caribe. Esey a bin dilanti tambe durante e apertura di Parlamento Hubenil di Reino efectua pa Prinses Beatrix. Hopi di e presentenan a subraya e importancia di atencion pa Reino den enseñansa. Dwayne Griffith di Sint Maarten, un di e hobennan cu ta participa den Parlamento Hubenil di Reino, a formula esaki di e manera aki: “I learn from yesterday, live for today, hope for tomorrow.” NC lo investiga e posibilidadnan pa distribui e buki na e scolnan na Hulanda tambe.
E cronologia ta skirbi pa e periodista y historiado René roodheuvel riba encargo di Comite Nacional .E tabata coresponsal di Radio Nederland Wereldomroep y NOS pa e islanan y den su hubentud el a biba algun aña na Corsou. Ademas e ta miembro di e grupo di trabou di Caribedi e Comite Naciional 200 aña Reino.

Ministronan

Ministronan

Oranjestad- Despues di loke a sosode na KIA diamars ultimo, minister encarga cu Husticia na Aruba a cuminsa reunionnan riba diferente nivel pa evalua e situacion, e reaccion di tur instancianan concerni y tambe normalisacion di e situacion na e unico instituto penal di Aruba.
”Nos tabata tin diferente reunion caba, diferente minister a bin hunto y diferente departamento pa asina nos atende cu e asunto di e condicion di prizon,” Minister di Husticia mr. drs. Arthur Dowers a splica diaranson merdia despues di un reunion cu Cuerpo Policial. E mandatario a detaya cu e infrastructura di prizon a sufri hopi daño atrobe y pesey a reuni tambe cu diferente instancia responsabel pa husticia, orden publico y siguridad na Aruba.

E meta principal di e reunionnan ta pa evalua con tur cos a bay como reaccion na e disturbionan na KIA. Segun Sr. Dowers, e evaluacion a mustra cu tur cos a cana manera cu a wordo planifica. Tambe ta bay delinea e plan di accion cu mester tin si tin cualke eventualidad den e situacion cu tin.

“Na e momentonan aki nos tin un situacion cu nos tin hopi menos cel, e capacidad tabata caba bou di presion dor di e cantidad di personanan cu tabata deteni y consecuentemente awor aki nos tin menos capacidad ainda,” Sr. Dowers a splica. “Nos ta bay evalua awor aki cua ta e alternativanan. Nos tin celnan di Polis cu na e momentonan aki no ta den uzo y nos ta preparando esakinan tambe pa cualke eventualidad, te na momento cu e situacion bira, no normal, pero en todo caso e capacidad por wordo lanta bek.”
Minister Dowers a indica cu aki tin tres seccion di cel cu ta for di funcion. Ta buscando manera pa por aloca fondo pa alivia e situacion y cuminsa mesora cu restauracion di un parti di e celnan aki. E daño na e celnan tin di haci principalmente cu coriente. Asina cu e aspecto aki keda coregi, Segun Minister Dowers, por pone e celnan bek den funcion.
E problema di mas grandi cu ta wordo confronta cu ne ta un posibilidad hopi limita cu por aparta cierto prizoneronan cu bo no kier pa ta hunto. Awor aki no tin e posibilidad ey mas. “Nos ta haya hopi importante pa nos yega na un solucion temporal y despues e comision cu ta trahando ariba solucionnan structural, riba un termino mas largo, a bini hunto awe mainta y mi ta mira cu nan a pone e trabou aki den un prioridad hopi halto pa asina cu dentro di algun siman nos tin proposicionnan concreto pa traha cu ne.”
Sr. Dowers a enfatisa cu departamentonan di su ministerio ta trahando duro pa garantisa siguridad general riba nos isla. Tur accion cu a tuma pa caba cu e disturbionan a bay segun plan y ta trahando cu determinacion y profesionalismo pa un solucion riba termino largo pa e problema cronico pa hopi aña caba di e situacion den KIA.

