Cumbre Nacional
Oranjestd-Den cuadro di maneho nobo di Minister Otmar Oduber pa loke ta trata cultura, otro siman dialuna dia 23 di juni lo tuma lugar e Cumbre Nacional di Cultura na Renaissance Convention Center.
E cumbre aki ta bin despues di diferente ronda consultativo cu a tuma lugar unda sectornan varia di nos comunidad a haya e oportunidad di participa pa asina conhuntamente yega na un maneho integral di cultural pa futuro generacionnan. E contribucion ricibi lo ta formando parti di e maneho integral nobo pa loke ta nos cultura.
Dia 23 di juni e cumbre lo inicia pa 8or di mainta te 1or di merdia unda lo tin diferente presentacionnan y tambe un workshop pa tur presente por participa riba e informacionnan treci dilanti e dia aki.
Minister Otmar Oduber lo duna su presentacion riba maneho di cultura y su vision pa loke ta trata e futuro di e parti integral aki di nos comunidad y Departamento di Cultura lo presenta e direccion di e futuro di cultura na Aruba.
Tin dos orador invita cu ta Michael Lampe, entrepreneur cultural, kende lo elabora riba “Best Practice Creative Industry”. E di dos orador invita ta Asante Salaam for di New Orleans kende lo presenta e tema di ‘Cultural Economy’, mustrando con Cultura na New Orleans a bira un pilar economico.
Minister Otmar Oduber ta invita no solamente esnan den e diferente ramo di cultura na nos isla, pero tambe tur esnan cu di un of otro forma por contribui na engrandece nos cultura.
Johnnyhabibe-Anchorman 