Archive for August, 2014

Tommy Lee Halman 1OranjestadTommy-Lee Halman ta un di e cantantenan cu lo ta riba e scenario di Cas di Cultura diasabra anochi, dia 16 di augustus. Carlos Bislip hunto cu coleganan musico ta organisa un Benefit concert pa yuda talentonan musical. Esaki sigur ta bira un anochi musical special.

Otro cantantenan cu ta canta e anochi aki ta Vale Croes, Placido Hazel y Rocco Flava. Musiconan ta Delbert Bernabela (Saxofonista), Franklin Granadillo (Trompet), Angelo Kock (Keyboard), Ivan Quandus (Baho), Lidrick Solognier (Drums y conga), Moises van de L’Isle (Percussion) y Carlos Bislip (Percussion y dirigente).

Tommy-Lee recientemente a bay den un rumbo nobo cu e banda musical ‘Buleria’. Hunto cu Rocco Flava (Roderick Franken) y Tyron de Freitas e ta forma e trio di cantante di ‘Buleria’. Musiconan ta entre otro Rodderick Booi (Drums/ Timbal), Joshue Kelly (Drums/Timbal), Anuar van der Linde (Conga), Rygel Emanuel (Piano), Raul Piar (Piano), Dwight Leoneta (Base y Director musical) Jovanny Romero (Trombone), Gilbert Hooyboer (Trompet), Edrick Maduro (Saxophone). E nomber di e banda nobo ‘Buleria’ segun Tommy-Lee, ta expresa bon energia, alegria, placer y bon movecion. “Un nomber hopi apto y nice pa e banda. Tur hende ta hinca bon energia den dje”, asina Tommy ta comenta. Burleria ta existi apenas un par di siman y tin 4 presentacion tras di lomba. E grupo di hende homber hoben, cada un cu su musical background, ta den proceso di conoce otro, practica cu otro y haya experencia trahando cu otro y ta desaroyando un estilo unico cu ta tipifica ‘Buleria’. Buleria ta trece diferente genero di musica di Salsa, Bachata te Pop.

Tommy-Lee a cuminsa canta den coro di misa y despues a haya e drive pa canta como leadsinger y asina el a drenta e prome competencia di canto ‘Sparkling tour’ un par di aña pasa. Aki el a haya un experencia unico pa canta dilanti un publico ‘live’ bastante grandi. Despues el a cuminsa canta cu Tsunami. El a canta 2 aña cu Tsunami y ta describi e periodo aki como uno caminda el a siña hopi. E ta sinti cu el a bay dilanti, tanto como cantante como individual. Aki el a conoce su mes mas miho y a crece den confiansa propio. Un experencia inolvidabel. Despues di 2 aña Tommy-Lee a desea di tuma un break pa un par di tempo pa experencia un poco mas libertad. Como cu cantamento ta un hobby pa Tommy e kier sinti su mes liber pa explora otro oportunidad.

Les di canto el a haya cerca e docente y conocido soprano, sra. Tica Giel na Scol di musica Rufo Wever y tambe cerca sra. Olarte. Esaki Tommy-Lee ta considera hopi importante, siña bon tecnica ta hopi importante sino por daña e bos. “Pa e motibo aki ta bon pa semper sigui cu les of un otro tipo di guia professional. Asina por mehora tecnica di canto” segun Tommy-Lee.

Un Benefit concert pa yuda mucha cu talento musical ta necesario? “Si, segun mi pa tur disciplina di arte, no solamente pa musica, mester un estimulo, un push pa tene bibo y encurasha practica. Ta parce cu antes tabatin mas interes pa practica arte, musica. Parce mi cu awendia tin mas distraccion y esaki por afecta e disciplina. Ta bon pa pone poco mas atencion na esaki.”

