Archive for July, 2014

COPA AIRLINES

ORANJESTAD – Aruba Airport Authority N.V. (AAA) tabata hopi contento ora el a ricibi e noticia cu Copa Airlines lo aumenta su servicio for di Panama pa Aruba y riba 3 di Juli a yama bonbini na e prome buelo adicional pa Aruba. E buelonan adicional aki ta complimenta Copa su buelonan diario pa Aruba. Copa Airlines ta ofrece servicio na 67 ciudad na 30 pais den America.
Copa Airlines cu ta un subsidiario di Copa Holdings, SA, miembro di Star Alliance, e lider den e network di aerolineanan global, a cuminsa awe cu un Segundo frecuencia entre Aruba y Panama. E buelonan nobo lo opera riba Diasabra, Diadomingo, Dialuna y Diahuebs.
E buelo nobo di Copa CM 213 lo Sali for di Aruba riba Diasabra, Diadomingo, Dialuna y Diahuebs pa 7:01 p.m., yegando asina na Copa su hub Tocumen International Airport na Panama City pa 08:05 p.m. E buelo di regreso CM 212 lo sali di Panama 12:06 p.m., yegando Aruba 03:06 p.m.
“Awe, nos ta hopi satisfecho pa lanza e segundo buelo cu servicio non-stop entre Aruba y Panama ofreciendo mas opcion pa region di America cu 11 buelo semanal”, Claudia Zuluaga, Commercial Manager Caribbean Region a splica. “E segundo frecuencia lo opera den un Embraer 190 moderno y comodo cu un capacidad di 106 pasahero. Esaki ta un momento special pa Copa Airlines na Aruba. Nos operacionnan a cuminsa na 2008 cu 4 buelo seminal cu a aumenta na buelonan diario den 2011. E historia di exito aki ta e resultado di un partnership di cooperashon consistente entre nos aerolinea y e oficialnan di Aruba encabeza pa Aruba Tourism Authority y Aruba Airport Authority”, Zuluaga a agrega.
Establesi na 1947, Copa Airlines a transporta mas cu 11 miyon pasahero den 2013.

E aerolinea a keda nombra “Best Airline in the Central America and Caribbean region” na Skytrax World Airline Awards den Juni 2013. Adicionalmente, Copa ta sigui cu su compromiso pa brinda servicio di clase mundial na su clientenan door di mantene servicio di standard halto reconosi door di e industria y e mihor “on-time performance” den America.
Copa su servicio abordo ta inclui cuminda y bebida complimentario, incluyendo binja y refresco; un sistema di entretenimento audio-visual di 12 canal na Ingles, Spanjo y Portugues, cu pelicula nobo tur luna y sistema pa oido gratis.
“Nos ta hopi contento cu nos aerolinea partner a sigui crese consistentemente den demanda y ta kere cu nos destinacion merece buelo adicional cu lo beneficia nos pasaheronan. Copa Airlines ta un partner valioso pa Aeropuerto di Aruba y nos ta spera di por yega na 2 buelo diario den futuro!” asina Peter Steinmetz CEO di Aruba Airport Authority N.V. a bisa.

 

 

sport boneiro

Oranjestad-Boneiru, 2 di yuli 2014 – E ‘10th ProKids Bonaire IFCA Championship 2014’ a sigui engrande durante di fin di siman ku un klausura sumamente grandioso i bon anima pa Basic One, Biggy Boy i DJ Caliber. ProKids a den fin di siman di 27 pa 29 di yuni ku kompetensia nan di Windsurf, Beach Futbol Veterano i di Bario i Beach Bolas. Pa e anochi final kordinado general Gerrald Victorina a fungi komo maestro di seremonia.

