ORANJESTAD — Recientemente a tuma lugar un reunion entre partido MEP y Camara di Comercio, den cual a intercambia di pensamento riba e situacion financiero delicado di Aruba. Di parti di Camara di Comercio a duna e puntonan di bista di Camara di Comercio, y unda Camara di Comercio kier mira cambio.
Di parti di partido MEP lider di MEP Evelyn Wever-Croes y Xiomara Ruiz-Maduro a duna di conose cu nan ta lamenta cu cosnan a bai asina malo financieramente pa nos pais, pasobra MEP semper a avisa na tempo, ora cosnan a cuminsa bai malo. MEP a prepara e nota “Feestvierend ten Ondergaan” y a presenta esaki na Camara di Comercio tambe, splicando den detaye con delicado e situacion financiero di Aruba ta, y tur loque a wordo menciona den e nota, a wordo publica. Tambe Evelyn Wever-Croes y Xiomara Ruiz-Maduro a splica con MEP lo atende cu e situacion financiero.
Hunto a purba yega na otro cual ta e prioridadnan cu mester wordo atendi. “Mi ta hopi satisfecho con e reunion a bai, nos a toca varios topico di interes comun, y ta bon pa sa e posicion di Camara di Comercio riba e diferente temanan y posibilidadnan pa mehora nos finansas publico”, lider di MEP Evelyn Wever-Croes a duna di conose. Presente na e reunion aki pa Camara di Comercio tabata sr. de Mey, sr. Mohamed, sra. Arendsz-Hoeverts, sra. Wever, sr. Mathani, y pa MEP sra. Evelyn Wever-Croes y sra. Xiomara Ruiz-Maduro.
Johnnyhabibe-Anchorman 