Johnnyhabibe-Anchorman

 

Oranjestad-Minister Otmar Oduber durante un conferencia di prensa diaranson mainta a aclarea y desmenti acusacionan haci entorno e proyecto di ex Bushiri Hotel. 

Ta asina cu siman pasa e mandatario por a tuma nota di diferente informacion cu a sali entorno e proyecto di ex Bushiri Hotel, caminda cu den e caso aki atrobe ta trata di e mesun persona Jan de Ruijter cu ta custumbra caba di tira su gal den direccion di e Minister di Turismo.  

Minister Oduber ta splica cu manera tur hende sa Sr. Jan de Ruijter ta un persona cu a purba aplica pa bira un coordinador den su bureau y na momento a nenge esaki , di biaha el a compromete su mes den un email cu el a manda e mandatario, bisando cu el lo purba di kibre, kibra e Gobierno te caminda e por y Sr. de Ruijter ta haciendo intentonan bastante extenso den esaki. 

Lamentablemente cada biaha e ta basa su acusacionnan riba mentiranan. E mandatario por a scucha cu siman pasa e tabata papia di entrega keho y por a mira opositornan ta papia tambe cu keho a wordo entrega,  pa motibo cu na momento a otorga e consecion pa por desaroya e area di Bushiri Hotel na e grupo di Southwest, esun cu a gana e tempo ey, a base di conseho di un comision cu a wordo estableci cu su presidencia tabata den man di e personanan di Banco Central di Aruba.

Minister Oduber a demostra cu henter e base rond di e acusacionnan ta falso, caminda el a mustra e garantia na  medionan di prensa presente y a duna copia di dje tambe. 

Manera e mandatario a splica, henter e testimonio di Sr. de Ruijter y di partido MEP,  cu ta afilia cerca di otro, cu ta bisa cu no tabata exisisti un garantia di banco na momento cu a otorga esaki, no ta berdad. 

Awe prensa ta wak e, comunidad di Aruba y pueblo ta wak e,  cu un biaha mas esaki ta un mentira flagrante. Dia 2 di maart 2012 e promer garantia a wordo otorga, Minister Otmar Oduber a indica. 

Minister di Turismo ta splica tambe cu nunca antes den ningun proyecto di Gobierno tabata exisiti cu bo ta exihi un garantia delanta riba un proyecto. Esaki a wordo introduci di tal forma cu si en caso e proyecto aki no continua, e desaroyadornan ta perde e dos miyon Dollar aki y Gobierno lo cobrele. 

E carta di garantia di banco a wordo poni na disposicion di prensa hunto cu e extencionan riba esaki duna pa Aruba Investement Bank (AIB).

Minister Oduber a trece dilanti un relato di prensa cu a wordo manda pa tur miembro di prensa dia un juni di e aña aki, cu ta mustra riba e hecho cu despues di un encuentro cu tabatin cu e desaroyadornan di Hard Rock Hotel & Casino y AIB cu e tempo ey a duna 20 dia , cu tabata un compromiso cu tabatin dor di un shareholders agreement cu mester a wordo cera cu e banco y un periodo di dos luna esaki lo mester wordo regla. Esaki ta bisa textualmente cu ‘E acuerdo aki ta encera cu e shareholdernan lo zorg pa 40% di e monto di inversion ser haci. Mester menciona aserca cu tanto e desaroyador y e banco ta cla pa pone performance bond.’ Kiermen tambe cu a wordo confirma pa AIB cu nan tin e documentonan pa pone performance bond caba y tin e lapso di tempo di dos luna pa nan por regla loke ta trata e financiamento completo. Na momento cu e financiamento ta completamente cla e ora ey por bay notario pa traspaso, pone e performance bond y cobra esaki. Ta trata aki di un performance bond cu ta na un balor di mas o menos 8 miyon Florin cu mester wordo poni. 

Minister Oduber a indica cu e comunicado di prensa aki a wordo manda luna pasa prome di juni 2014 pa tur medio di comunicacion y ta spera e ora manera a wordo bisa cu den e periodo aki por keda cla. Si no keda cla segun garantia di banco e grupo lo mester enetrega esaki na Gobierno di Aruba y Gobierno di Aruba lo dicidi kico ta bay haci cu e propiedad.