Johnnyhabibe-Anchorman

Oranjestad-E siman aki e delegacion di MEP na Hulanda, encabesa pa sra. Xiomara Ruiz-Maduro, y Ady Thijsen y Chris Romero a hiba debatenan fuerte den reunionnan entre parlamentonan di reino.

Especialmente riba e tema di ‘integridad’ den gobernacion. Durante tratamento di e tema aki, den nomber di MEP Xiomara Ruiz-Maduro a trese padilanti e plan di partido MEP pa elimina corupcion den gobernacion for once and for all. E plan aki ta consisti den introduccion di diferente leynan pa controla e partidonan politico, y pa duna proteccion na esnan cu denuncia actonan iregular. Esaki pasobra ta hopi miyones a wordo hinca den campanja di e partido na mando AVP y ningun hende no sa di unda e placa ey a bin.

Ademas, tin un cultura di intimidacion y menasa na Aruba, y hopi hende tin miedo. Tin hopi hende cu sa di cosnan iregular rond di e ministernan, pero no ta tribi di papia. Pesey mester bin ley y regla pa proteha nan pa nan sinti nan mes liber pa denuncia cosnan iregular.

E solucionnan cu MEP a propone a cai den masha bon tera na Hulanda, mirando e duda cu ta cresiendo na Hulanda den integridad di gobernantenan den Reino.

Lamentablemente aki na Aruba e voceronan di Mike Eman a scohe pa lastra Xiomara Ruiz-Maduro pasobra e a sa di vocifera locual ta biba den nos comunidad. Vocero principal di Mike Eman te hasta a yama Xiomara Ruiz-Maduro pa bendedo di pisca, hasiendo como si fuera cu e ofishi di bendedo di pisca ta algo malo!

Ta tipicamente e reaccion di e voceronan di Mike Eman ora algo dal nan duro, y awor cu poco poco e berdad di Mike Eman ta yegando Hulanda, claro cu ta di compronde cu Mike Eman no ta gusta esaki, y ta manda su voceronan ataca esnan cu hiba e mensahe.

Na prome lugar mi ta condena cu ta insulta e ofishi di bendedo di pisca, cual na mi parecer ta un ofishi noble, di trabou duro.

Na di dos lugar mi ta condena cu ta insulta un representante di pueblo cu ta cumpli cu su responsabilidad di vocifera e preocupacion cu ta biba na Aruba. Ya pa algun tempo caba, mirando e casonan di Kiko Gomez, strawberry gate, Lainda-gate, JJ Rendon y su 12 miyon dollar, y mirando cu e gobernantenan responsabel ta scohe pa no duna informacion, den comunidad ta reina hopi preocupacion. Esaki no ta un secreto, y e preocupacion ey Xiomara Ruiz-Maduro a vocifera.

Finalmente, si acaso defende bo pueblo y vocifera e preocupacion di bo pueblo ta bendemento di pisca, anto ami tambe ta un bendedo di pisca, y cu orguyo, lider di MEP Evelyn Wever-Croes a duna di conose.