Archive for May, 2014

ArubaAirportOranjestad-Minister Otmar Oduber comentando riba e contract cu Schiphol Group pa loke ta trata nos aeropuerto, el a bisa cu ta bezig den negociacionnan cu Schiphol pa loke ta trata futuro y e contract cu fin di e aña aki lo mester wordo renova. Tambe con lo renova e contrato ey mirando cu aeropuerto ta pasando den e proceso di refinanciamento cu a inicia desde aña pasa. Tin igualmente decisionnan cu mester wordo tuma riba maneho di dividendo, maneho di inversionnan y e rendimiento cu lo kier riba e propiedad.

Minister Oduber a reuni durante su biahe pa Hulanda un par di luna atras cu Schiphol y dos siman pasa tabatin dos persona na Aruba caminda a haci un assesment hunto cu nos mesun profesionalnan.
Den e conversacionnan aki a papia si lo bin cambio pa loke ta trata e director aki na Aruba y den e proceso aki ta na e momentonan aki. Den e cuadro aki, actual director, Peter Steinmetz a mustra su interes pa retonan nobo, despues di practicamente 10 aña cu e ta dirigiendo nos aeropuerto, durante cual a conoce hopi exito y retonan.
“Mi ta kere cu tur hende ta convenci di e trabou grandi cu a wordo haci for di momento cu Schiphol a bin Aruba y e adelanto cu nos a conoce na nos aeropuerto, basa riba e fundeshi cu a wordo poni den añanan 97-98 dor di e director di e tempo ey pa por a logra e renovacion y expansion cu a tuma lugar den nos aeropuerto. Awor nos a yega na un punto atrobe caminda cu despues di practicamente 14 aña for di e punto unda cu a bay den renovacion grandi, cu Aruba su aeropuerto tin cu bay den un fase practicamente igual”, Minister Otmar Oduber a duna di conoce.
Aki e ta papia di inversionnan cu tin planifica di casi 300 miyon Florin den e proximo 10 aña y e ta considera cu ta na su lugar pa usa e momento pa por analiza un biaha mas cu e partner (Schiphol) cu cual a expresa di kier continua cu e relacion y den e proceso mira e posibilidad pa bin cu cambionan.
Mas aleu e mandatario a duna di conoce cu a encamina un fase cu a inicia 2 pa 3 aña pasa caminda a cambia diferente partinan den e contrato cu Schiphol, entre otro e cambio di Statuut realiza dor di e directiva cu tabatin anteriormente unda cu Gobierno anterior a habri e posibilidad pa sharenan di aeropuerto por wordo bendi, tambe cu Schiphol lo por a apunta directamente un hende den e hunta di directiva di aeropuerto. Minister Oduber riba esaki a bisa cu opinion di actual Gobierno ta cu nos aeropuerto mester keda 100% di Pais Aruba y pa tal motibo a negocia cu Schiphol y a cambia tur e aspectonan ariba menciona.
Mientras tanto Minister Otmar Oduber ta expresa cu Schiphol ta bon pa Aruba, cu nan a haci un tremendo trabou den e ultimo añanan y cu kier sigui traha cu nan unda cu tin plannan grandi pa futuro cu condicionnan diferente na loke tabatin anteriormente. E ta menciona por ehempel cu como Gobierno a yega na acuerdonan caminda awor Gobierno di Aruba lo cobra un Consession Fee na aeropuerto, mirando cu nan ta den capacidad pa haci esaki, cual ta un suma di 4.5 miyon Florin den e promer añanan y e lo wordo aumenta despues na 5.5 miyon Florin.
Tambe e mandatario a bisa cu a expresa cu lo yega e momento caminda cu lo kier mira un Arubiano Hulandes como director di nos Aeropuerto Internacional Reina Beatrix y esey ta e aspecto riba cual kier traha pa logre. A palabra un structura nobo den cual e directiva di aeropuerto tambe ta bay funciona den e añanan nos dilanti, cual ta un structura casi mescos cu e structura cu tin na Schiphol Hulanda na e momentonan aki y den e proceso ey lo mester percura pa por logra tin un persona adecuado pa por ocupa e posicion di director general di nos aeropuerto.

