Johnnyhabibe-Anchorman

Oranjestad-Mo Michi su ultimo mensahe durante mi bishita y conversacion cune na Hospital tabata ta: UN INTERES SO TA CONTA E INTERES DI PUEBLO. E palabranan aki lo keda como un credo politico pa nos y lo keda como nos herencia politico di dje y nos mision cu nos ta asumi den nos bida y lucha politico pa realiza y logra esta e felicidad y progreso berdadero pa henter nos pueblo sin distinccion.
Como juinan di Betico hamas nos lo lubida Milton Henriquez cariñosamente yamá Mo Michi, ta imposible pa nos lubida e sentimiento di amor y lealtad cu semper e la expresa pa e lucha di nos Pueblo pa ta liber y pa nos Libertador su bon amigo nos tata Betico Croes. Mo Michi tawata un amigo fiel na Betico, fiel na e lucha di nos Pueblo pa ta liber, fiel na un caminda di bida companja pa su rectitud como homber correcto, firmesa den su opinionnan y firmesa den su conviccionnan. Na su Señora Tia Miriam, na su Juinan Dwight y Milton y na henter su Famia y Amigonan: Boso mester ta orguyoso di tabatin un persona tan especial den boso bida manera Mo Michi. Nos sa cu boso ta SUMAMENTE orguyoso di dje, manera e tabata increiblemente orguyoso di bosonan.
En lo personal, mi ta agradecido cu mi por tawata tin e luho di su tempo y opinion pa consehami y guiami tur ora cu e la considera importante pa orientami den un curso na interes di nos Digno Pueblo…su Pueblo….su Aruba.

Mi ta sumamente contento cu Dios Todopoderoso a duna su famianan, su juinan, su Señora y na nos tur cu ta stimé, e tempo den su bida cu e la dedica na tur cu e la stima.
Awor cu e ta rumbo e reino celestial unda cu e lo topa cu su familiarnan cu a bai, y su gran amigonan cu ta wardando e, nos ta pidi nos Todo Poderoso brinde un lugar especial den e luz y paz di su reino pa su descanso eterno. Nos pidi den nos oracionnan: Mo Michi sigi pidi pa bo Pueblo, nos Pueblo cu tanto bo a stima. Mo Michi nos lo percura, hunto cu bo juinan y Tia Miriam, di representa bo memoria y legado dignamente. Nos lo haya bo falta inmensamente. Pero nos paz ta cu awor bo lo ta mas serca di nos Gran Dios pa pidi’e pa su bendicion pa nos salba e pida baranca aki cu ta nos Patria Aruba. Pa nos salba nos Patria Aruba pa asina nos rescata nos Pueblo y e futuro generacionnan di nos juinan cu lo mester sigi cu e bon ehempel cu bo a hasi e tenor di tur bo accionnan, conducta y pensamento den bo bida den tur su aspectonan.
Mo Michi sosega na paz, HAMAS NOS LO LUBIDABO.
Den nomber di juinan di Betico: Glenbert F. Croes Miembro di Parlamento pa MEP

Oranjestad-Durante un conferencia di prensa dialuna mainta Minister di Otmar Oduber a splica mas riba e desicion di Gobierno pa otorga un toezegging na Tierra del Sol (TDS) pa construccion di un hotel 5 strea.
Minister Otmar Oduber a splica cu manera ta conoci TDS a pasa den bastante turbulencia den e ultimo 10 pa15 añanan, unda na diferente ocasion tabatin diferente gruponan, cu ta keda cerca di e mesun famia, cu a opera TDS e ultimo añanan. Sin embargo na final di 2012 y cuminsamento di 2013 a cuminsa mustra den e direccion cu no por mantene e maneho di TDS mas den e forma actual, unda cu na diferente ocasion acerca Gobierno for di e tempo ey caba pa mira kico y con nan por intermedia.

