Johnnyhabibe-Anchorman

Oranjestad-Biblioteca Nacional ta organisa su Programa Vacacional di Lesamento pa asina promove buki y lesamento, manera tur aña. E aña aki a scohe pa e participantenan mes scohe un buki y conta locual el a lesa.

Esaki lo tuma lugar tur diahuebs den luna di juli, cuminsando dia 10 di Juli te cu dia 24 di Juli,
na Verteltoren na Biblioteca Playa. Na Biblioteca San Nicolas di dia 9 di juli te cu 23 di juli.
E ta pa muchanan di 8 – 12 aña di edad. E orario lo ta di 3 pa 4 or di atardi.

Clausura ta na Playa diahuebs 31 di juli y na San Nicolas diaranson 30 juli, unda ta bay tin un progama special pa e muchanan cu a participa durante e 3 simannan

E muchanan mester bin biblioteca prome cu diabierna dia 4 di Juli pa nan por fia tres buki pa e programa. Nan mester ta miembro di Biblioteca Nacional Aruba. Si nan no ta miembro ainda por registra como miembro, e mayor ta trece un ID valido y kaarchi di AZV di e mucha.

ORANJESTAD: Diasabra anochi Colegio San Nicolaas a organisa un celebracion pa e graduadonan 2013-2014 den ballroom di Phoenix Hotel, pa e ocasion aki a invita Minister Dowers, ex titular di Enseñansa, pa haci entrega di diploma na e mihor graduado di HAVO,
srta. Sheelah Arends.
Un Minister Dowers hopi orguyoso a comenta. Colegio San Nicolas (HAVO) a logra un resultado di 68%, cu ta hobennan cu pa prome bes a pasa den un examen. “E ta un resultado historico y e ta mas miho cu Colegio Pabou, cu ta algo cu e hobennan y Colegio San Nicolas por ta orguyoso di dje,” e mandatario a duna di conoce.
Pa Minister Arthur Dowers tabata un honor di a wordo invita pa haci entrega di diploma na graduadonan di Colegio San Nicolas. No solamente pasobra e graduacion ta un momento special den bida di e hobennan, pero tambe pasobra como ex Minister di Enseñansa e tabata para hunto cu e scol momento cu nan a cambia di un dependance pa un HAVO completo pa studiantenan di pariba di brug.
“E ta algo grandi,” e titular
a bisa despues di entrega di e diplomanan. “No solamente pasobra mi tabata na cuna di e proceso aki cu mi ta asina contento, pero ora cu como pais dicidi cu Enseñansa ta un di e cosnan cu tin prioridad den e pais aki, e momento aki nos a demostra cu esaki ta e caso,”
Minister Dowers a expresa e deseo cu loke cu wordo sembra na Colegio San Nicolas por sirbi como ehempel pa otro scolnan na Aruba.

El a splica cu na momento cu e decision a wordo tuma cu Colegio San Nicolas ta bira un scol completo, cu cuatro aña completo di HAVO, no tabatin e luho ni exigencia di infrastructura cu tabatin mester di dje, “pero tabatin un grupo di persona sumamente dedica y cu un pasion grandi pa logra e resultado aki pa nos yiunan.” Alabes, e bon resultado di Colegio San Nicolas a demostra cu no tur cos ta draai rond di infrastructura, pero e dedicacion y amor cu e docentenan y studiantenan tin pa e scolnan. Inclusive e prome bukinan a wordo paga door di Ministerio di Husticia y Enseñansa como cu e scol no tabatin presupuesto ainda. “Pabien pais Aruba, San Nicolas, graduadonan, docentenan y rectorado.”

ORANJESTAD(AAN)* Awe, un team fuerte di natacion arubano lo participa na e maraton di landamento na Suriname. E aña aki 9 landador local ta participando, di cual e campeon di aña pasa Renze Postma, kende e aña aki tin intension di mantene su liderasgo den e maraton di Staatsolie Suriname.
E trayecto ta di 18 km banda di e rio di Domburg pa e competencia di natacion di awanan habri pa Paramaribo. E evenemento aki unico aki den regio y participacion na e maraton di landamento ta exigi un cantidad di ora di entrenamento, disiplina, forza di boluntad y dedicacion. Pero door di train hunto, ta traha hopi motiva y cu ta contribui na bon resultado na Suriname.
E equipo di landadornan ta consisti di Renze Postma (campeon 2013), Sandra Postma, Dillon Willems, Carolina Perez, dr. Johnny cheng, Romar Arendsz, Jan Roodzant, Carlo Mansur y Virgil Azizahamad.
Esaki ta e di 40 edicion di e maraton di landamento cu lo bira special cu mas ganadornan anterior. E atletanan mes ta cubri nan gastonan, pero cu sponsor di Insel Air, PwC y CMB e gastonan ta wordo teni abao. Aña pasa Aruba a participa cu 11 landador, di cual a logra e prome lugar cu Renze Postma, mientras na 2012 ela participa tambe y tabata den e favoritonan.