Baby Beach

Oranjestad-Minister Otmar Oduber ta indica cu na e momentonan aki ta tumando lugar un inversion pa mehoracion di Baby Beach pa un total di 1.6 miyon Florin. Den e fase aki ta mehorando infrastructura di Baby Beach y esaki ta wordo financia dor di Fondo di Mehoracion di Producto Aruba (TPEF).
E proyecto aki a inicia den luna di februari y ya por mira diferente parti di dje ta biniendo cla. Intencion ta pa por ofrece un mihor producto na tur esnan cu ta desea di pasa un rato of un dia na Baby Beach, haciendo di dje un atraccion mas grandi ainda di loke e ta caba.
Baby Beach ta un di e atraccionnan di nos isla cu tanto turista como local ta disfruta di dje y na momento cu e proyecto di renovacion keda cla, e lo haci di e beach aki uno mas atractivo y lo keda similar na esun di Arashi.
E lo conta cu lugar di parkeo amplio y asfalta, ademas di un muraya chikito separando e beach for di e area di parkeo, protehando asina nos naturaleza.
Minister Oduber a duna di conoce cu esaki ta un di e proyectonan cu ta tumando lugar na e momentonan aki y di varios mas cu lo bin pa logra e meta estableci pa Gobierno di haci di San Nicolas e di dos capital turistico di nos isla y asina por sigui engrandece economia di nos isla.
E proyecto aki ta parti di un serie di inversionnan cu a y ta wordo realiza na San Nicolas pa haci di e distrito aki e di dos capital turistico di Aruba, ademas di bira e centro di nos herencia cultural.
For di aña pasa Ministernan Oduber y de Meza a reuni cu diferente inversionista pa mustra nan vision y plan di maneho pa loke ta San Nicolas, unda nos herencia cultural ta hunga un rol central y ta enfoca riba esaki tambe pa loke ta e aspecto turistico.
Despues di e reunion cu e inversionistanan potencial, na cuminsamento di maart tabatin un fact finding mission pa New Orleans, unda cu mas di 20 inversionista tabata presente y a wak con a desaroya New Orleans den un ciudad turistico manteniendo su aspectonan cultural.
Diferente reunionnan a tuma lugar despues di e biahe aki y awor ta asina leu cu ya caba varios inversionista a cumpra, ta den proceso di compra of huur diferente localidad na San Nicolas, mientras cu e propietarionan di edificionan ta cla pa inverti den nan lugar.
Siman pasa Ministernan Otmar Oduber y Mike de Meza a reuni tambe cu Aruba Investment Bank (AIB) y San Nicolas Business Association (SNBA) riba e business plan pa Carubbian Street na San Nicolas.
E mandatario di Turismo a finaliza bisando cu importante di e desaroyo aki ta cu ta bay crea un boost economico pa San Nicolas cu diferente atraccionnan pa tur edad, unda e turista lo mezcla cu e local y hunto por conoce mas di nos historia, di nos cultura, di nos tradicionnan y di nos herencia como isla multicultural.

 

Laura Bos

Laura Bos


Oranjestad – E hoben pianista Hulandes Laura Bos lo acompaña Tania Kross dia 3 di juni proximo den Cas di Cultura.

Tania Kross ta un conocido cantante di opera rond Europa, specialmente na Hulanda unda e ta biba y traha. Tania no solamente ta conoci pa su bunita bos, pero tambe pa su propio personalidad ariba escenario.
Pa su concierto na Aruba Tania lo bini cu e pianista Laura Bos kende ta un graduado di e conservatorio di Rotterdam na 2004. Su maestro tabata Michael Davidson.
Despues el a studia pa bira dirigente y a gradua na 2008. El a sigui Kurt Thomas Course pa dirigente di coro na Utrecht. Laura a yega di dirigi diferente coro manera Oratorium Koor Alphen.
Pa varios aña el a traha como pianista cu e coro di studiante Collegium Musicum na Leiden y tambe cu the Bachgemiende Wien di Austria.
Su interes pa opera a haci cu el a sigui un “summer course” na 2009 na Austria dirigi pa Heinz Zednik y Konrad Leitner.
Laura ta masha activo como pianista na Hulanda y Viena y a traha entre otro cu e Academia di opera di Hulanda y Wiener Konzerthaus.
Na 2013 e tabata asistente dirigent y pianista pa e produccion di The Magic Flute na e conservatorio di Utrecht. Tambe e tabata encarga cu e repertorio pa e produccion Katibu di Shon di Randal Corsen den cooperacion cu Nationale Reisopera na Hulanda.
Laura Bos ta traha frequentemente cu e soprano Annette Fischer presentando un repertorio contemporaneo.
Diamars 3 di juni publico di Aruba por disfruta di e talento di pianista Laura Bos hunto cu mezzosoprano Tania Kross.
Carchi ta obtenibel na oficina di UNOCA, van Dorp na Dakota, Cas di Cultura, Scol di Arte y Aruba Post na San Nicolas.