Gobierno na su turno a mustra riba e diferente puntonan cu e lo kier mira e grupo aki cumpli cu ne,  na momento cu haci un peticion di nobo pa un hotel den e compleho di TDS.
Ta asina cu den pasado, rond di aña 2005 – 2006, ya caba un tipo di permiso a wordo otorga pa construccion di un hotel, pero e tempo ey no a logra ehecuta  e compromiso cu e Gobierno anterior a duna.  Esaki a conduci cu recientemente den corte a pidi pa pospone pago di debenan dor di e tres propietario di TDS cu a bini hunto.

A traves di e e curator a haci cierto calculacionnan y a laga traha un rapport manera tabata e condicion for di algun aña pasa na e grupo, dor di un compania renombra, Atlas, cu ta esun cu a prepara e documento financiero, pa cual nan a bay corte pa pidi e posponemento, e mandatario a bisa.
Minister Oduber a splica cu den transcurso di e calculacionnan cu a wordo haci pa loke ta e posibel rescate di TDS , Gobierno a pone cierto condicionnan. Gobierno a laga un comision di experto nombra dor di tres minister, Minister di Finanzas anterior, Minister di Infrastructura y Minister Oduber mes, realiza un rapport riba kico lo ta e impactonan cu un posibel kiebra di TDS lo tin y kico e consecuencia di esaki lo ta y si en berdad e unico opcion na e momentonan aki pa rescata e propiedad lo ta e adkisicion di un hotel, e mandatario a splica.

Minister Oduber a comenta cu na diferente ocasion a mustra riba e hecho cu inicialmente Gobierno no ta apoya e idea pa añadi un propiedad adicional di hotel  pabou di nos isla.  Sin embargo e trabou di e comision en cuestion a conclui mescos cu e grupo financiero cu tambe a haci e raportahe pa e curator. A base di e conclusionnan di e rapport aki recientemente Gobierno a duna un aprobacion na e grupo nobo di TDS, pa por tin e opcion pa construi un hotel 5 strea cu e condicion cu lo tuma  e diferente puntonan cu a wordo poni na cuenta, caminda lo tin un construccion di maximo 200 camber den e propiedadnan di TDS. .  
Estudionan a mustra bon cla cu un kiebra na e momentonan aki di TDS lo tin diferente consecuencia pa nos isla. Di cual un di esunnan principal y mas grandi ta e impacto cu esaki lo tin riba e opinion publico riba nivel internacional, caminda cu gran mayoria di e real estate den e propiedad aki ta pertenece na gruponan den exterior y definitivamente Gobierno no lo por laga esaki pasa .

Tambe lo tin efectonan negativo riba nos empleadonan y e parti laboral na TDS tabata un efecto preocupante. Sigur tambe e efecto cu lo tin pa loke ta trata comerciante y creditornan local , unda ta papia di un suma di mas o menos 100 miyon cu ta envolvi den henter e proceso aki.
Den cuadro di e maneho di turismo , unda cu Gobierno ta canando den e direccion pa por atrae e mas turista afluente pa Aruba, cu ta e turista cu tin mas poder di compra y cu ta gasta mas, a wak e decision di duna toezegging pa por bin cu un hotel 5 strea como algo positivo pa eleva nos Producto Aruba.

–

Oranjestad-Eagle Beach — Sabrina Wilson Barrett, 18, hospedando cu su miembronan di famia na La Cabana Beach Resort & Casino, ta un damita hoben cu un curason grandi. Pa su proyecto di scol na 2013, el a cuminsa traha armband y coyar, traha di materialnan natural, bendiendo nan na e resort y dunando tur e placa recauda na e instancia caritativo local Turtugaruba.

E lucha di e turtuganan Caribense, cu ta bringa pa sobrevivi contra e desaroyo moderno di playanan, y e necesidad di concientisa tur hende tocante e proteccion pa turtuganan di lama rond di mundo, a conmove Sabrina pa drenta den accion y a inspir’e pa traha piesanan di joyas atractivo na man, pa yuda recauda fondo pa e fundacion.