Oranjestad-Den torneo di pesca di Dia di Piscado 2014, e di 20 torneo anual aki, a sali pisca un total di 29 boto den 2 categoria y entre e casi 20 boto cu a bolbe pa pisa pisca, a registra un total di 952 kilo y mey di pisca. Publico grandi a presencia e evento na Hadicurari y a probecha pa cumpra pisca fresco como tambe disfruta di platonan sabroso den e festival di cuminda di lama di Santa Rosa. Directiva di fundacion Centro di Pesca Hadicurari ta sumamente satisfecho y agradecido na e participacion masal di piscado como tambe publico.
Minsiter Otmar Oduber a haci acto di presencia y simbolicamente a duna inicio na e renobacion di e pier y tambe a felicita tur piscado di Aruba cu nan dia y alabes a recorda esnan cu a bay laga nos y no a regresa. E monumento pa e piscado perdi ta luci Linear Park y ta brinda oportunidad pa recorda nos piscadonan y duna nan e lugar mereci den curason di nos pueblo y bishitante.

Bon Samaritano:
A duna un premio incentivo pa bon samaritano na e boto Royal Blue di Capitan Rendy “Topo” Loopstok y tripulantenan Ike, Everell, Ronny y Buchi. E boto Royal Blue a interumpi su competencia pa yuda e boto Jerz cu a confronta problema riba lama y touw e boto te na pier pa despues sali pisca bek. No ta prome biaha cu e boto Royal Blue y Capitan Topo ta sali sin pensa dos biaha pa yuda hende riba lama. Pa esaki fundacion Hadicurari a otorga nan un premio special e biaha aki.

Baluarte:
A reconoce srs. Beaumont, Jacobs y Geerman pa baluartenan di piscamento pa nan logronan y historia largo pa cu piscamento di Aruba. E baluertenan a ricibi un plakaat di Hadicurari como recuerdo. Sr. Ernulfo “Gunchi” Beaumont ta un conocido piscado di San nicolas cu e boto mas recien Rosalinda ta luci pa decora Rodgers Beach. Sr. Karel Randy Jacobs, piscado cu ta mara na Hadicurari pa hopi aña a ricibi su reconocemento bon mereci for di presidente di fundacion sr. Nilky Kock. Por ultimo sr. Victoriano Geerman tambe a haya un reconocemento special pa su logronan den piscamento.

Gandornan mayor ehemplar:
Mayor ehemplar Pishiporco tabata pa e boto Xavier di capitan Randolf Wolff cu un ehemplar di 2 kilo. Mayor Mulato a bay pa Royal Blue di Randy Topo Loopstok cu un mulato di 11 kilo. Mayor Picuda tabata un ehemplar di 14.5 kilo di e boto Flory’s Fly di capitan Wendy Kock. E rey di djampou cu e ehemplar di 23 Kilo tabata e boto Ayiana di Randolf Paskel cu a ricibi premio di Boat and Fishing Paradise di 350 florin mas 100 florin di Jays Tire Repair y 125 di Centro di Pesca Hadicurari. E mayor ehemplar overall di e torneo a bay pa Ayiana di capitan Randolf Paskel tambe cu marcacion di un Brazi di nada menos cu 23 kilo.

Ganadornan categoria Crioyo:
Na tercer lugar a keda e boto Daynalis di Capitan Joselito Wolff cu 22.250 kilo di pisca. Na di dos luga a keda e boto Vilensca di capitan Omar Andrade cu a mata 50.5 kilo. E ganador na prome luga a bay pa e boto Xavier di capitan Tico Wolff cu 69 Kilo. Ademas e boto Xavier a bay cu e pot y tambe e premo estimulo pa boto tipico crioyo.

Ganadornan categoria Open:
Na tercer lugar a keda e boto Tonino di capitan Leo Briezen cu 130 Kilo registra. Na di cos lugar a keda e boto Gabriela di Capitan Elvis de Cuba cu 149 kilo di pisca. E ganador absoluto den e categoria open como tambe mas kilo den henter e torneo tabata e boto di e unico capitan femenino Wendy Kock di e boto Flory’s Fly cu a gara nada menos cu 236 Kilo di pisca. Tambe Flory’s fly a bay cu e pot di piscadonan cu a suma 600 florin efectivo.

Danki:
Comision organisador y Fundacion Centro di Pesca Hadicurari y Santa Rosa ta gradici tur hende cu a haci esaki posibel y particularmente nos sponsornan adicional Hadicurari Restaurant, Nos Clubhuis bar restaurant, Boat and Fishing Paradise y Jays tire repair. Un danki ta bay pa Search and Rescue Aruba (SARFA) cu a yuda vigila y brinda prome auxilio. Danki na personal di Santa Rosa, Ministerio di Turismo, Labor y Transporte y tur otro persona cu a yuda haci e dia exitoso.