Specialmente nos talentonan hoben den canto no por perde e concierto aki, pa mira e pasion y dedicacion di Tania Kross den cada un di su canticanan, di musica clasico te na musica di compositornan Antiyano. Y no lubida ariba e workshop dia 3 di juni pa 3 or di atardi na Cas di Cultura pa tur cantante.

Candelario Wever

Oranjestad-Mi lo dedica den dos articulo mi preocupacion tocante e rol cu Mike Eman ta hunga den realisacion di su plan pa haya Hulanda permiti Juan David Yrausquin hasi prestamo pa yena e buraco financiero di pais Aruba, y pa AVP sigui derocha placa na nan financistanan di campaña.
E prome parti lo ta dedica na Philips, KLM y e rol cu Flamingo Airport ta hunga den e maniobra di Mike Eman pa engaña e pueblo Arubiano riba su “logronan” fantasma.
Den un democracia bibo ta esencial cu cada “move” di e gobierno wordo scrutina debidamente. Na momento cu partidonan, tanto esnan cu ta defende gobierno como esun den oposicion, cu of sin representacion den parlamento, faya den eherse e deber fundamental di controla gobierno, e pais ta core un riesgo hopi grandi di cay den un recesion manera a sosode na Grecia, pero tambe na Merca y Europa, cu no kier a premira e desaster financiero door di hipotecanan cu a wordo duna door di banconan priva y e companianan di seguro.

Aruba ta den un situacion financiero deplorabel y e gobierno di Mike Eman ta trata tur sorto di forma di saca su curpa, door ta intransparente y deshonesto cu su pueblo. Mas bien Mike Eman ta trata di recupera e confiansa cu su gobernacion a perde di Hulanda door di hasi inversion den companianan hulandes, sperando cu Hulanda lo bay di acuerdo pa Aruba fia placa toch cu un interes abou.
E resultado lo ta cu Aruba lo endeuda su mes ainda mas. Pues contra e interes di e pueblo Arubano, djies pa e keda “de braafste jongetje van de klas”! Y AINDA FALTA.
Mi a yega na e conclusion aki despues di a analiza diferente publicacion den medionan di comunicacion.
Na prome lugar e deal cu Aruba a sera cu Philips. Manera nos sa e recesion tabatin su efecto negativo grandi riba companianan manera Philips. E compania a trata di tur forma di reduci e perdidanan, y un di e opcionnan factibel ta pa purba di habri mercadonan (aunke chikito manera Aruba) na unda e por bende su articulonan. Aunke Philips tin un bon nomber mundialmente, Aruba semper a hasi uso di productonan di e competidornan di Philips. Cu e compania kier propaganda su productonan na Aruba ta semper bonbini, pero kiko e efecto lo ta pa e negoshinan local? Nan lo por competi ainda cu nan productonan cu no ta di Philips? Y con grandi e chens pa sobrevivi un invasion di productonan di Philips lo ta pa nan negoshi y pa clase media riba nos isla?

Un di dos punto ta e deal cu KLM. Na diferente ocasion mi a lansa e pregunta pa Mike Eman pa e informa pueblo cuanto e deal aki lo bay costa Aruba. E actual CEO di KLM sr. Camiel Eurlings a duna di conoce cu a escohe Aruba pa su prome vuelo transatlantico cu biofuel (e prome vuelo tabata na 2012 pa Rio de Janeiro) pasobra Mike Eman semper a mustra hopi entusiasmo y interes pa yega den un tempo corto na uso di energia duradero.
Permitimi hasi algun observacion riba e ponencia aki di sr. Eurlings:
1. Sr. Eurlings den pasado ya caba a yega di hasi sierto maniobranan dudoso. Como minister di transporte e a duna KLM na 2010 1 miyon euro pa desaroya biokerosine. E mesun minister aki como minister a trata na privilegia KLM den e caso di e volcano na Escocia. Como recompensa Sr. Eurlings despues a haña nombracion como director di KLM. Parlamento Hulandes a haña nan mes obliga di bin cu un “gedragscode” pa evita cu den futuro ex-mandatarionan bolbe duna un impresion di un “conflict of interest”.