Turtugaruba ta un fundacion caritativo pa e conservacion di turtuga di lama y nan habitat den e region Caribense, specialmente riba y rond di Aruba. Turtugaruba ta un miembro orguyoso di e Wider Caribbean Sea Turtle Conservation Network (WIDECAST). E fundacion ta raporta cu cuater especia di turtuga di lama por ser mira ta pone webo akinan, esta e Driekiel, Dermochelys Coriacea, for di Maart te Juli, e Loggerhead Turtuga, Caretta Caretta di Mei pa Augustus, Hawksbill Turtuga, Eretmochelys Imbricata di Juni pa November y e Turtuga Berde, Chelonia Mydas di Juni pa Oktober.

E rayonan caluroso di e solo ta tene e webonan cayente, e fundacion a informa, den e neishi cu ta dera den e santo moli durante incubacion. E turtuganan chikito ta sali despues di 2 luna, den e periodo di 45 pa 70 dia, dependiendo riba e especia. Pa mas informacion tocante e conservacion di turtuga di lama na Aruba, bo por manda un email pa turtugaruba@hotmail.com

ORANJESTAD, Aruba – 25 di Augustus 2014: Diabierna ultimo, dia 22 di Augustus 2014 a tuma luga e di tres edicion di “Women in Leadership Conference” organisa pa Aruba Trade and Industry Association (ATIA), Caribbean Mercantile Bank (CMB) y Setar N.V. Aproximadamente 500 hende muhe y algun hende homber a reuni trempan na Renaissance Convention Center determina pa asina siña kico exactamente ta e “Glass Ceiling” y con pa kibr’e.
E mainta a cuminsa cu palabranan di Shahaira Labad, Gerente di Mercadeo di Setar N.V. cu a comparti su historia personal di con e tambe a surpasa varios obstaculo den su carera profesional. Siguientemente Ghislaine Grant Comenencia, Senior Relationship Officer Premium Banking di CMB, a duna palabranan di motivacion tur esunnan presente pa tambe kibra nan bareranan pa asina logra nan meta den e mundo corporativo.

Sr. Francio Guadeloupe, PhD den Antropologia tabata e prome orador riba escenario, su presentacion tabata tin un toke spiritual caminda e la enfatisa cu prome cu tur cos, nos tur ta ser humano. E la haci varios pregunta cu a pone e publico reflexiona riba nan prioridadnan profesional y na mes momento e la recorda nos riba e “ser mama” cu ta esun cu ta representa e prome figura di lider den nos bida.

Siguientemente Michelle Ryan a trece algun cifra hopi interesante pa dilanti cu ta ilustra e asina yama “Glass Cliff”. Su estudionan experimental di e ultimo 10 añanan aki ta mustra cu na momento cu un compania ta den un crisis, ta ora mas e profesionalnan ta opta pa un lider muhe. E profesora di psicologia Social y Organisatorio a splica mas riba e conceptonan aki manera e “Think Male, Think Manager” y “Think Female, Think Crisis”.

E tayer interactivo di Anita de Groot tabata uno emocional tambe caminda e la papia tocante “Balanced Leadership” y aspectonan berdadero di felicidad tanto den bida personal como den profesional. E participantenan a haci un ehercicio tambe basa riba energia y na mes momento a siña tocante diferente forma di comunica.

Finalmente Sra. Carmen Breeveld a conclui e atardi cu un presentacion caminda e papia ‘cla y raspa’ di e situacion actual di e hende muhenan cu ta y kier asumi un posicion di liderazgo den un compania. E parti mas interesante ta cu Sra. Breeveld a trece pa’ dilanti kico tur e hende muhenan por siña di hende homber, entre nan topiconan manera, envidia, jaloezie, y redo den ambiente laboral.

ATIA conhuntamente cu CMB y Setar N.V. kier ta gradici tur participante cu tabata presente y e boluntarionan cu a yuda di un forma of otro na e grandioso evento aki. ATIA, CMB y Setar N.V. ta invita un y tur pa bishita e website http://www.womenaruba.com of Facebook page http://www.facebook.com/womenaruba pa aprecia tur lo ke a sosode durante e conferencia.