Tommy-Lee a habri un fanpage riba Facebook pa tene contacto cu su publico y fans. Y ta experencia e feedback cu e ta haya for di publico como ‘inspiring + humbling’. “Un artista kier move hende di paden y bo ta keda hopi contento ora cu publico ta comenta cu e manera cu mi a interpreta e cancion a toca nan. Un cancion por tin un mensahe hopi impactante manera por ehempel ora cu mi ta scucha Adele canta. Ora cu e ta canta mi ta sinti kico el a pasa aden y con el a sinti. Mi ta haya esey hopi impresionante ora cu un cantante ta transmiti esaki den su canto. E no ta facil. ‘Don’t you remember’ di Adele ta un cantica cu ta pone mi ‘biba’ su experencia di un relacion amoroso cu a yega su fin.” Cantantenan famoso cu ta un inspiracion pa Tommy-Lee ta John Legend, Usher, Micheal Jackson, Boyz II Men y D’Angelo.

Con largo bo tin cu tren pa domina un cancion? “Mas of menos dos pa tres dia. Actualmente mi ta practica un cancion di John Legend (un di mi idolonan) pa e Benefit concert anto pa esaki un pianista y un musico cu ta toca violin lo bay acompaña mi.”

E concierto ta cuminsa 8or di anochi na Cas di Cultura. Como antesala tin un ‘Meet the artist’ caminda por combersa cu tur e musiconan y cantantenan y disfruta di un brindis. Portanan ta habri for di 7or. Carchinan pa e Benefit concert ta solamente 35 florin. Fondonan cu ta genera cu benta di tickets pa entrada y ticket di rifa lo wordo entrega na Fundacion Donny Lacle. E fundacion aki sa otorga beca na studiantenan di musica y e fondonan genera e anochi aki lo wordo administra door di fundacion aki. Un y tur ta bon bini.

BUCUTI

Oranjestad-Diadomingo ultimo for di oranan tempran di mainta botonan a cuminsa jega den e bahia di Bucuti Yacht Club pa asina sigura nan spot pa e ultimo actividad pa vakantie 2014 cual a bira e segundo edicion di e Bucuti Bay Bash.

Aña pasa nan a organisa e actividad aki pa di prome biaha y directiva di Bucuti Yacht Club ta hanja cu esaki lo mester keda algo annual pa sera e temporada di vakantie grandi. Pa e edicion 2014 Cerbes Chill di Balashi Brouwerij a uni hunto cu Thunder and Lighting y Cool FM pa asina por a presente un edicion mas grandi cu aña pasa.

E actividad su highlight pa 2014 tabata e Fat Boys Blob di Brouwerij Balashi cual a wordo combina cu un stellage di mas o menos 12 meter halto na unda un persona mester a bula pa asina cai y saca esun riba e blob manda halto. Sigur grandi y chiquito a disfruta di e tremendo actividad aki pa asina sera e temporada vakantie grandi cu broche y sigur e muchanan a have hopi fun y otro siman nan lo ta cla pa asina cuminsa nan aña escolar bek jen di energia. Sigur un danki na e sponsernan cu a kere den e evento aki, e cuerpo di voluntarionan medico di AMA cu tabata riba un standbye henter dia pa cualkier eventualidad y sigur na e miembronan di directiva di Bucuti Yacht Club y nan famia pa e gran esfuerso y oranan di dedicacion pa cu e Bucuti Bay Bash.

Ya caba tin hopi speculacionan kiko tur lo por spera pa otro aña ora cu celebra e di 3er edicion, so keda pendiente riba e pagina di Facebook di Bucuti Yacht Club pa mas informacion.

BARCOMinister di Turismo, Transporte, Sector Primario y Cultura Otmar Oduber, ta sumamente satisfecho cu e resultadonan positivo pa loke ta trata turismo crucero den luna di juli.

Juli 2014 a conta cu un crecemento do 33,8% cu ta un total di 37.174 pasahero cu a bishita Aruba compara cu 27.776 den 2013.

Manera e mandatario a menciona desde inicio cu e la asumi su responsabilidad, ta cu Aruba lo no conoce “off-season” mas, pues e bunita resultadonan aki ta demostra esaki.

Mester remarca cu manera tabata planifica,  aña pasa 2013 Aruba a conoce resultadonan record caminda turismo a crece cu mas di 100 mil pasahero pa un solo aña. A conta na 2013 cu un crecemento di di 18.2%, cual un gran parti di crecemento aki ta ser carga pa e bon rendimento den e low season.

Pa  2014, a premira cu durante e prome lunanan di aña lo tabata mas slow pa loke ta trata e cantidad di hende cu lo bishita nos isla.