Xiomara Ruiz MaduroOranjestad-Na momento cu e atencion di Aruba tabata dirigi riba e yegada di KLM riba biofuel, den prensa Hulandes tabata circula e noticia cu KLM, Erasmus Medisch Centrum di Rotterdam y AZV a sera un deal pa transporta patiënt di Aruba pa Hulanda pa recibi tratamento medico specialisa. Na Aruba e Ministernan Eman y Schwengle a papia di medida di AZV y a keda keto riba e deal aki cu KLM y Erasmus Medical Centrum a sera, siendo cu ta Pueblo via AZV tin cu paga.

Den e articulo “KLM gaat zieke Arubanen naar Nederland transporteren” di e corant Hulandes Parool di 18 mei 2014, a keda publica cu KLM y Erasmus Medical Centrum a sera cabes pa cuminsa transporta patiëntnan di Aruba cu mester cuido specialisa pa Hulanda. Den e articulo ta menciona cu for di 1 di juli 2014, KLM lo transporta un promedio di 150 patiënt pa aña di Aruba pa Erasmus Medical Centrum riba gasto di AZV. Ta trata aki di un prueba cu KLM kier haci den transporta enfermo for di Aruba cu e miras pa haci transporte di enfermo for di tur Pais na mundo pa Hulanda.

Remarcabel ta cu algun dia atras AZV y Minister Schwengle a bin reuni cu Parlamentarionan pa papia riba e medidanan cu dentro di poco lo keda introduci. Ta trata aki di e medidanan di 3 florin pa receptregel, e 15 florin pa bishita na Huisartsenpost y tambe e 50 florin pa uso di Eerste Hulp den e oranan scur di anochi. E instancianan aki a indica cu e medidanan aki ta necesario pa cubri gasto di cuido medico y tambe pa frena abuso di nos sistema medico. Na ningun momento a papia riba e deal entre KLM y Erasmus Medical Centrum cu AZV mester paga. No a informa Parlamento ni Pueblo di esaki siendo cu ta bisto cu e deal aki lo significa costo adicional pa AZV. Algo cu ta pone hende pensa cu si ta pa cubri e deal aki ta impone medida di e forma aki.

Ta bin aserca cu AZV den su relato anual di 2013 cu a keda publica na maart 2014, no ta menciona nada di e deal aki. Locual si ta wordo menciona ta e esfuerzonan cu AZV a haci na 2012 pa sera contract nobo cu 4 top hospital na Colombia pa su aseguradonan por recibi atencion medico specialisa. AZV a indica tambe cu pa cuido na hospitalnan na Hulanda tin un convenio cu Stichting Holland Intercare. Pues AZV tin e cuido specialisa regla caba na Hulanda y Colombia y pesey ta masha cuestionabel con diripiente prensa Hulandes ta indica cu tin un deal traha pa transporta enfermo di Aruba pa Hulanda cu KLM pa Erasmus Medisch Centrum.

Nos lo haci pregunta awor na Ministernan Schwengle y Eman pa trece claridad den e asunto aki. Specialmente awor cu tur e medidanan di AZV ta keda introduci Pueblo tin derecho di sa ta di unda a bin cu e deal aki cu KLM y si esaki lo ta mas barata of lo costa e Pueblo aki mas placa. Pasobra Ministernan ta papia di medida di AZV y ta keda keto riba e deal cu KLM y Erasmus Medical Centrum a sera y cu Pueblo via AZV tin cu paga.