2. Na 2001 KLM deliberademente a bypass Corsow y tambe Aruba y hasi Bonaire nan coneccion cu Caribe. Segun NRC Handelsblad den un articulo publica dia 7 di december 2013 y cu ta carga e titulo: ‘KLM kreeg op Bonaire alles voor elkaar’, KLM a logra di haña dealnan di fuel sumamente favorabel di e gobierno di Bonaire cu alabes a laga renoba su airport pa acomoda KLM. Esaki a resulta den un caso hudicial (Zambezi zaak) contra diferente politico Boneriano. Mi no ta tuma KLM na malo pasobra esey ta e forma di proceder di cualkier compania grandi cu kier reduci su gastonan riba custiya di otro. E pregunta ta: unda KLM a keda como e bon partner di gobierno di Aruba e tempo ey??

3. E decision tuma na principio di 2001 door di KLM tabata basa riba e situacion financiero dificil di aeroliñanan. KLM a wordo cumpra despues door di Air-France dia 30 di september 2003, y manera mi ta compronde e compania frances awor aki no ta pasando den su mihor temporada. Mester a bin cu accionnan competitivo pa tene cabez na halto y di otro banda mester a trata di cumpli cu e asina yama “Biofuels Flight path” cu a wordo acorda na Brussel dia 18 di mei 2011. Intencion ta pa “Achieving 2 million tonnes of biofuels use in aviation by 2020″.

4. E uso di biofuel a wordo cuestiona den diferente ocasion. Tur hende ta di acuerdo cu mester busca un alternativa adecuado pa e uso di kerosine, pero den nan afan pa logra e meta stipula na Brussel, cierto compania a bay over na cumpra “landbouwgrond” na paisnan di tercer mundo. E productonan cultiva no tabata wordo usa pa combati hamber den e paisnan menciona, pero nan uso tabata exclusivamente pa produci biofuel.
Obviamente e accion aki a lanta hopi critica y e experimento a wordo bandona. A sali en busca di otro alternativa.
Lufthansa a dicidi di stop temporalmente cu su vuelonan cu biofuel. Uno, pasobra e ta 6 pa 8 biaha mas caro cu jetfuel normal, y NO 3 pa 4 biaha manera KLM por medio di Eurlings, a laga sa (un otro mentira), y tambe pasobra ta dificil pa haña un stock di biofuel confiabel. KLM na su turno a sera un deal pa evalua e uso di “frituurvet” cu e compania SkyNRG na unda KLM ta participa cu 30%, dus un win-win situacion pa KLM.

5. Kiko e rol di Bonaire, cu ta encarga cu KLM den Caribe, ta den e caso aki? E contesta no a dura largo pa sali na cla. Durante e ultimo bishita di sr. Eurlings na Bonaire, el a laga sa cu Bonaire y KLM lo inventarisa con lo prepara na prome lugar Flamingo Airport y despues un otro airport den e area di Caribe-Hulandes pa yuda desaroya un “handelshub” entre Europa y Latino-America. NO TA ARUBA Y KLM LO HASI ESAKI, PERO BONAIRE Y KLM. Tambe sr. Eurlings a informa cu KLM tin mas ainda “in petto” pa Bonaire.