Kordinado general señor Gerrald Victorina a duna un bon bini i gradisi tur presente, sponsor nan, e tim di Aquaspeed huntu ku henter e komite i tambe e partisipante nan pa forma parti un biaha mas na e evento di Prokids. Despues a sigui pa duna palabra na e persona kardinal ku a kuminsa ku Prokids i hopi aktivo den mundu di deporte di windsurf pa hopi aña nan, Sr. Elvis “Pisketji” Martinus ku na su turno a gradisi Gerrald Victorina pa su perseveransha i logra un biaha mas dos evento sumamente eksitoso. Tambe e aña aki skohe dos hoben ku a partisipa den e evento di Prokids desde komienso diez aña atras i e aña aki ta forma parti un biaha mas di e evento di Prokids; esta Jurgen Saragoza i Stephard ‘Cheppi’ Gustowski. Ambos hoben a kuminsa na un edad bastante jong pa awor aki despues di tantu aña ta asta partisipa den e evento di PWA.

E resultado final di e kompetensia di Slalom den e diferente kategoria nan ta lo siguiente: U-9 Girls na prome luga Rosa Ruijter di Boneiru. U-9 Boys na prome luga Jeankarl Mayer, na di dos luga Dante Abraham i na di tres luga Davion Coffie tur tres di Boneiru. U-13 Girls na prome luga Alyssa Wijnand di Boneiru, na di dos luga Anne Coenen di Korsow i na di tres luga Koleta Abrahamsz di Boneiru. U-13 Boys na prome luga Iosu Balzaretti di Mexico, na di dos luga Davinton Janga i na di tres luga Gian Martis, ambos di Boneiru.

U-15A Boys na prome luga Wave Antonia i na di dos luga Stijn Overwater ambos di Korsow i na di tres luga Melvin van der Linde di Aruba. U-15B Boys na prome luga Raynold Wilsoe, na di dos luga Arnold Wilsoe i na di tres luga Hayley Thode, tur tres di Boneiru. U-15B Girls na prome luga Luz Day Zambrano i na di dos luga Davie Janga, ambos di Boneiru. U-17 Boys na prome luga Gunther Landwier di Boneiru, na di dos luga Mark Tjon di Aruba i na di tres luga Jurgen Saragoza di Boneiru.

Women na prome luga Monique Meijer di Boneiru. U-20 Boys na prome luga Ethan Westera i na di dos luga Willem ten Ham, ambos di Aruba i na di tres luga Richard Richie di Korsow.
E resultado final di e kompetensia di Freestyle den e diferente kategoria nan ta lo siguiente: U-7 Baby Class Girls na prome luga Gilliën Vrolijk di Aruba, U-7 Baby Class Boys na prome luga

Kingston Coffie i na di dos luga Everson Frans, ambos di Boneiru. U-9 Boys na prome luga Jeankarl Mayer i na di dos luga Dante Abraham, ambos di Boneiru. U-13 Girls na prome luga Koleta Abrahamsz di Boneiru i na di dos luga Anne Coenen di Korsow, U-13 Boys na prome luga Faan Coenen di Korsow, na di dos luga Davinton Janga i na di tres luga Darwin Perdomo, ambo di Boneiru. U-15 Girls na prome luga Luz Day Zambrano di Boneiru, U-15 Boys na prome luga Wave Antonia di Korsow, na di dos luga Smit Luis di Boneiru, i na di tres luga Rowan Richie di Korsow.

U-17 Boys na prome luga Stephard “Cheppy” Gustowski, na di dos luga Quincy Marchena, ambos di Boneiru i na di tres luga Johnny Yagen di Israel. U-20 na prome luga Ethan Westera di Aruba, na di dos luga Kenroy Francisca i na di tres luga Richard Richie, ambos di Korsow.

E anochi aki tambe a duna premiashon na e ganado nan di Beach Futbol Veterano i Bario i tambe na e kampion i sub kampion nan den Beach Bolas Krioyo.
Nos ta gradisi henter pueblo di Boneiru ku a yega Sorobon pa a bin apoya nos futuro profesional nan den e deporte di windsurf i tambe e otro deporte nan.

