Ministro Oduber
Oranjestad-Recientemente Banco Central a presenta su cifranan pa e ultimo kwartal di 2013 y tambe pa henter 2013 y e cifranan aki ta sigur un indicador cu turismo di Aruba ta bayendo den un bon direccion.
Maneho estableci pa Gobierno di Aruba a traves di Minister di Turismo, Otmar Oduber ta pa eleva e calidad di nos turismo, cu nos por haya turistanan cu ta laga mas placa atras den nos economia.
Si mira e cifranan presenta pa Banco Central, esaki ta hustamente loke ta tumando lugar tambe, unda cu por mira cu na 2013 e placa cu turistanan ta laga atras (tourism receipts) a aumenta cu casi 180 miyon compara cu 2012, creciendo cu 7.1%.
Si mira e tendencia for di 2010 den e tourism receipts por bisa cu esaki a bin ta creciendo aña tras di aña. Na 2010 esaki tabata 2,232.0 biyon, na 2011 a aumenta te na 2,411.1 biyon, na 2012 a subi na 2,502 biyon y na 2013 esaki a yega te na 2,679.7 biyon.
E resultado di e ultimo kwartal di 2013 por wak cu esaki a yega te na 687.2 biyon compara cu 615.7 biyon durante e ultimo kwartal di 2012, cual ta un crecemento di 11.6% den e tourism receipts.
Pero no ta solamente e placa cu turistanan ta laga atras ta resalta den e cifranan di Banco Central, e cantidad di anochinan cu nos bishitantenan ta keda na nos isla tambe a bin ta conociendo un aumento for di 2010. Na 2010 e cantidad di anochinan cu e turistanan a keda na nos isla tabata 6,466,217, esaki a subi na 2011 te na 6,685,807, na 2012 a bolbe subi te na 6,907,143 y na 2013 a yega na e total di 7,126,771, cual ta un crecemento subistancial compara cu 2010, e promer aña cu Minister Otmar Oduber tabatin e cartera di Turismo. Esaki un biaha mas ta ilustra cu maneho di turismo ta bayendo den un hopi bon direccion.
No por keda sin menciona e cantidad di bishitantenan cu nos isla a bin ta hayando, cual mescos cu e tourism receipts y e cantidad di anochinan cu a keda na nos isla, a conoce un crecemento aña tras di aña. Na 2010 e cantidad di bishitantenan cu nos isla a ricibi tabata 824,702, na 2011 e la subi te na 868,973, na 2012 a sigui crece te na 903,934 y na 2013 e la yega te na 979,256.
Minister Otmar Oduber ta sumamente orguyuso di por mira e resultadonan positivo pa e pilar economico di nos isla, cual a bin ta dunando resultadonan hopi positivo na bienestar di nos economia. E ta sigur cu e logronan aki no lo por tabata posibel sin e sosten no solamente di e partnernan den e industria, pero tambe di tur esnan cu ta labora den e ramo aki. P’esey el a gradici y felicita cada un di nan pa e gran resultadonan aki y a pidi pa sigui cu e gran trabou cu a bin ta eherciendo pa nos por sigui ta orguyoso di nos isla como un di e mihor destinacionnan turistico.
Johnnyhabibe-Anchorman 