Oranjestad-Siman pasa Minister Otmar Oduber tabatin un reunion cu Setar y ATA den cuadro di e plannan cu Oficina di Turismo tin hunto cu Gobierno y den e caso aki Ministerio di Turismo, pa por haci di diferente punto na nos isla hotspotnan, pa por ofrece wi-fi.
E mandatario a menciona por ehempel Bushiribana, Casibari, Ayo Rock Formation, Natural Bridge y tambe centro di ciudad en especial Caya Grandi y Linear Park, igualmente e area di beach dilanti hotelnan. Esaki ta pa por crea mas posibilidad pa turistanan ora nan saca potret cu nan celular of tablet, es decir cu e areanan di wi-fi aki, nos bishitantenan tin e posibilidad di biaha pa post esakinan riba social media y mandanan pa nan hendenan.

E meta di e proyecto aki no ta solamente pa brinda mas posibilidadnan pa nos bishitantenan, pero tambe ta crea un fluho di mercadeo pa Pais Aruba.
Igualmente Minister Oduber a menciona cu hunto cu e proyecto aki ta bay tin esun di e Mobile Information Officers. E ta un proyecto cu ta representa individuonan cu ta bay ta disponibel den e area di hotelnan, den centro di ciudad, San Nicolas y aeropuerto di Aruba. E personanan aki lo ta disponibel cu nan tablet pa duna informacion na e turista cu e meta cu por duna mayor accesibilidad pa atraccionnan, restaurantnan, etc. Mirando cu e proyecto aki lo haci e tuma di decision uno mas rapido pa e turistanan, e lo representa un mayor poder di entrada pa Pais Aruba.
E personanan aki lo ta un hotpot riba nan mes, loke ta haci posibel cu na momento cu e turistanan ta haciendo preguntanan, a traves di e mesun tablet aki, nan por tin acceso na nan famia den exterior.
Minister Otmar Oduber ta bisa cu tur e plannan aki ta pa Aruba por cana dos stap dilanti di nos competencia y haci cu informacion por ta mas accesibel na nos bishitantenan y asina nan por contribui mas na nos economia.

Oranjestad-Minister di Turismo, Transporte, Sector Primario y Cultura Otmar Oduber ta hopi content cu e exito cu e programa piloto di e sistema Hydroponics na Santa Rosa ta coschando.

E sistema aki ta un proyecto mas di Santa Rosa pa asina aki expande su  servicionan y e diferente proyectonan cu ta promove y sostene agricultura, cria y pesca aki na Aruba.

Pa un aña largo Santa Rosa a traha riba e sistema aki, pa logra monta full e ‘shadehouse’ cu e aparatonan necesario y haci esaki un proyecto exitoso.

Durante e ultimo 4 añanan Santa Rosa a crea posibilidadnan nobo; creando mas facilidad pa agriculturnan, criadornan di bestia y piscadornan, dor di e introduccion di proyectonan moderno y inovativo manera esaki.

Pa loke ta trata e sistema di Hydroponics, mester bisa cu e interes bou di nos agricultornan ta grandi. E hecho cu e mata cu nan planta lo keda cla den 42 dia y cu e sistema aki ta uno hopi economico pe usuario ta lanta mas interes. A inicia e proyecto aki pa asina trece un solucion na e scarsedad cu ta tumando lugar den agricultura y cria. E proyecto aki lo haci agricultura hopi mas accecibel pa tur esnan cu tabata desea pa cuminsa cu un produccion, caminda cu un minimo di espacio y un ‘shadehouse’ di poco meter cuadra, lo por produci mas di 4000 mata cu un sistema hopi economico. Esaki ta indicacion cu e sector ta expandiendo tanto den negoshi como den e adkicion di e cantidad di hendenan cu ta practica den e sector.