Boshi Wever

Boshi Wever

Oranjestad-Sr. Nico van der Zee a cataloga Mike Eman como un Teflon-politicus.
Teflon ta e capa protector den e panchinan moderno. E capa lo percura pa e cuminda no pega na e panchi y evita cu e cuminda ta kima.
Un Teflon-politico tambe kier evita pa e wordo “kima” door di percura pa no wordo involucra den cualkier escandalo priva of politico. E ta profila su mes como e “Tata di e Pais”. Un persona cu ta para riba tur problema diario y cu un imagen y reputacion inatachabel y impecabel.
Mike Eman ta projecta su mes como e “braafste jongetje van de klas” cerca Hulanda, particularmente si compare cu e politico- y gobernantenan di Korsow y St. Maarten cu no ta ria pa vocifera nan opinion fuerte contra di Hulanda ora cu ta necesario. Den papiamento crioyo nos ta yama esaki “hipocrita”.
Pero manera e dicho ta bisa: “what goes around comes around”. Mike Eman tin un memoria basta cortico. E kier profila su mes como e “bon guy”, e politico cu tin “man limpi” cu ta willing pa aporta directamente na “su pueblo” door di pega bloki y verf cas y cu no kier mete den e discusion riba e situacion fatal di nos economia y finansas, pasobra den su concepto e discusion aki ta bow su nivel.
Mike Eman ta lubida tur e disturbio cu e y su gang di Alibaba a ocasiona na Aruba den pasado. E ta e lider di AVP cu a wordo eligi dos biaha pa lidera e gobierno di Aruba, pero awor cu problemanan ta acumulando pa su gobierno y e apoyo di Hulanda no ta incondicional mas, Mike Eman kier tuma e postura di “yo no fui” y laga otro carga cu e culpa. E ta e persona cu a delinea e maneho pa stimula nos economia di un forma completamente for di control na 2009, y e tambe ta e autor intelectual di e ultimo campaña electoral na unda a priminti di NO lo tuma medida den ningun forma, y cu lo sigui cu e maneho stipula na 2009 pa stimula e economia (Y AINDA FALTA).
Nunca a menciona cu lo mester obligatoriamente start cu un ola di medida contra e clase trahador. Ya for di 2010 y sigur 2012, Hulanda a cuminsa cansa di e “mooie praatjes” di Mike Eman y a exigi pa tuma na serio e situacion financiero defectuoso cu Aruba ta aden y cuminsa tuma medida. Mike a warda te despues di eleccion 2013, pero awor no por huy mas. Pero Mike siendo e Mike real, a cuminsa delinea un forma pa saca su curpa for di e problema aki.
Na prome lugar e ta laga otro carga cu e cacho, den e caso aki e victima a bira Juan David Irausquin y e clase trahado di Aruba. The Green Giant a cay den su trampa cu wowo habri, pero e pueblo trahado a kere den Mike Eman y apesar di ta wordo informa con malo nos ta para como Isla, toch kier dune “the benefit of the doubt”, pasobra Mike ta un bon guy.
Na di dos lugar Mike ta purba di suavisa e critica di Hulanda door di sera contractnan lucrativo pa companianan hulandes manera KLM y Philips. E ”braafste jongetje van de klas” ta bin yuda Hulanda drecha su economia!! Ken por tin algo contra? Esun cu lo sali perhudica ta atrobe Aruba y e clase trahado cu ta perdiendo trabou.
Ban spera cu mescos cu a socede na Hulanda nos pueblo habri su wowo na tempo y no laga hamber, door di e tanto medida cu e gobierno aki a tuma y lo sigui tuma, bira e motibo pakiko lo cuminsa reacciona y exigi tambe cifranan real y un maneho transparente.
Y tur e medidanan aki djis pa e keda “het braafste jongetje van de klas”, y alabes pa e privilegia e companianan grandi hulandes.
Y loke falta ainda!!

 

Moritz&Liliana

Moritz&Liliana

Oranjestad – Diabierna ultimo, e prome edicion di e buki pa hoben tocante e naufragio mas grandi den region Caribense “E Antilla” a wordo entrega na Ministro di Enseñansa y Famia, sra. Michelle Hooijboer-Winklaar. Ministro, y tambe e patrocinadornan ta ricibi e edicion special aki gratis. Interesadonan, coleccionistanan y lesadornan ferviente por cumpra e buki, al menos cu nan ta den e di cinco aña escolar di scol primario. Desde diamars, dia 20 di mei, e bukinan aki lo wordo entrega personalmente na tur mucha di klas 5 riba e isla.
E idea pa crea un buki tocante E Antilla ta procedente di e artista Suiso, Moritz Ebinger. E storia cu a wordo abundantemente ilustra dor di dje y cu ta aparece den papiamento, hulandes, ingles y spaño, a wordo skirbi pa e autor Arubiano Liliana Erasmus. Danki na e siguiente patrocinadornan local e edicion unico aki por a wordo realisa:
Ike Cohen Charity Foundation, unoca, VNO, Dermatology Clinic – Dr. Lampe, Ateliers’89, Wibe Para, KIA, De Wit & Van Dorp, Jads Duikcentrum, Ministerie van Onderwijs en Gezin, het Arubahuis.
For di Hulanda e.o. Mondriaan Fonds, Stichting Stokroos y Nederlandse Letterenfonds.