Seguramente nos ta duna un danki inmenso na tur nos sponsor nan ku un biaha mas a mustra nan konfiansa i dedikashon na engrandese e evento y tambe Boneiru; MCB Bonaire NV, TCB, Gobierno di Boneiru, Budget Car Rental, Fundashon Wega di Number, TELBO, ENNIA, Krioyo Paint, Obersi Group, Budget Marine, Hitess Bonaire, Don Andres, Akkermans Auto Supplies, STINAPA , Gio’s Gelateria & Cafe, Cactus Accounting, Flamingo TV, Bonaire Windsurf Place, ClickPrint Aruba, Caterpilar, Selibon, Indebon, Kite City, Bonaire Container Services i Starboard. Bishita nos wepsite http://www.prokidsfreestyle.com i nos Facebook page: Prokids Windsurfing Bonaire pa mira mas imagen di e grandioso evento i klausura.

 

paul croes

Oranjestad-Den corte huez a rechaza e peticion di retiro pa e ex trahadornan di Westin cu a dicidi cu nan no ta acepta e pakete ofreci. Mescos a sosode cu e trahadornan di e casino di e hotel.
Minister Otmar Oduber como titular di Turismo y ex minister di Labor a bisa riba esaki cu e ta hopi contento cu e veredicto di huez y cu ta un resultado cu por a wordo spera unda derecho di trahadornan y cambionan di ley a wordo confirma.
E mandatario tabata algun luna pasa hunto cu su colega di Labor Paul Croes pa trata precisamente e tema di trahadornan di Westin y ambos minister a bisa claramente cu e cambio di leynan laboral cu a tuma lugar aña pasa y ta vigente ta proteha e trahadornan den casonan asina. Un di e cambionan ta indica cu den caso di traspaso of benta di un compania e seguridad laboral di e trahadornan ta wordo salvaguardia.
Durante e reunion den Parlamento na februari el a bisa na un forma hopi categorico cu e leynan laboral y e derecho di e trahador ta hancra 100% den nos leynan y pesey e mensahe directo pa tur cu kier inverti na nos isla ta cu nos tin leynan cu mester wordo respeta.
El a bisa tambe cu no ta keda na Gobierno si e empleado acepta si of no e paketenan ofreci of si esaki ta suficiente bon, e empleado ta esun cu tin cu tuma e decision aki. Como Gobierno y como Parlamento mester para pa e derechonan y ehecusion di leynan laboral cu nos tin na Aruba.
Huez bo por bay semper, hasta ora un compania ta ganando placa of ora e ta bancarota, ta keda na discrecion di e huez pa tuma un decision riba e caso(nan), pero definitivamente nos leynan laboral ta na banda di e clase trahador y e empresa cu ta cumprando esaki awor aki sa di esaki tambe.
Cu e sentencia di huez rechazando e peticion di retiro, por mira bon cla cu e derecho di e trahadornan manera estableci pa ley, a wordo salvaguardia y di e forma aki tambe ta mustra e stabilidad cu e trahadornan por conta riba dje cual na su turno ta traduci tambe na un mayor stabilidad pa nos turismo.