Ya caba por conta candtidad di interesadonan cu lo kier cuminsa haya  mas informacion riba e sistema aki. E hecho cu tur loke mester pa traha e shadehouse y instala e sistema aki ta liber di impuesto, ta brinda mas beneficio pa e agricultor.

E ta un satisfaccion cu ya caba den e inicio di e programa piloto, e sistema Hydropinics a sa di hala tur atencion di agricultor y tur esnan cu ta aspira pa cuminsa produci riba nos isla.

Oranjestad-Minister di Turismo, Transporte, Sector Primario y Cultura Otmar Oduber ta sumamente contento cu e cifranan positivo di turismo di Aruba den luna di juli 2014. E resultadonan di juli ta mustra un crecemento drastico compara cu e cifranan di e aña anterior.

Aruba a conoce den luna di juli 2014 un total di 95,952 bishitante, cu ta un crecemento di 9,4%, compara cu e mes un periodo di e aña anterior.

Den luna di juli 2014 a conta cu un aumento for di e mercado Norte-Americano di 4,7%, unda cu Canada a baha cu 10,6%. E mercado Sur-Americano a aumenta cu un total di 6,638 bishitante cu ta 31,5%, unda cu Venezuela a crece cu 47,7%, Colombia cu 31,5%, mientras e mercado di Brazil a baha cu 2.2% y Argentina cu 20,3%. Esaki ta mercadonan importante  den e economia di nos isla, mirando cu e bishitantenan for di e mercado di Latino America ta conoci pa ta gasta hopi riba nos isla.

Hullanda tambe a mira un decrimiento di 10,8% , mientras Europa completo a crece cu 3,3%.

YTD juli 2014  ta conta cu un 5.9% di crecemento compara cu e mes un temporada na 2013. Luna di juli 2014 a conta cu un fluho fuerte for di e mercado mericano cu a crece cu un total di 2,5%, Venezuela a crece cu 27,9%, Colombia cu 23,2%, Brazil a crece cu 13.2%,  mientras e mercado Canades a baha cu 5,5% , Argentina cu 18,4%, Hullanda 2,9% y Suecia cu 13,3%.

Pa loke ta trata turismo crusero a crece cu 33,8% compara cu e mes un periodo na 2013. Aki ta trata di 10.000 pasahero mas cu aña anterior.
Apesar cu nos ta den un temporada abou, ta premira cu lo sigui conta cu resultadonan positivo ainda den augustus y september. Tur esaki danki na e bon maneho y metanan poni dilanti pa Ministerio di Turismo y ATA , por a logra pa haci cu e temporada aki a conta cu resultadonan positivo pa turismo di Aruba. Cu esaki por conclui cu  ATA ta haciendo un bon papel den exterior y merca.

Pues recientemente Minister di Turismo Otmar Oduber y ATA a reuni cu agencianan di publicidad di tanto New York y Brasil, pa asina aki sondea e posibilidadnan mas moderno y fructifero pa por trece mas ‘affluent visitors’ nos isla, esaki mirando cu nan ta conoci pa gasta mas durante nan bishita. E  intencion ta pa haci uso di gruponan di mercadeo grandi den exterior pa hunto cu ATA sigui trece e tipo di bishitantenan aki nos isla y asina mantene e  resultadonan positive , manera nos a conoce den luna di mei te cu awor.

E bon resutadonan aki a wordo registra tambe den e raportnan di Banco Central unda cu e entrada cu e turista a laga atras riba nos isla tin un aumento di 7.1% pa 2013.  Pa loke ta trata e prome kwartal di 2014, nos ta conta cu 2,9% di crecemento compara cu 2013. (Centrale Bank van Aruna)

Nos mester ta hopi contento cu e e bon resultadonan aki na Aruba, compara cu otro islanan den Caribe y region. Esaki ta demostra un bes mas cu turismo di Aruba ta riba e bon caminda y ta genera impactonan deseable pa e economia di nos pais y ta gradici tur persona cu ta haci esaki posibel.