“Mi ta kere cu muchanan ta desaroya nan idiomanan mihor y cu mas placer na e manera ‘ki. Mi ta spera cu danki na e buki aki nan lo bira mas orguyoso ainda di nan herencia cultural y bentaha unico di por lanta multilingual,” segun iniciador di e proyecto aki, Moritz Ebinger.
E buki ta conta e historia di “E Antilla” cu un twist imaginativo. E barco di carga aleman cu den Segundo Guera Mundial a wordo hundi pa e capitan net dilanti e costa di Aruba pa asina evita cu e lo cai den man di e enemigo. E tripulacion a wordo captura y a pasa e guera den prison na Boneiro. Despues di guera e capitan a sambuya su pertenencianan for di e barco y a cuminsa den su ex prison, e prome hotel antiyano – of asina e leyenda ta conta. E naufragio di S.S. Antilla keto bai ta ubica den mas o menos 14 meter di profundidad dilanti e costa di Aruba.

Ademas di e bunita texto cu ta brinda hobennan un pida historia di Aruba, tambe e buki ta ofrece nan un encuentro unico cu Arte. E pinturanan anima y potretnan di bou awa cu ta inspira, ta parti di un proyecto anterior di artista plastico Ebinger, cu añanan atras a siña bucea na Aruba. E sculpturanan cu el a traha, cu el a depone cuidadosamente y fotografia durante su estadia, tabata e topico di su exposicion di arte e tempo ei. Awe e obranan di arte submarino aki a haya un lus di dia nobo den forma di un buki profesionalmente produci cu 104 pagina colorido y yen di echonan historico, fantasia y pinturanan inspirador.
E buki ta na benta na Aruba for di diaranson pa 22 US dollar na De Wit & Van Dorp, Bruna, Plaza Bookstore, Charlie´s Bar y Artistic Boutique y tambe directamente via Moritz Ebinger y Ateliers’89. HYPERLINK “https://www.facebook.com/Ateliers89”

Boshi Wever

Boshi Wever

Oranjestad-Den un articulo anterior mi a trata di splica pakiko e empleado publico no ta e motibo pakiko nos finansas publico ta na filingrana. Al contrario, e empleado publico merece elogio pa ta e ciudadano ehemplar cu ta aportando grandemente na nos economia, invertiendo su salario aki na Aruba mes, y NO mandando su salario casi completo pa exterior, manera e personanan cu recientemente a ingresa den nos forsa laboral pa medio di entrada ilegal na Aruba, y yuda door di nos gobernantenan y cierto comerciantenan!

Mike Eman, Juan David Irausquin, y awor aki tambe e presidente di Camara di Comercio kier keto bay fomenta odio contra e empleado publico, y e modus operandi aki ta cuadra perfectamente den e strategia diseña ya añanan atras door di Machiavelli.
E strategia ta yama “verdeel en heers”: laga e clase trahador no forma un bloke, si no mas bien purba di kibra esaki door di laga nan pleita cu otro.

Lagami duna algun ehempel.
Na prome lugar tur atencion awor aki ta riba e accion di sr. Rocky Kelly. Mester kibra e atencion cu e ciudadano aki ta haña, pasobra e ta logrando union den e pueblo (cu ainda ta dividi) cu ta desea di sa mas di e disaster financiero cu e gobierno aki kier tapa cueste loke cueste.
Un otro ehempel ta e “bishita di cortesia” cu nos Min.Pres. ta hasi na “su pueblo” pa trata di demostra su “grandesa” (y no di su otro coleganan minister), y trata asina atrobe di desvia e atencion for di e problema financiero, pasobra “Mike the great” t’ey pa atende bo caso personalmente y directamente. Obviamente e unico proposito atrobe ta pa tapa wowo di hende pa e situacion penoso cu Aruba ta aden awor aki y kibra e posibel union di nos pueblo.