No obstante e diferente retonan, por a nota un crecemento significativo desde luna di mei bay ariba pa september y esaki tabata e caso den luna di juli. E tendencia positivo lo continua pa lunana di augustus y september.

Manera a premira 2013 pa ta un aña exitoso pa tursmo, lo mira esaki den transcurso di fin di aña 2014, unda nos lo yega e meta stipula di mas di 690 mil bishitante.

E barconan crucero a sa di trece efectonan positivo cu ne pa ns economia, unda cu e impacto economico averahe di $ 120 – $170 pa dia pa persona (estudio Universidad di Aruba),tin un crecemento substancial den entrada economico, cual especialmente pa luna di mei pa september ta di hopi importancia y sumamente positivo.

SUBSIDIO AWA

Den cuadro di expancion pa loke ta trata e proyecto di UV Filter na RWZI na Parkietenbos, Minister di Turismo, Transporte, Sector Primario y Cultura Otmar Oduber  ta hopi satisfecho cu e proyecto aki ta un exito ya caba den su fase di prueba.

Diahuebs atardi representantenan di Ministerio di Sector Primario a reuni hunto cu DOW como tambe representantenan di e compania Berson, cu ta e compania cu a fabrica e systema di UV cu ta wordo usa riba e proyecto di RWZI, pa asina haya un ronda cu splicacion riba con e proyecto aki ta andando.

Durante e ecuentro aki Sr. Frank Benita ‘bedrijfsvoerder’ di RWZI- DOW a splica cu e proyecto di UV filter ta den su ultimo fase, den cual e systema lo core den un fase di prueba pa un siman largo pa asina aki saca tur e foutnan chikito cu por exisisti afor. Na final di e siman di preuba aki lo saca diferente e muestra pa wordo analisa na Lands Laboratorium, pa mira kico e efectonan di e UV ta riba e diferente bacterianan den e awa.

Minister Otmar Oduber den cuadro di su esfuerzonan pa tin un plan continuo pa por prove di awa durante henter aña pa agricultor y criadornan di bestia, a dicidi di bin cu extra UV pa brinda mas proteccion pa tur tipo di plantacion.

E systema nobo di UV cu a wordo instala lo percura pa e awa keda circula den e tanki pa brindando un mihor garantia di calidad di awa. Santa Rosa lo percura pa colecta e awa aki tur dia y pa distribui esaki pa Sector Primario di nos isla.

Minister di Sector Primario ta indica cu den transcurso di e simannan entante lo trece e resultadonan di testnan dilanti, pa asina aki den un forma oficial inaugura e proyecto aki.

Cu esaki Minister Oduber lo kier a yega na un solucion definitivo pa loke ta trata awa pa tur agricultor y criador di bestia gratis. Concluyendo por bisa cu e sistema aki ta uno sostenibel y cu ta garantiza un produccion di awa di calidad cu ta permiti pa durante henter aña por conta cu produccion di fruta y berdura pa nos comunidad.

 

  

rsz_santarosa

Oranjestad – Diahuebs ultimo representantenan di Departamento di Agricultura, Cria y Pesca a reuni hunto cu DOW como tambe representantenan di e compania Berson cual ta e compania cu a fabrika e systema di UV cu ta wordo usa riba e projecto di RWZI pa asina dialoga y informa riba e projecto aki cu ta den su fase di prueba.

E projecto di UV di RWZI ta uno cu tin algun tempo den preparacion unda cu a pasa den e processo di installacion di e systema cual a tuma un tempo pa por a wordo finalisa y na e momentonan aki ta den e processo di caliberacion. 

Durante un entrevista cu Sr. Frank Benita bedrijfsvoerder di RWZI di DOW a wordo amplia riba e ultimo fase cu e projecto di UV di RWZI ta pasando aden unda cu a splica cu actualmente e systema lo core den un fase di prueba pa 1 siman largo unda cu lo saka afor tur e “kinderfoutjes”. Na final di e siman di preuba aki lo saka diferente ehemplarnan cu lo wordo analisa via di Landslaboratorium unda cu lo por analisa kiko e efecto di e UV ta riba e diferente bacterianan den e awa.

