Johnnyhabibe-Anchorman

–Oranjestad Aruba a mira un otro muestra di e desaroyo y confianza cu tin den nos producto turistico. Copa Airlines a yega nos isla cu su di dos vuelo diario, algo cu lo bay tuma lugar 4 biaha pa siman. Anteriormente Aruba tabata conta cu 7 vuelo semanal di e compania aki y desde diahuebs esakinan a aumenta te na 11 pa siman cu ta representa un incremento di 376 asiento pa siman.
Copa ta bula for di Panama y ta conecta cu hopi puntonan strategico pa nos isla na Sur America, manera entre otro Brasil, Argentina, Chile y Colombia.
Mirando cu Minister Otmar Oduber pa motibonan fuera di su alcance no por tabata presente, Myrna Jansen, Senior Advisor di su ministerio a hiba palabra pa yama e di dos vuelo di Copa bon bini na nos isla. Den nomber di Minister Oduber el a yama bon bini na ehecutivonan di Copa y a gradicinan pa e confianza mustra pa nos producto turistico. Tambe el a reconoce Copa cu hunto cu ATA y AAA a traha hunto pa haci di e aumento aki un realidad unda cu nan a traha pa crea e demanda.
Claudia Zuluaga, Gerente Comercial pa region Caribense di Copa a conta cu nan a cuminsa na final di 2008 cu 4 vuelo pa siman, despues na 2011 nan a subi e frecuencia te na 7 pa siman y entrante diahuebs 3 di juli esaki a sigui subi yegando te na 11 vuelo pa siman pa Aruba.
El a bisa cu nan ta hopi contento di ta bulando pa Aruba, cu nan a wordo bon ricibi y cu si no tabata pa e apoyo di pueblo di Aruba Copa no lo tabata na nos isla. E kier reconoce specialmente ATA, AHATA y AAA cu na un manera consistente a apoyanan.
“Copa ta reitera cu nan tin pleno confianza den destinacion Aruba y cu por sigui conta cu sosten di nan aerolinea pa por sigui crece, manera nos a bin ta haciend’e te awor”.
Gerente Comercial di Copa a expresa tambe cu nan lo sigui atrae mas persona for di Latinoamerica pa bin Aruba, pa nan conoce e beyeza di nos isla y e bon servicio cu nos ta ofrece cual ta un ehempel pa hopi isla den Caribe.