E ultimo ehempel ta concerni e empleado publico cu ta sperando riba su “bevordering”.
E empleado cu a cumpli cu e rekisito y exigencianan pa merece un “bevordering”, no lo bay hanja esaki pasobra no tin placa!
E “verdeel en heers” ta sinta den e hecho cu gobierno lo kier bay tira culpa riba e “arbeidscontractanten”, pasobra pa no manda tur cas, lo mester bay yega na un areglo cu tal “arbeidscontractanten”.
E areglo aki lo bay costa placa, cu notin, y asina Mike y Juan David lo bay argumenta cu no por duna e “bevordering” na e empleado publico. Resultado ta cu e empleado publico lo tira e culpa riba e “arbeidscontractanten”.

Gobierno lo ta “de lachende derde”, pasobra e no lo sinti e rosea cayente di e pueblo mas, pero Mike Eman ta lubida cu pleito y puntamento di dede aki por resulta tambe den actonan manera esun di sr. Rocky Kelly cu na final di cuenta lo no beneficia Aruba.

Sindicatonan, ta yega tempo pa habri wowo y anticipa e posibel problema aki door di atende gobierno riba nan responsabilidad.

E empleado publico cu merece su “bevordering”, no mag di wordo perhudica pa motibo di e derochamento di placa y e shownan di e gobierno aki.

Ministro Otmar Oduber

Ministro Otmar Oduber

Oranjestad-Diabierna atardi na Aruba Driving School Minister Otmar Oduber hunto cu propietario di Aruba Driving School Jairo Maduro a hasi apertura di e prome “Driving Simulator” pa e region di Caribe y Latino America.

Un proyecto cu sigur a tuma su tempo pero despues cu e ekipo a prueba su mes na Hulanda y Dubai, awor Aruba ta haya e oportunidad unico aki pa hasi uso di e simulador. E simulador ta un tool pa entre otro tur persona cu ta bay siña pa core auto, bus y truck.

Tambe e ta recomendabel pa manehadornan cu ta den pocision di un rijbewijs pa mehora nan forma di core nan vehiculo.

Jairo Maduro di Aruba Driving School a duna di concoce cu e simulador ta na disposicion tambe di tur otro Rij School na Aruba cu kier hasi uso di dje pa nan studiantenan.

E systema por wordo poni na Hulandes of Ingles unda cu e studiante ta haya diferente situacionan den trafico y na final e systema ta saca e resultado specifico riba papel. Di e forma aki e studiante sa exactamente unda e tin cu mehora. E simulador ta hasi uso di camera tambe unda cu e por detecta si e chauffeur a hasi uso di su spiel pa mira bon si tin trafico.

Na Aruba nos ta mira cu tin demasiado accidente di auto y tambe hopi chauffeur ta core den un forma agresivo.

Cu e simulador aki Aruba Driving School kier aporta na un trafico mas sigur riba nos isla unda cu por salba bida y tambe baha e daño material. E systema por wordo usa tambe pa trainingnan pa personal di Polis, Brandweer y Ambulance. Tambe por duna training di slip.

Aruba Driving School ta un scol inovativo unda cu por ehempel no ta siña e studiantenan e parti di teoria via un mesa. Tur cos ta sosode den un forma digital unda cu tin diferente benificio. Aruba Driving School ta situa na Ponton 54-A cu telefon 7375500 pa mas informacion y tambe riba facebook: Aruba Driving School.

Pa diabierna ultimo di Sindicato di Maestro di Aruba a yama un reunion extraordinario urgente pa trata e temanan indexering/inhaalmanoeuvre y posibel aumento di edad di pensioen. Pa e reunion aki no tabata tin quorum. Directiva a duna esunnan presente un relato cortico di negociacionnan cu a tuma luga y un splicacion di e ultimo proposicion di Minister Yrausquin. Tambe a papia di e situacion pa cu APFA y aumento di edad di pensioen na 65 aña. No a habri discusion ni a permiti pa haci pregunta, ya cu segun statutonan sin quorum no por tuma decision.  E di dos reunion lo ta DIAMARS 13 di MEI 7:30 pm.  Den e reunion aki lo amplia mas riba e temanan y lo dicidi
hunto si ta acepta e proposicion cu ta riba mesa.