Informacion Gobierno
Oranjestad-Ya ta un siman cu Aruba a wordo confronta cu e crisis financiero y constitucional mas serio den historia di nos pais, y ta un siman desde cu ningun hende sa paradero di Mike Eman, prome minister di e pais aki.
Tin hopi speculacion entorno su desaparicion. Rumornan ta indica cu el’a biaha, sea pa Brasil pa wak football of pa Hulanda. Sinembargo informacion fededigno ta mustra cu na Hulanda nan no kier wak e mas. Hulanda a perde tur clase di confiansa den Mike Eman, y nan kier atende cu Juan David Yrausquin awor.
Rumornan hopi mas persistente ta indica cu Mike Eman lo a sufri un of otro breakdown y mester a wordo interna den un clinica na Colombia.
Cualquier cu ta e caso, ningun hende ta dunando informacion di locual cu ta pasando na Aruba. Nos ta para na un crisis constitucional den cual Gobernador a nenga di firma e presupuesto, un crisis ocasiona pa Mike Eman y AVP. Nan kier tira culpa riba gobierno di Hulanda y riba Gobernador, pero nan mester busca e eror serca nan mes, pasobra ta nan a malgasta tur placa di pueblo.
Fraccion di MEP mirando e silanecio cu ta reina, a pidi Presidente di Parlamento Marisol Lopez-Tromp pa yama un debate cu caracter di urgencia, pa ministernan  Mike Eman y Juan David Yrausquin bin duan cuenta na Parlamento di kiko ta pasando y con nan tin pensa di saca nos di e crisis aki. Ta di spera cu e presidente di parlamento e biaha aki si hasi su trabou manera debe ser, y yama e reunion aki mas pronto cu ta posibel.
Lider Di Mep Oranjestad-Lider di MEP Evelyn Wever-Croes durante conferencia di prensa di MEP a condena e ataquenan orquestra pa partido AVP contra Gobernador di Aruba, ataquenan cu a cuminsa door di Lider di Fraccion di AVP sr. Baba Herde.
“Nos a tuma nota di e menasa di sr. Baba Herde den direccion di Gobernador, y nos ta condena e menasa ey y e tono di sr. Herde. Awor AVP kier tira culpa riba Gobernador pa e crisis cu nos ta aden. Esaki ta un acto di cobardia. Sr. Herde mester stop di bruha tera, y sigur no hinca Gobernador memey di asuntonan politico baho.
Sr. Herde mester sa cu Gobernador no ta un isntrumento politico, Gobernador ta para na cabes di Gobierno di Aruba y ta representante di Rey Willem Alexander. E tono di sr. Herde ta un falta di resept grandi contra Rey Willem Alexander.
Gobernador ta para ariba di tur asunto politico cu tin, y ta hopi baho di AVP pa ataca Gobernador di e forma aki. Por a nota cu ya AVP a cuminsa manda su hendenan pa ataca Gobernador na radio y den corant, y esaki ta actonan baho. Na e momentonan aki di crisis nos pais mester di lidernan cu por yuda nos sali di e crisis aki, nos pais no mester di hendenan cu ta bruha tera y ataca esnan cu no ta responsabel pa e crisis.
Si sr. Baba Herde y esnan manda pa AVP kier culpa un hende, culpa Mike Eman ya cu e ta e unico persona responsabel pa e crisis cu nos ta aden”, lider di MEP a duna di conose.

 

Parlamentario Dangui Oduber

Parlamentario Dangui Oduber

Oranjestad-Despues di 9 luna e presupuesto di pais Aruba a wordo trata den parlamento di Aruba. E tawata un presupuesto cu pa promer biaha den historia gobernador di Aruba a manda esaki bek pa gobierno. Un presupuesto irrealistico caminda a usa cantidad di stelposten y tambe un presupuesto di medida caminda cu gobierno a scohe di bai castiga esnan mas vulnerabel den communidad y caminda gobierno ta schuif tur e problemanan cu e mes a ocasiona den scochi di pueblo.

Pa hopi tempo nos por a constata cu e gobierno aki a hiba un maneho financier irresponsabel y cu prioridadnan robez. Awe henter e pueblo ta wordo confronta cu e mal maneho aki. Pa ilustra e mal maneho aki ta pone e tabel aki bao caminda por wak desde anja 2007 e nivel di gasto den e presupuesto di gobiernonan. Despues di analiza e tabel aki cada cuidadano por wak con irresponsabel e gobierno di Mike Eman a gasta placa. Nan a gasta placa cu pais Aruba no tawata tin. Mas tristo den henter esaki ta cu a gasta placa den prioridadnan robez manera e tram, Green Conference, Europe meets America., viahamento, voorlichting en promotie y deskundig advies.