Oranjestad-Na e momento cu Gobierno a institui Dialogo Social a pone Parlamento un banda. Dialogo Social no ta un organo legal segun nos Staatsregeling.
Gobierno a traha presupuesto 2014 y a mande, ainda despues di consehonan negativo di Conseho Social Economico (Sociaal Economische Raad) y Conseho Consultativo (Raad van Advies) directamente pa Gobernador , como hefe di estado di Aruba pa e firma pasobra den e funcion ey gobernador no tin responsabilidad politico (politieke verantwoordelijkheid). Gobernador a purba di scapa cara di e prome ministro y ministro di Financia (Gobierno) dor di mande tur 2 biaha bek.
Gobierno a dicidi pa manda e presupuesto e ora ey na Parlamento pa aprobacion. Parlamento a aproba e presupuesto cu su mayoria di 13 voto. Y despues Gobierno bolbe hiba e presupuesto 2014 pa Gobernador firma pasobra ta Parlamento su mayoria a aproba esaki. Gobernador na su turno a nenga di firma e presupuesto aki segun articulo 43 di nos constitucion (Staatsregeling). Un presupuesto cu ta trapa riba e Tratado di Derechonan Humano dor di trece baby y muchanan cu ta cay bao supervision di hues, personanan cu limitacion, pensionadonan cu derechonan adkiri den peligro di hamber, pobresa y miseria (genocida). Dunando asina Gobierno y Parlamento un mocion di desconfiansa. Fuera di esaki ya caba ministro di Finansas a haya supervision di Comissie Financieel Toezicht (CFT) di Koninkrijksministerraad. Esaki kier men cu CFT a pone Parlamento y Gobierno bao curatela. Pa e motibo cu Gobierno no por produci un presupuesto cu ta cumpli cu e Comptabiliteitsverordening di Aruba, cu ta un ley masha halto mes den nos constitucion (Staatsregeling). Y di con Parlamento ta bao curatela pasobra nan no tabata capaz y capacita pa analisa, controla y coregi e presupuesto aki. De facto nan a duna nan mes un brevet van onvermogen y haci nan mes obsoleto.

Y peor ainda nan e celebra e aprobacion di e presupuesto devastador aki na grandi den parlamento. Unda e prome ministro y hefe di fraccion di coalicion y presidente di parlamento a brasa y sunchi otro.
Analisando henter e asunto aki mester urgi e gobierno aki pa tuma su retiro, pasobra e no ta capaz pa goberna e pais Aruba. Y mester urgi e coalicion pa entrega nan retiro na gobernador y disolve Parlamento. E otro sugerencia ta na e parlamentarionan di oposicion pa nan tambe pidi nan retiro na gobernador pa asina demostra Hulanda cu nan no ta forma parti di e poppenkast aki.
Y pidi Gobernador pa proclama un eleccion den 3 luna. Y pa instala un zakenkabinet pa un periodo di 6 luna pa asina inventarisa tur proyectonan cu tin y gastonan y debenan cu tin pa asina por traha un presupuesto realistico y un programa di prioridad cu por saca e pais Aruba for di e crisis aki.

Ministro Oduber 3

Oranjestad-Diahuebs mainta Minister Otmar Oduber tabatin un reunion cu Katharine Monahan, Market Vice President di The Ritz Carlton. Mester bisa cu e reunion a bay den hopi bon ambiente unda cu e mandatario y e ehecutivo di e cadena di hotel a intercambia di opinion riba diferente punto.
Un di e puntonan principal riba cual a conversa ta e importancia di por conta cu un Ritz Carlton na Aruba, cual ta contribui na eleva e calidad di e producto cu nos ta ofrece na nos bishitantenan.
Maneho di Gobierno ta pa eleva calidad di nos producto y dor di esaki por aumenta e cantidad di turista cu ta bishita nos isla cu tin un mayor poder di compra.
E enfoke cu tin na e momentonan aki pa loke ta trata turismo ta riba e bishitantenan afluente, cual ta cay den e categorianan di entrada anual di 100 mil Dollar, 125 mil Dollar y 150 mil Dollar y mas halto. E calidad di bishitantenan aki cu ta gasta mas y ta buscando un producto di calidad, hunto cu tur e mehoracionnan cu a bin ta wordo realiza no solamente pa Gobierno, pero tambe pa sector priva, Aruba por logra esakinan. E presencia di The Ritz Carlton ta trece un ingrediente adicional na e formula di por ofrece nos isla como un destinacion di cinco strea.
Sra. Monahan a mustra su complacencia pa e cambionan cu ta tumando lugar y a indica cu The Ritz Carlton ta contento di por ta manehando un propiedad na Aruba y ta premira un relacion pa hopi aña cu Aruba.
Despues di e reunion, Minister Otmar Oduber a haci entrega di un regalo na e Market Vice President di The Ritz Carlton.

