ORANJESTAD – Lider di MEP Evelyn Wever-Croes a tuma nota cu den e cuentanan anual pa 2013 cu a keda entrega na Parlamento diabierna ultimo, ta resulta cu Gabinete Mike Eman a surpasa su presupuesto.Conforme e cuadro financiero cu AVP mes a pone pa su mes, den anja 2013 nan lo a crea un deficit di 175 miyon florin. Pero den presupuestonan presenta na Parlamento, ya nan mes a hisa e deficit prome na 223 miyon, y despues te na 308 miyon florin pa 2013.
‘Nos di MEP na e momento ey caba a avisa cu e presupuesto ey no ta realistico.
Deliberadamente Gabinete Mike Eman a presenta cifranan fictisio na Parlamento, pero lamentablemente e 13 parlamentarionan di AVP ciegamente a aproba e cifranan. Awor nos ta haya rason, pasobra nan no a crea e deficit di 308 so, sino nan a gasta 36 miyon MAS di loke nan a informa Parlamento. Pa e 36 miyon aki nan no a haya aprobacion, y pues nan mester wordo teni responsabel personalmente. Nos ta bai Ministerio Publico pa pone esaki den nan man. Ta e malgastamento di placa aki tin nos pais den crisis financiero, y mester pone un paro na e abuso aki”, segun lider di MEP.
Remarca cu presidente di Controlaria General tambe tabata tin un aviso serio pa e parlamentarionan di AVP: “Si nos no tin nos cas na ordo, otro lo bin pone na ordo pa nos”. Ta bira tempo pa pone nos cas financiero na ordo.