E systema nobo di UV cu ta wordo installa lo percura cu e awa ta keda circula den e tanki asina brindando un mihor garantia di calidad di awa, cual awa lo wordo collecta dor di Santa Rosa tur dia y distribui entre e Sector Primario di nos isla.

Cu e projecto aki Departamento di Agricultura, Cria y Pesca ta cumpli cu e vision di Minister di Turismo, Transporte y Labor, Minister Otmar Oduber pa sostene y engrandece e Sector Primario di nos isla brindando awa na tur Cunukero asina segurando produccion continuo di fruta y berdura local.

 “BAN SOSTENE NOS CULTURA , PRACTICA CRIA, PESCA Y AGRICULTURA”

 

  

 

  

CULTURA5

Oranjestad-cuadro di e plan di maneho di cultura unda cu mester expone cultura y folkore di Aruba mas den nos comunidad, Departamento di Cultura Aruba (DCA) a cuminsa reuni cu lidernan di e agrupacion di musica foklorico e siman aki. 

E meta di e reunionan aki ta pa haya mas informacion riba posibilidadnan pa yega na un acuerdo cu hotelnan pa presentacion pa asina pusha nos agrupacionnan folklorico. A papia tocante con activo cada agrupacion ta of motibo cu nan no ta activo. E experiencia di nan na nos hotelnan of otro luga di presentacion. Lo sigui reuni cu mas agrupacion folklorico cu no por tabata presente na e prome reunion.

Manera ta conoci cu despues di e diferente ronda consultativo cu varios stakeholders riba tereno cultural, Ministerio di Cultura y DCA lo usa e resultadonan aki pa por yega na un structura di maneho cultural nobo.

Un sugerencia cu a bin dilanti durante e rondanan ta pa  Ministerio di Cultura y DCA reuni y consulta cu gerentenan di hotel riba e participacion di agrupacionnan di musica folklorico den nos hotelnan. Den pasado nan tabata tin oportunidad di por a presenta tanto den lobby, restaurantnan y banda di pool di varios hotel aki na Aruba. Mirando cu Aruba tin un cantidad di hotel, caminda cu tin posibilidad grandi pa yuda e agrupacionnan aki cu oportunidad pa presenta.

E reunión aki a duna Ministerio di Cultura y DCA haya un bista mas amplio riba e situacion actual di nos agrupacionnan di musica folklorico. Na Aruba tin un cantidad di mas cu 17 agrupocionnan di musica folklórico, unda cu actualmente no ta tur di nan tin luga pa nan haci nan presentacion. Esaki lo mester por bira un oportunidad pa duna balor na nos artistanan local di nos musica folklore, pa asina aki  mantene nos folklore na un nivel halto cu lo keda presenta dilanti nos bishitantenan cu ta bini di diferente parti di mundo.

Na momento cu nos bishitantenan yega aereopuerto, Terminal di Crucero y nos hotelnan,  nan por haya, sinti y disfruta di nos cultura cu enberdad ta duna nan e experiencia unico cultural riba nos isla Aruba, e perla den Caribe.

Comunicado Bermudez Mike

Oranjestad-Na Aruba tin un cantica hopi conoci cu kier laga nos compronde cu un aña nobo ta habri e oportunidad pa conduci un bida nobo (aña nobo bida nobo). Ta parse cu esaki a bira e cantica faborito di sr. Mike Eman, pasobra e tactica di “braafste jongetje van de klas” a cuminsa ta backfire lagando atras un gobierno sin lider y un partido asina “grandi y prestigioso” sin ningun otro candidato cu lo por a trata di reemplaza e lider cu a cay den desgaracia.

Mike Eman a bin ta ripara cu e welga di hamber no a surti e efecto cu e a spera y esey tawata desvia e atencion atrobe di nos pueblo for di e desaster financiero cu su gobierno a bin ta ehecuta e ultimo 5 aña. Alcontrario su acto bochornoso aki a yuda na Aruba habri wowo di nos conciudadanonan pa e forma maligno cu e y su secuasnan di partido, yuda door di un prensa comprometi, a trata di manipula y desinforma nos pueblo atrobe. Danki Dios cu ta existi awendia un “social media”, pero tambe  periodistanan y radio-emisoranan balente cu no a ria pa duna informacionan veridico y al caso.

