Skirbi pa drs. Melva Croes-Yánez (neuropsicologo)
Oranjestad-E articulo aki ta dedica na bienestar di futuro di nos alumnonan cu dificultad di siñamento y ta un resultado di propio experiencia (casi 25 aña) y basa riba estudionan cientifico haci riba e tereno aki.
“Tur studiante (mucha, hoben y adulto) cu dificultad di siñamento den cierto area(nan) por ta exitoso den educacion, empleo, relacion y den comunidad, si haya e oportunidad pa intervencion adecua pa supera e dificultadnan aki”.
Ta conoci cu un dificultad di siñamento ta origina den e cerebro di un ser humano y ta un condicion cu por wordo identifica ya caba cerca mucha (desde 4 aña). Banda di esaki e ambiente di un alumno ta contribui grandemente na drecha of empeora e dificultad aki.
Den e cerebro por observa diferencia den structura y funcionamento di e cerebro. Awendia ta existi den area di neurosciencia tecnologianan moderno y sofistica (ehempel: Functional Magnetic Resonance Imaging, of fMRI). Conhuntamente cu testnan neuropsicologico, por detecta structuranan esencial cu ta afectando funcionamento di, entre otro, abilidad di ricibi, almanesa, recobra, interpreta y comunica informacion.
Den practica di neuropsicologia y neurociencia e resultadonan ta ser usa a base di e deteccion di fMRI pa sigui elabora riba e aspecto di prevencion (tempran) y intervencion necesario. Mester añadi cu cada persona ta diferente y no ta existi “one size fits all” den un intervencion.
Dificultad di siñamento ta un capa of terminologia general pa describi problema(nan) individual di procesamento den e cerebro cu ta afecta of interferi con un persona ta mira, scucha, siña y capta informacion, abilidadnan (tareanan) y instruccion nobo.
Dificultad di siñamento ta un condicion cu a lo largo por empeora y causa sufrimento cerca e persona y su ambiente, si no interveni na tempo den esaki.
Un persona cu un deficiencia di siñamento, cu riba dje tambe tin deficiencia di atencion, ta mustra diferente patronchi di desaroyo. Esaki ta conduci tanto na problema den procesamento den cierto areanan cu na su turno ta interferi cu siñamento di habilidadnan basico manera: idioma, lesamento, y/of ‘rekenen’.
E dificultadnan di siñamento den e diferente area ta ensera:
- Idioma (incluso: deficiencia den reconoce palabra, comprende y capta esakinan y fluidez). Esaki tin su efecto den habilidadnan cu tin di haber cu comunicacion diario.
- Idioma por escrito: Caligrafia: formacion di letter y palabranan. Ortografia: reglanan pa uso corecto di letter y simbolonan di punctuacion. Composicion: expresion door di pone palabra hunto pa forma un frase cu tin sentido y comunica esaki por escrito.
- ‘Rekenen’: Calcula yresolve.
- Habilidanan riba e nivel superior: organisa, planifica tempo, coordina movecion,
dirigi atencion, memoria a corto of largo plaso.
Tur ta necesario pa un interaccion social y optimal.
1
Dificultad di siñamento no tin nada di haber cu e score riba un test di inteligencia of IQ. Esmas, tambe tin alumno cu score halto di inteligencia cu tambe por tin dificultad di siñamento den cierto area(nan). Aki ta cuestiona e enfasis cu, eroneamente, tin riba un simpel cifra of score di inteligencia (IQ) pa cu deteccion, prevencion y intervencion ora trata di dificultad di siñamento. Tambe mester enfatisa cu e alumno/studiante/adulto, cu dificultad di siñamento no ta floho pa siña, ni tampoco ta bobo.
Al contrario, hopi biaha e persona aki ta talentoso y kier (y sa) traha of studia duro. Hasta hopi mas duro compara cu otro alumno cu ta capta y procesa e mesun tarea lihe. Diferencia entre e dos alumnonan aki ta sinta den e rapidez di comprende, procesa, interpreta y comunica locual ta ser exigi di dje (tanto na scol como na pia di trabou of den un relacion). Tin studiante cu dificultad di siñamento specifico cu ta studia oranan largo pa un examen of proefwerk importante y no ta pasa esaki. Consecuentemente e studiante aki tin cu ripiti un aña mas y sa haya como mensahe (riba su rapport of evaluacion) cu su esfuerso no tabata suficiente y cu e mester traha mas duro e aña escolar nobo of … bay otro scol special.
E experiencia di ‘un baño friu’ aki por conduci na un nivel di frustracion y sentimento di exclusion cerca e alumno. Na su turno e frustracionnan aki por conduci na demotivacion. Y como resultado cu hasta e no kier haci ningun esfuerso mas pa sigui siña. Tampoco e lo no kier tende nada mas di les, huiswerk, lesa buki, etc….. y e lo huy di tur cos cu por recorde riba e experiencia ‘fastioso’ aki y por cuminsa ferfela su mes.
Si riba dje su ambiente expresa nan desilusion den dje, huzgue, tente, zundre, discrimine, dal e, straf e, haci comentario mahos of culpe, pasobra e no a siña suficiente, e demotivacion aki a lo largo por conduci na un baho auto-estima, timidez, sentimento di culpabilidad, berguensa y hasta depresion. Sa pasa cu e alumno aki ta sucumbi pa e criticanan aki y cuminsa kere cu su ambiente tin rason y ta cuminsa ‘label’ su mes, eroneamente, como bobo/floho etc., y termina den un depresion.
Como ser humano/social nos tur ta gusta un elogio na su debido tempo pa un bon trabao of idea. Den entrevista cu 3 alumno/studiante (demotiva pa cu skol) ta remarcabel cu tur ta gusta bai skol si! Un rason cu nan sa duna ta pasobra keda cas ta laf/ferfelo… pero bay skol ta nifica un ‘trip’ legalisa y luga unda por socialisa (‘chill’) cu amigonan.
E socialisacion cu e ‘friends’ aki ta ensera, por ehempel, combersa riba cosnan di interes comun (futbol, wega di computer, pasa pret, tambe tin biaha otro interesnan menos bon cu si nan por ta bon aden, entre otro (cyber)bully). E ‘friends’ aki ta acepta (=ta inclui) e studiante aki pa su idea/accion interesante (bon of malo). E socialisacion tin hopi di haber cu lubida e experiencia di e dificultad di siñamento y e mal experiencia cu e estudio, skol, trabou, etc. y e critica pa motibo cu e no ta haci su esfuerso pa siña, cu e ta floho, bobo, etc.
Den e proximo articulo lo elabora riba inclusión y exclusión di un persona cu un problema di siñamento.
Johnnyhabibe-Anchorman 