( Un otro tubo di Mike Eman)

Nada contra pa nos hermana Isla Bonaire tambe ricibi tur e beneficionan menciona door di sr. Eurlings, pero loke ta remarcabel ta cu KLM ta hunga “mooi weer” (di kende nan lo a siña esaki??) cu Aruba, mientras tanto e berdadero deal ta socede cu Bonaire. Esaki lo mester hasi Mike Eman dolor ya cu KLM ta hasi y deshasi cu e “logronan” cu na Aruba Mike Eman ta propaganda den grandi. Mike Eman no tin salida di e problema aki, pasobra e mester logra aprobacion di Hulanda pa hasi e prestamo miyonario, asina ta cu e lo mester guli e pildo amargo aki sin keha. E pregunta cu Mike Eman mester contesta ta cuanto e sponsoring di e experimento cu biofuel lo costa Aruba. Corda e buelonan aki ta hopi caro, esta 6 pa 8 biaha mas caro cu normal, cu pa un parti grandi ta wordo subsidia of patrocina (sponser); Dios sa cuanto Mike Eman y AVP a regala e multinacional aki. Djies pa e keda cu e titulo di ” de braafste jongetje van de klas”.
(KIKO FALTA AINDA??).

 

Palm Beach — SITE Florida & Caribe, un capitulo di e Society of Incentive Travel Executives, a tene su Foro Educacional annual riba e isla, diabierna, 16 di Mei, 2014 na Marriott Aruba Resort & Stellaris Casino, invitando ehecutivonan local di hospitalidad, studiantenan di Universidad y studiantenan local di educacion secundario, sector hospitalidad, pa un experiencia educativo interactivo y interesante.

E Foro Educacional a cuminsa cu un desayuno continental y registracion, sigui pa orador principal Katherine Manfredi, GMIC, kende a papia tocante Practicanan di Sostenebilidad y Reunionnan Berde pa destinacionnan y organisadornan di viahenan incentivo cu ta interesa den e ultimo tendencianan di incentivo. Dahlton Bennington, Meetings and Motivation na Florida, a papia tocante  E Norma Nobo den Negoshi di Motivacion y Incentivo, mientras cu Doyle Girouard, Cypress Group, a papia tocante Incentivo for di e Cuminsamento te e Fin, na ki momento e ta termina di berdad?!

Un lunch exkisito a wordo sirbi cortesia di e brigada culinario di Marriott Aruba Resort & Stellaris Casino. E ocasion a inclui e desvelo exclusivo di Gain InSite Caribbean, un modelo di negoshi excitante di Miembro pa Miembro, cu Myrna Jansen, consehero principal pa e Minister di Turismo, presente.

Dos sesion a tuma luga den e oranan di atardi, un di Doyle Girouard, Cypress Group, kende a sigui cu su tema di mainta, y pa conclui e dia, e grupo di orador na un manera experto a describe Servicio di Cliente pa Incentivonan, y e cambionan di negoshi di awendia cu semper ta keda demanda mas.

Un recepcion ameno y ceremonia di certificado a sigui despues, ofreci pa e Aruba Tourism Authority.

SITE, e organisacion cu a ofrece e foro, prome cu tur cos ta un red di profesional den e ramo di incentivo y reunion. Miembronan di Site ta parti di un comunidad internacional, cual ta beneficia di tremendo oportunidadnan pa conecta y conoce otro, cual ta facilita e reto di busca oportunidadnan di negoshi, intercambiando di informacion y conocemento cu otro partnernan di negoshi. SITE ta un partner importante di e industria di turismo na Aruba, cual ta desea pa concretisa su parti den e industria di MICE, esta Meetings, Incentives, Conferences y Exhibitions..

Wichita Villacres, Presidente, ECO Destination Management Services of Aruba & Curaçao, kende ta e Presidente di e Capitulo di Florida y Caribe pa SITE na 2014, a anuncia e foro educacional na Aruba, como un esfuerso pa trece contenido educacional pa Caribe.

Villacres, kende su carera di bida largo den turismo ta conecta di serca cu e isla di Aruba, a bira Presidente di e 2014 SITE Capitulo di Florida y Caribe na cuminsamento di e aña aki, como e prome Presidente nobo, orguyoso pa representa Aruba.

Den su rol como Presidente y CEO di ECO Destination Management Services of Aruba & Curaçao, Wichita ta un miembro di SITE ya pa 25 aña, y el a participa y forma un parti activo di un Universidad di SITE, un conferencia di SITE na Aruba, y un conferencia di SITE na Orlando. Adicionalmente, el a participa den por lo menos 20 di e conferencianan aki rond mundo, incluyendo na: Maui, Irlandia, Suiza, Hong Kong, Orlando, NYC, Cancun, Montreal, Beijing-China, y mas.