SIMAR ta urgi tur su miembronan y tur otro trahado den enseñansa pa bin scucha, duna opinion y yuda pa tuma un decision responsabel. E situacion aki ta hopi delicado y ta trata di BO DERECHO, BO CARTERA y BO FUTURO. P’esey, SIMAR ta conseha tur trahado den enseñansa cu no ta miembro ainda, pa pasa durante oranan di oficina na sede di SIMAR pa inscribi. Inscripcion tambe ta posibel e anochi di reunion.

Un boca bisa otro. Yuda plama e informacion di e yamada aki via facebook http://www.facebook.com/sindicatodimaestro, twitter @SindicatoSIMAR y e-mail. Subi nos website http://www.simar.aw pa mas informacion y inscribi no mes pa ricibi tur noticia pa medio di nos sistema automatisa di manda mensahe Noti-SIMAR. Tambe por di manda un e-mail cu bo informacion na directiva@simar.aw.

Wak pa bo ta presente, pa otro no dicidi pabo.

Otmar OduberOranjestad-E candela cu Sr Rocky Kelly a sende riba caminda tin AVP spanta. Nan no a biba pensa cu despues di tin mayoria prensa y sindicato bou control ainda lo tin hende cu ta durf pa mustra nan disgusto abiertamente. Sigur nan no a tene cuenta mes cu ora hende fada cos por sali for di man y bira radical. E miedo aki ta pone AVP desvia atencion y busca algo pa ataca MEP cune. Pesey nan a core bay loer riba facebook di nos Lider y a topa cu su post riba e acto di Rocky y mesora a haci un drama di dje pa hende no cuestiona AVP, pero ataca MEP. Den nan ata Minister Otmar Oduber a core scirbi comunicado di prensa pa cuestiona con Lider di MEP ta sostene acto criminal sabiendo cu ta algo cu ta perhudica nos turismo. Minister Otmar mester compronde cu nos Lider no ta manera bo, e no ta sostene actonan criminal y tampoco ta sostene actonan cu por perhudica nos turismo. 

 

Pero Minister Otmar net abo ta cuestiona? Acaso Minister a lubida riba e bodyguard cu a horta cellular di turista? No ta e bodyguard aki ta cana rond di Minister? No ta e mesun persona aki ta na cabes di security na Santa Rosa? Ta con bo ta durf di cuestiona si bo mes ta sostene hende cu ta horta turista?

 

E caso di Strawberry Gate tambe ta fresco den nos memoria, con Minister a firma MOU cu un criminal cu a tira varios atraco rond nos Isla y perhudica compania local. Hasta den dia cla anto den zona cu yen di turista. Acaso e atraconan aki no ta haci danio na turismo di Aruba? Ta casi imposibel pa kere cu nos mesun Minister di Turismo ta sostene hende cu ta horta turista y local, pero ata dos ehempel aki caba. Dios sa cuanto ehempel mas tin scondi of cu ainda falta!

Dus Minister Otmar Oduber no bin busca cos fofo pa tilda nos Lider cune. Bay tira bista cu ken bo ta gasta placa di belasting y zorg pa nan no sigi ehempel di bo brothernan.

family-cancer-insurance

Oranjestad-Ta hopi dificil ora un hende keda diagnostica cu cancer. Hopi bes banda di esaki, ainda mayornan mester pensa ta con nan ta bai bisa nan yiunan cu nan of un otro ser keri tin cancer. Nan tin miedo di e forma con e muchanan lo reacciona. Con hoben cu un mucha ta, un cos ta sigur y esey ta cu e por sinti cu algo no ta bon. Si bo no informanan kiko ta pasando, nan por asta bai imagina cosnan mas pio di loke e situacion ta. No ta facil, pero ta esencial pa splica un mucha kiko ta pasando cu su ser keri.