Ministro Oduber

Oranjestad-Siman pasa Minister Otmar Oduber tabata presente na e groundbreaking di e proyecto di Paradera Valley, un proyecto cu sigur lo contribui na desaroyo di Paradera. E lo conta cu un supermercado, un pomp di gasolin y algun tienda mas.
Minister Oduber a indica cu e ta hopi contento cu e proyecto aki riba cual el a papia pa basta tempo caba cu e desaroyadornan y inversionistanan. El a recorda cu e iniciativa aki a bin dilanti na momento cu na Centro di Bario Piedra Plat a anuncia e e proyecto di Paradera Corridor. Un di esnan cu a bin dilanti na momento cu a acerca varios comerciante e tempo ey tabata famia van Romondt cu a presenta e proyecto cu a inicia siman pasa.
E mandatario a bisa cu e ta contento cu mas o menos 1 aña despues nan a cumpli cu esaki y cu lo engrandece e desaroyo cu ta tumando lugar na Piedra Plat y Paradera. Mirando cu den cercania no tin ningun pomp di gasolin bin cu un eynan ta un bon idea y cu lo conta tambe cu un supermercado cu nan ta carga e branding di dje caba tanto na Noord y San Nicolas tambe lo wordo ubica eynan, ademas un restaurant di fast food. “Mi ta kere cu esaki ta duna un balor adicional na e desaroyo cu ta tumando lugar na e bario”, Minister Oduber a declara.

Ministro Oduber

Oranjestad-Diadomingo Minister Otmar Oduber tabata presente na Centro di Pesca Hadicurari pa celebra hunto cu piscadornan di Aruba Dia di Piscador, ademas a duna inicio na e proyecto di renovacion di pier di Hadicurari.
E dia aki tabata reina un tremendo ambiente unda cu no solamente piscadornan di Aruba tabata presente, sino tambe un cantidad grandi di personanan cu a bin celebra Dia di Piscador na e tremendo actividad organiza pa Centro di Pesca Hadicurari y Santa Rosa.
E biaha aki Mercado di Santa Rosa a bay Hadicurari pa asina comparti hunto cu e piscadornan e dia special aki.
Minister Oduber a cuminda y conversa cu varios piscador unda el a felicitanan riba nan dia y a mustra su aprecio pa e ofishi cu nan ta realiza, manteniendo e tradicion aki bibo den nos cultura. Ta importante pa menciona cu por a mira un cantidad grandi di hoben cu ta dedicando na e ofishi di piscador, un herencia cu ta siguiendo di generacion en generacion, mustrando asina cu nos sector primario (pasobra esaki ta tuma lugar tambe den agricultura y cria) ta rebibando den nos comunidad.
E dia aki tabatin otro ingrediente special, particularmente pa e piscadornan di Noord. Minister Oduber a duna inicio na e proyecto di renovacion di e pier di Hadicurari, cual despues di diferente pier rond di nos isla cu a wordo renova y amplia, a yega na beurt.
E mandatario a expresa cu e ta hopi contento di por duna inicio na e renovacion di otro pier, cual ta contribui na e mehoracion di e condicionnan pa cu e piscadornan, den e caso aki, e piscadornan di Noord.

Playa Pabao – Directiva di Centro di Bario Playa Pabao ta participa na mayornan y muchanan di Playa Pabao y di Aruba en general cu tur cos ta cla pa nan Plan Vacacional 2014 cu e aña aki tin e tema mundial 2014. Nos plan vacacional ta cuminsa dialuna 7 di juli y ta termina diabierna 18 di juli y su orario ta mainta 8’or pa 12’or.

E programa ta hopi varia cu entre otro “community pool”, bishita na Parke Arikok y Yaburibari, pannabol, un mainta di informacion cu lo trata termento y hopi actividad mas tanto paden como pafo di centro. Nos plan vacacional ta pa muchanan di 4 pa 12 aña y ta costa 100 florin pa 2 siman cu ta inclui tur cos.

Pues muchanan lo ricibi mainta nan sandwich y juice. No ta permiti pa paga pa 1 siman. Mayornan por inscribi nan yiu(nan) tur dia na Centro di Bario Playa Pabao, mainta 9’or pa 12’or y trai merdia di 3’or pa 6’or. Pues inscribi bo yiu(nan) na tempo pasobra cuponan ta limita. Directiva di Centro di Bario Playa Pabao ta desea nos muchanan un dushi vakantie.