Como miembro di directiva di e Capitulo Caribense original, el a trece e Capitulo di Florida mas serca na organisadornan di viahenan di incentivo for di Canada, birando e punto di contacto entre e dos capitulonan ruman, cualnan ta e prome dos capitulonan cu a lansa e programa nobo di Gain Insite.

GuyabaOranjestad- E mata di guyaba ta un mata relativamente chikito cu ta crece te cu 6 meter di halto cu un corona hancho y ramifica. 

Mescos cu pa hopi otro mata di fruta, abehanan ta hunga un papel sumamente importante pa cu polonisacion y sobrevivencia di e mata di guyaba.
E mata di guyaba mester wordo planta den un area unda cu e ta haya bon lus di solo y no tin mester di un cantidad grandi di awa pa sobrevivi, cual ta haci cu e mata aki ta crece idealmente den e clima riba nos isla.
Guyaba mes ta un fruta cu ta kai den categoria di appel cu un sabor parecido na un combinacion di peer y strawberry pa cua motibo e ta wordo hopi gusta dor di grandi y chikito.
E benificionan pa cu salud di e ser human ta hopi entre otro;
Peso : Un guyaba ta contene menos sucu cu un appel, appelsina, druif of peer cual ta haci e fruta aki ideal pa esnan cu kier baha peso y esnan cu ta sufri di suku. Nutrientenan den e fruta aki ta percura pa mantene y regula e metabolismo di e curpa.
Bista : Guyaba ta contene un cantidad halto di vitamina A cual ta mentene un bista sano y ta juda preveni catarata.
Preveni cancer : Guyaba ta contene un cantidad halto di lycopene cual ta un anti oxidante fuerte cu ta combati celnan di cancer, specialmente cancer di prostaat.
Tosamento y griep : E juice di guyaba berde por yuda elimina slijm, kita dolor di garganta y preveni infeccion. E guyaba tambe ta contene un cantidad halto di vitamina C cual ta mantene un imuunsysteem halto.
Guyaba ta wordo hopi gusta pa e diversividad di uso di e fruta cual ta sumamente delicioso riba su mes pero cu tambe por wordo pa traha differente postre, bolo, juice, jam y batido.
Pa esnan cu kier planta y cosecha e delicioso fruta aki den nan cura di cas, Santa Rosa ta bende hunto un surtido grandi di mata tambe e mata di guyaba.
Departamento di Agricultura, Cria y Pesca ta invita tur cu kier sinja mas di e mata di guyaba y otro matanan di fruta y berdura pa tuma contacto cu e Departamento na 585 8102 unda cu nan lo por cumpra entre otro mata, simiya y tera y ricibi conseho y guia con pa mihor planta na cas.

womans Club

Oranjestad-Diadomingo proximo den e ballroom di Aruba Marriott Resort Women’s Club of Aruba lo ta organisando un biaha mas e asina gusta “High Tea Party”. Esaki ta un evento pa recuada fondo pa e diferente proyectnan cu e club tin mester di fondonan di dje e.o e “Dress A Child Project”.

E evento ta basa riba e custumber di bebe te cu koffie hunto cu bolo y cos dushi den oranan di atardi. Exactamente pa e motibo aki e evento ta cuminsa parti atardi pa 3.30 pa 7.30. E evento lo tin musica bibo presenta pa diferente artistanan local di renombre. Ta trata aki di entre otro Landa Henriquez “Muher 40”, Edjean Semeleer y Elizabeth Pope. E artistanan ta preparando un repertorio completamente varia pa por por entretene tur persona.

Un detaye importante pa informa tur esnan cu ta interesa pa atenda e evento cu e cantidad di carchi cu tin disponibel pa e evento aki ta hopi limita, es decir no por warda te na ultimo momento pa cumpra caarchi.

E caarchinan ta obtenibel serca tur e miembronan di Women’s Club of Aruba y tambe por jama na 593 85 25 pa cumpra carchi. Pa e atardi aki a escohe e color “roos” como e tema. Esaki no ta nifica cu mester bin bisti na “roos” pero cu e lo duna e evento un toke diferente si mayoria persona bin bisti na e color aki.