Den un serie di articulo Koningin Wilhelmina Fonds Aruba lo duna splicacion riba kiko pa haci den situacionnan specifico. E siman aki nos lo enfoca riba con pa papia cu un mucha riba e diagnostico di dokter. Bon comunicacion cu e mucha ta esencial pa asina yuda e famia deal cu e situacion mihor.

Ta hopi importante pa papia habri cu e mucha desde un comienso. Asina cu e adulto ricibi e diagnose di dokter e por cuminsa splica e mucha den un forma cu ta apto pa su edad. Ora bo comparti informacion cu e mucha desde tempran, esaki lo haci e experiencia aki menos spantoso p’e. Esaki no kiermeen cu papia di cancer ta facil. Sigientemente algun tips na momento cu bo tin cu papia cu un mucha over di cancer:

1. Prepara di antemano kiko bo kier bai bisa
Hopi mayor ta haya mas facil pa papia cu e mucha si nan a prepara esaki di antemano of a scirbi tur loke nan kier bisa. Tin mayornan ta haya mas facil si nan pareha of un otro persona di confiansa ta hunto cu nan. Tambe ta mihor si e momento cu bo escohe pa papia cu e mucha ta uno trankilo y cu tur hende ta calmo. Si bo tin yiunan di diferente edad, ta mihor pa papia cu esnan mas biew prome. Kisas asta nan lo kier yuda na momento cu bo mester bai papia cu esnan mas chikito. Trata di tene e conversacionnan aki no mucho apart di otro ya asina tur hende ta na altura di e situacion y por sostene otro.

2. Determina e tono den cual bo ta bai hiba e combersacion
Mesun importante cu e contenido di e combersacion, ta e tono den cual bo ta hiba e combersacion. Uza un tono di voz calmo y sigur. Asta si bo gemoed yena y bo bira tristo, esaki lo yuda e mucha mira cu bo ta purbando di deal cu e situacion. Si bo yiunan bira overstuur y nan kier bai, bisanan cu bo ta compronde cu e combersacion aki no ta uno facil y cu e ta dificil pa nan tambe. No papia mas largo cu nan ta dispuesto pa scucha. Corda cu mucha chikito tin un attention span mas cortico.

3. Considera e edad di bo yiu
Corda cu cada edad ta compronde cosnan na un forma diferente. Ora bo papia cu e mucha, percura pa esaki ta na un nivel cu e por compronde. Uzando un vocabulario comprendibel y cu e mucha ta custuma cune, ta haci cu e lo compronde e situacion mihor. Usa palabranan simpel y terminonan concreto. Ta hopi importante pa bo splica e mucha cu cancer no ta contagioso. Muchanan chikito hopi biaha ta pensa cu ora bo ta malo ta trata di algo cu ta pega. Splicanan cu nan por brasa y sunchi nan ser keri sin ningun problema.

Si e mucha tin pregunta, prepara pa contesta nan preguntanan y splicanan kiko cancer ta, ki tipo di cancer bo tin y unda bo tin e. Splica mihor cu bo por y no splica e cosnan mas dificil di loke ta necesario. Si bo no sa un contesta, bisa e mucha cu bo lo contest’e despues.

4. Pidi asistencia profesional
Si bo mester di guia profesional prome cu bo papia cu bo sernan keri, no duda na tuma contacto cu un instancia profesional. Bo por papia cu bo specialista of un otro persona di confiansa. Bo por aserca Koningin Wilhelmina Fonds Aruba tambe pa guia y asistencia. Nos tin gruponan di sosten unda cu bo por papia cu otro hendenan cu a pasa den experiencianan similar y asina boso por comparti experiencia y yuda otro. Tambe nos tin foyetonan cu informacion riba diferente topico cu por yudabo den e momentonan cu mester di dje. Bo por pasa na nos Centro di Informacion na Spinozastraat 9 of tuma contacto cu nos via nos FaceBookpage Koningin Wilhelima Fonds Aruba. Tambe por yama na 5820412.

