Johnnyhabibe-Anchorman

 

ORANJESTAD – Lider di MEP Evelyn Wever-Croes den prensa abolbe enfatisa riba e manipulacionan di Mike Eman. El’a referi na un carta di Gobernador den cual Gobernador ta mustra Gobierno con nan por sali di e problemanan mas urgente pa por fia placa.

Tur hende sa cu nos pais ta na borde di bancarota causa pa e mal maneho di Mike Eman. No tin placa mas den nos pais, y Gobierno tin problema pa paga gastonan di diesel y gasolin pa e autonan di gobierno. Gobierno no ta pagando APFA locual cu e ta retene di ambtenaarnan.

Gobierno no ta pagando e huurnan di edificio na SOGA.

Pa colmo no ta pagando AZV tampoco manera mester ta.

Y e placa cu mester a bai na e fondo di turismo tampoco a wordo paga, cu a causa cu Minister di turismo Otmar Oduber a menasa Juan David Yrausquin cu hib’e corte.

Y durante e crisis aki, Gobierno no por fia placa pasobra Gobernador no a firma e presupuesto. Mike Eman, Baba Herde, Juan David Yrausquin y mas politico di AVP tur a cuminsa un campanja baho pa desacredita Gobernador. Awor ta sali na cla cu Gobernador ya desde mas di 10 dia pasa a mustra gobierno ki caminda pa cana pa atende cu e urgencianan di nos pais. Pero Mike Eman a hala e conseho ey un banda y a dicidi cu e no ta worry cun’e. E siman aki nan a saca e carta ey y kier hasi manera cos cu ta awo Gobernador a core manda e carta ey, djis pa sigi desacredita Gobernador.

Ta resulta cu e carta ta manda mas di 10 dia pasa, y Mike Eman sosteni pa prensa cumpra di gobierno ta insisti riba e campanja pa desacredita Gobernador.

Lider di MEP Evelyn Wever-Croes a bisa enfaticamente cu e simple hecho cu Mike Eman no a hasi caso di e carta, pero a sigi busca confrontacion cu Hulanda ta condenable, casi criminal.

“Ki dia MIke Eman ta bira honesto cu nos pueblo, ki dia MIke Eman ta bin splica pueblo kiko ela hasi cu nos pais? Tanten cu e no ta honesto, tanten cu e no asumi su responsabilidad ni culpabilidad, e no por saca nos pais di e crisis aki tampoco”, lider di MEP a finalisa bisando.