Henter e comedia cu a sigui despues cu un ex-minister di finansas atacando henter mundo y un partido cu tawata busca apoyo den forma di firma serca e pueblo cu den pasado tawata para tras di Mike Eman incondicionalmente, tampoco no a duna e resultado spera. Alcontrario un grupo rond di e periodista sra. Miriam Rosel-Koolman  a hasta logra den un tempo corto acumula mas di 10 mil firma na fabor di nos gobernador cu si a pone interes general na prome lugar y para un maneho financiero fatal cu a conduci na un “downgrading” door di Fitch.

Mike Eman a hañé obliga di cambia di tactica. Na prome lugar a disidi di corta cabes di e supuesto “bright young professional” e ex-minister di finansas Juan David Yrausquin, cu nunca a sconde su anhelo pa lidera e partido berde y bira un dia prome minister. Na di dos lugar a duna henter miembrecia di AVP incluso e 13 marionetanan den parlamento un “brevet van onvermogen” y a mandanan sera nan boca. Na di tres lugar a tuma e postura di “sconde” pa e responsabilidad y a disidi di tuma un par di dia di sosiego hustamente na un momento cu e Pais ta rekeri presencia y autoridad di e hefe di gobierno.

Pero no ta aki e tactica Machiavellico di Mike Eman a termina. Su “pièce de résistance”, e plato principal y alabes e “Angel Wardador” di su tactica nobo pa desvia e atencion a bin den forma di sr. Angel Bermudez.
Prensa comprometi di inmediato a sali promociona  sr. Bermudez como e supuesto “vakminister” cu lo a compromete su mes pa salba Aruba di e problema cu Hulanda, pasobra den opinion di e minister di finansas nobo e problema di Aruba actual no ta financiero sino constitucional. Atrobe ta tira culpa riba tur otro expertonan manera IMF, Standard & Poors y Fitch. Tambe e mandatario a laga sa cu e gobierno di Reino y gobernador a comete un “faux pas”, tradusi na hulandes un “blunder”. Esaki ami ta categorisa como un expresion politico y particularmente biniendo di un persona cu continuamente ta laga sa cu e no ta politico y cu supuestamente lo ta e persona cu mester yuda mehora e relacion cu Hulanda.

Mi ta contento di wak cu nos pueblo ta keda alerta pa desmenti y rechasa e tactica maligno di Mike Eman pa desvia atencion.  Ta Mike Eman a wordo eligi pa dirigi e pais aki y no e “Angel Wardador” Bermudez. Pueblo mester sigui exigi un maneho transparente y honesto cu mester tin como unico meta salbaguerdia nos autonomia pero principalmente segura e futuro di e proximo generacion. No ban lubida cu ainda ta  spera nos medidanan, cu consecuencianan directo pa e cartera di e clase trahado, ocaciona door di 5 aña di un maneho desatroso door di un gobierno y prome-minister cu semper a pone interes personal na prome lugar.

ARUBUS

Oranjestad-Minister di Turismo, Transporte, Sector Primario y Cultura, Otmar Oduber a reuni cu Arubus pa asina aki stipula e introduccion di ‘parkeermeters’ den centro di Oranjestad. Gobierno di Aruba a tuma e decision cu Arubus lo ta encarga cu e areanan di parkeo aki.

Durante e reunion aki cu Arubus, a conta cu e presencia tambe di DOW, Wetgeving y Polis, y asina a cuminsa finalisacion pa cu e planificacion pa loke ta un di e seccionnan nobo di Arubus, cu lo bira e parti di  ‘parkeermeters’, y cu lo carga e nomber di Aruparking. A pone como fecha cu pa promer di december 2014 e implementacion di e “parkeermeters” lo mester cuminsa den centro di ciudad  y por logra pa januari 2015 implementa esaki den area di Palm Beach pa esaki por ta den funcion.