 

 

 

 

Marisol
Oranjestad-E crisis constitucional cu pais Aruba ta aden, ta algo cu pa prome biaha ta pasa. Una bes Parlamento aproba un ley, Gobernador tin di firma e ley pa asina ratifica locual Parlamento a dicidi.
Nunca antes Gobernador a nenga di firma un ley cu Parlamento aproba, te siman pasa.
Siman pasa  a pasa e acto insolito den cual Parlamento na forma no transparente y dictoatorial a bulldoze un presupuesto cu tabata irealistico. Un presupuesto cu ya caba instancianan halto constitucional a rechasa. Pero gobierno a persisti, y a dicidi di manda e producto di ley irealistico asina pa Parlamento.
Akinan e presidente di parlamento a comete un eror garafal tras di otro.
EROR # 1 HABRI PORTA DI PARLAMENTO 11 OR DI ANOCHI PA RICIBI E PRESUPUESTO
Presidente di Parlamento no solamente a falta respet na su mes, manera cos cu ta den un bar e ta traha, sino a falta respet na henter e organo constitucional mas halto di nos pais, door di habri porta di Parlamento pa e minister di finansas drenta pa bin entrega su presupuesto cu ya tabata 9 luna laat mas. Kiko lo tabata 9 ora mas laat, pa asina entreg’e na forma desente durante ora di trabou? Presidente di Parlamento a abusa di confiansa di trahandornan di Parlamento, poniendo nan bin traha den marduga, pa habri porta di Parlamento na un orario cu – si e presidente di parlamento tabata respeta su mes – lo hamas e lo a habri porta e oranan ey.
EROR # 2 ACEPTA UN PRESUPUESTO CU NO TA CLA
E presupuesto aki a wordo rechasa no door di un instancia, sino door di dos diferente instancia: Raad van Advies y Gobernador, pasobra e no ta cla. Ainda tabata tin cantidad di ‘setlposten’ mustrando cu gobierno no a caba cu su huiswerk. Presidente di Parlamento mester a mand’e bek, y bisa gobierno bai caba cu bo huiswerk prome y djey bin entrege. Esey lo a mustra respet pa e organo mas halto di nos pais.
EROR # 3 IMPONE DICTADURA Y SILENCIA OPOSICION
Talves e eror mas grandi tabata na momento cu e presidente di parlamento a impone dictadura den parlamento y a nenga pa duna oposicion tempo pa nan prepara nan mes, a nenga nan tempo pa cuestiona gobierno, y nenga nan oportunidad pa expresa e vos. Pasobra den cualquier democracia, e vos di minoria mester wordo scucha. Esey hustamente ta e diferencia entre un dictadura, y un democracia. Miembronan di oposicion, cu ley y reglamento den man, a pidi pa mas tempo, pa mas oportunidad, pero sin considera nan ponencianan, esakinan a wordo bari di mesa pa e presidente cu di forma dictatorial y hopi biaha na forma infantil kier a apresura e tratamento di e presupuesto.
EROR # 4 PERMITI VOTACION RIBA UN LEY INCOMPLETO
Finalmente e presidente di parlamento a permiti e ley bai na votacion, siendo cu e ley ta incompleto. Tabata tin ‘stelpost’ aden ainda y tabata tin deficitnan cu no a wordo atendi cun’e, hasiendo e ley uno incompleto. Mas aleu, door di nenga di pidi un di dos conseho di Raad van Advies manera Raad van Advies y oposicion a propone, e presidente di parlamento a demostra cu incapacidad pa ocupa e funcion importante di presidente di parlamento.
Esakinan ta apenas algun motibo, dicon e presidente di parlamento actual sra Marisol Lopez-Tromp mester tene honor na su mes y retira. E motibonan aki, combania cu e problemanan personal cu sra Marisol Lopez-Tromp tin cu oposicion, especialmente e dos damanan den oposocion, ta hasi cu e no ta apto pa ocupa e funcion di presidente di parlamento. Sr. Mike Eman ta hasi bon di kita sra Marisol Lopez-Tromp di e posicion ey pa e stop di causa berguensa pa partido AVP.