 

xiomara Ruiz Maduro

Xiomara Ruiz Maduro

Oranjestad-Den e dianan aki cu e berdad ta sali na cla riba e mal maneho financiero hiba y e promesanan falso haci pa e exponentenan di Gabinete Eman, nos por ripara cu nan ta haciendo un esfuerso grandi pa scapa nan cara di berguensa door di tira culpa riba MEP.

E ta conoci cu debi na e mal maneho financiero di Gabinete Eman awe e finanzas publico di nos Pais ta pesimo y ta contando cu cifranan di deficit y debe nunca antes bisto segun Banco Central. Danki na e mal maneho aki, awe nos Pais ya a wordo degrada internacionalmente pa e companianan di rating Standard and Poors y Fitch. Pa no papia mes di e rapport devastador di IMF cu Gabinete Eman a purba tene scondi aña pasa. Pero e mas tristo ta cu e Pueblo di Aruba danki na e iresponsabilidad y incapacidad di e exponentenan di Gabinete Eman awe mester sufri bou medidanan severo cu ta limita e progreso di nos Pais. E ta lamentabel pa constata cu asina mes cu cifranan di Banco Central ta demostra cu ta Gabinete Eman ta esun a hinca nos den un abismo financiero, awe su mandatarionan y parlamentarionan kier core pa nan responsabilidad manera gran cobarde y ta busca tur forma pa culpa partido MEP pa nan errornan.

Asina bo ta haya nos Minister Eman cu na final di cada speech of articulo di prensa kier baha su gal y tilda MEP pa su propio fracaso como gobernante ya cu su vision di gasta placa pa acomoda amigo y sponser di campania a resulta den un pobresa nunca antes bisto di e Pueblo di Aruba. Nos Minister De Meza bou guia di Minister Eman tambe a contribui na dania e stabilidad di nos finanzas publico te hibe na e extremo cu awe Hulanda ta pone condicionan severo pa nos Pais por presta placa riba mercado internacional. Algo cu normalmemte tabata un formalidad awe ta bira un discucion hasta den Tweede Kamer, ya cu ta teme cu e mal maneho financiero hiba na man di Gabinete Eman lo ta pone cara di Hulanda y Reino na berguensa. Pero e ex mandatario di finanzas aki cada bes kier tira culpa riba MEP pa su fracaso, sin realisa cu e cifranan ‘on his watch’ ta mustra su propio incapacidad pa maneha e cartera di e Pais aki. Sin laga afor nos Minister Oduber cu su defensa fofo pa tilda MEP di friends and family y di huurmento di tanchi y papa, siendo cu bou di su mesun wowonan fixmento grandi di amigonan y sponsernan di campania ta tuma lugar cu placa di Pueblo sin cu e ta bisa nada. Mira por ehempel e huurnan cu ta wordo paga pa acomoda Rietveld Academie na Aruba. Dicon Minister Oduber no ta exigi pa nan keda cancela? Dicon e mandatario no tin curashi di publica e lista nobo di huur pa Pueblo por compara y saca su mesun conclucion si ela bira menos of mas? Pa no papia mes di esnan rond di e mandatario cu di un dia pa otro ta enrikese nan mes via dealnan cu gobierno. Eynan si tin silencio grandi, sin papia mes di e tenemento di man cu hendenan sentencia pa trafico di arma cu ta tira atraco y perhudica nos Pais, pero cu ta wordo yuda si cu placa di Pueblo. Acaso nos Minister Oduber su firma a wordo falsifica? Of esaki si ta haci dolor y pesey no tin curashi pa papia di dje mescos cu Minister Eman no tin curashi pa papia di su tenemento di man cu Kiko Gomez?

Esaki ta djies algun ehempel di e cobardia di nos mandatarionan pa bisa e berdad y admiti e error cu nan a faya di maneha e finanzas publico na un manera responsabel na bienestar di nos Pueblo. Tildando y tirando culpa riba MEP no lo haci boso responsabilidad menos y tampoco no lo libra boso di e reproche di nos yuinan y nietonan pa a limita nan futuro danki na e megadebe cu boso a pone riba nan lomba. Sikiera pa respet pa nan cara mustra cu boso ta homber tambe pa admiti boso propio error y no purba scapa cara manera un cobarde tirando culpa riba MEP.