Minister Oduber a indica cu pa haci esaki posibel ta rekeri di hopi cambionan cu mester tuma lugar y mester defini cua ta e areanan cu lo bay pone ‘parkeermeters’ y mester combina esakinan cu ‘parkeer garages’. Tin hopi elementonan importante cu mester tuma cuenta cu ne prome cu inaugura un proyecto di e maginitud aki. Lo mester percura pa e trahadonan cu ta traha serca, mester tuma e areanan cu tin vivienda na cuenta y tambe mester bin cu areglo special pa esnan cu ta traha den vecindario y pa esnan cu ta usuario continuo, unda lo mester pensa den e direccion di tarifanan special pa e grupo aki.

E mandatario a splica cu di otro banda mester percura pa e infrastructura di e areanan unda ta bay introduci ‘parkeermeters’ ta bon. Si mira centro di ciudad e infrastructura ta basta bon y lo por ubica esaki, pero rond di e area hotelero por mira claramente cu tin 50% di trabou di infrastructura cu lo mester tuma lugar  y lo cuminsa trabounan pa mehora e area aki den comienso di otro aña. Pa asina aki por tin den e promer cuartal di 2014, un 100% di ‘parkeermeters’ den operacion.

E preparacion di tur esnan cu lo bay traha cu Aruparking ta hopi importante y lo mester ta na su lugar na momento cu e trabounan cuminsa, mientras ta warda riba e yegada di e 2 edicionnan nobo pa Arutram. Asina aki Minister di Transporte a señala  cu e introduccion di ‘parkeergarages’ y mescos e parkeo y e accesibilidad di ‘parkeermeters’ lo haci e fluho den centro di ciudad hopi mas facil.

Brazil Teakwondo
Oranjestad-Diabierna anochi a tuma luga na Centro di Bario Brazil un reunion organisa pa Brazil Taekwondo Stichting na unda cu a toca e tema di 20 punto di agenda di cual a atende 16 di nan. Un reunion cu a bay te cu 11’or y 20 di anochi na unda cu mester a atende cada punto di agenda cuminsando cu e prome punto na unda cu Alberto Klabér a entrega e relato di Hakeem Lowe su training na Hulanda y Alemania. Alberto Klabér a entrega esaki na e secretaria di Brazil Taekwondo Stichting, señora Danica Delamore. Clifford Rasmijn a duna un splicasion di kiko tur e ta train hunto cu e team di “Train Hard Fight Smart” mirando e trainingnan cu ta wordo duna na e team, Alberto Klabér a bisa cu: “Mi ta tene mi curason pa nan contricantenan”.      
Clifford Rasmijn a splica kiko tur por spera di e team di Train Hard Fight Smart, aki e tabata papiando di e preparacion pa e siguiente campeonato cu e focus ariba Best of the Best na unda cu e team aki ta para central. Tambe Clifford Rasmijn a splica tocante di e team di TK5 pa Corsou y cu e mester a haci un cambio den e team debi na e ausencia di un atleta y e no por warda te na ultimo momento pa esaki. Clifford Rasmijn kier tin su team cla pa esaki. Alberto Klabér a presenta tur e mailnan cu a drenta y esakinan a wordo trata. Clifford Rasmijn y Thais Rodriquez lo bay inscribi e atletanan pa e siguiente campeonato cu ta bay tin na Aruba na final di Augustus na unda cu lo bay participa cu e B y C team.
 
Thais Rodriquez a informa tocante cu lo saca potret diasabra y cu e potretnan cu no a sali bon, mester ripiti esakinan y cu lo no saca mas potret, ya cu tin basta caba saca y ta 15 so lo bay scoge pa e calender. Brazil Taekwondo Stichting lo laga print 2500 calender door cu Alberto Klabér a presenta un plan pa aña 2015 na unda cu e placa cu genera di e calender lo bay cubri e gasto di e plan di aña 2015 pa e team. Alberto Klabér mester tin tur potret cla pa dia 15 di Augustus na unda cu tur miembro ta bay vota pa e 15 potretnan pa e calender di aña 2015. Jeritza Arends kende ta e tesorero di Brazil Taekwondo Stichting ta bay presenta e cuenta di Brazil Taekwondo Stichting dia 15 di Augustus. Dia 18 di Augustus Brazil Taekwondo Stichting ta cumpli 20 aña di existencia na unda cu dia 16 di Augustus lo bay celebra esaki na Baby Beach den forma di dia di famia.