Aruba Marriott Resort lo keda encarga pa ofrece un variedad hopi grandi di diferente tipo di te.

Naturalmente lo tin diferente tipo di koffie tambe cu por bay purba durante e evento. Pa loke ta e cosnan dushi lo tin diferente tipo di bolo, kuki y otro cosnan di smaak dushi pa por acompanja hunto cu e diferente koffie y thee. 

Aruba pues ta keda invita pa asina duna un man y cumpra carchi pa e High Tea Party di Women’s Club of Aruba pa diadomingo proximo den Aruba Marriott Resort Ballroom.

Xiomara Ruiz Maduro

Oranjestad-Siman pasa Parlamento di Aruba a trata e cuenta anual di 2011 di nos Pais. Den e documento aki Gabinete Eman ta responsabilisa e fondonan cu a wordo usa cu aprobacion di Parlamento y ta demostra kiko a logra cu e maneho financiero hiba. Pa Parlamento por evalua e informacion presenta den e cuenta anual, ta importante pa tene na cuenta e conseho y e recomendacionan cu Algemene Rekenkamer (ARA), Raad van Advies y Centraal Accountantsdienst (CAD) ta duna. E cuenta anual 2011 a wordo aproba pa e mayoria den Parlamento contra tur conseho.

ARA y CAD a indica cu nan no por a controla si e cifranan presenta ta corecto, completo of legitimo. Nan no por sigura cu e cuenta anual ta duna un bista corecto y confiabel di e situacion financiero di nos Pais den 2011. Gabinete Eman a surpasa e presupuesto di 2011, a gasta mas placa cu e tabata tin, y no tabata autorisa pa Parlamento di Aruba pa haci tal. Raad van Advies di su parti a indica cu den e cuenta anual ta bay 3 biaha contra ley, ya cu riba puntonan esencial e cuenta anual ta desvia di ley di Comptabilidad. Tin gastonan extra cu Parlamento no a autorisa y si bay di auerdo bo ta duna bo mes como Parlamento un ‘brevet van onvermogen,’ un senial cu como Parlamentario bo no sa kiko ta bo trabou ta. Mas aun, bayendo na favor di e cuenta anual, bo ta libra e Minister di su responsabilidad pa e fondonan cu ela gasta di mas y sin autorisacion di Parlamento. Raad van Advies a hasta haci e pregunta di principio, con por bay duna aprobacion cu forza retroactivo na gastonan cu Gobierno a haci sin aprobacion di Parlamento? Na nos parecer, e pregunta aki ta no a wordo haci pornada, sino tabata mas bien un senial pa Parlamento cu bay di acuerdo cu e cuenta anual aki ta un locura.

Locual a bira bisto di e maneho financiero di Gabinete Eman den 2011 ta cu e debe a hisa garndemente. Den 2011, dii cada 1 florin 61 cent ta bay pa paga debe, siendo cu na 2010 e tabata 56 cent di cada florin. Pa un maneho responsabel Gobierno mester a keda rond di 50 cent di cada florin. E buraco den nos finanzas publico, e deficit, tambe a bira mas grandi. Di 4.4% di nos GDP (tur locual nos ta produci cu nos trabou) na 2010, e la bay te 7.1% den 2011, siendo cu pa un maneho responsabel e deficit mester a keda rond di 3% di nos GDP. Pa locual ta inversion, di e 325 miyon florin di deficit segun cifra di Banco Central, solamente 62 miyon florin a bay pa inversion pa Pueblo y e resto, e 263 miyon florin a bay na e fiestamento di Gabinete Eman.

Mirando e conclucionan di ARA, CAD y Raad van Advies y teniendo na cuenta e resultado di e maneho financiero hiba pa Gabinete Eman, ta imposibel pa por bay di acuerdo cu e cuenta anual di 2011. Tampoco por bay di acuerdo cu un maneho financiero cu ta empeora enves di drecha nos finanzas publico. Pa e motibo aki ta incomprendibel con e mayoria den Parlamento por a aproba e cuenta annual di 2011 contra tur conseho.