Johnnyhabibe-Anchorman

#1 Un di e argumentonan ta cu WEB mester paga pa e inversionnan den energia berde. Pesey mester aumenta e tarifa pa esnan cu ta usa menos di 500 Kwh pa luna cu 15%, y mester baha pa esnan cu ta usa mas di 1000 Kwh cu 4%. Unda e logica ta? Dicon mester rebaha pa esnan cu ta usa hopi, y aumenta esnan cu no ta usa hopi? Pobernan ta bira mas pober, y riconan ta bira mas rico. Esaki ta inhusto, especialmente pasobra ta pa paga pa e aventura GREEN di Mike Eman.

# 2 WEB y Elmar tin hopi tempo ta propaganda pa hende gasta menos coriente, pa cumpra airco inverter, pa cambia bombiyonan pa LED, tur ta costa masha hopi mes, pero hopi hende a sigi e conseho aki pa asina baha nan recibo di coriente. Awor WEB ta bisa cu PASOBRA hendenan a hasi tur esey, e companianan no ta haya mes hopi placa mas, y pesey mester hisa e tarifa! Unda e logica ta? Nos a cumpra inverter y LED pa baha nos gastonan, no pa WEB bin hisa e tarifa!

# 3 WEB a usa otro argumento ilogico cu Valero a aumenta e handling fee di 2 dollar pa 6 dollar, pues cu 4 dollar cu ta 7 florin. Pero mientras tanto tin hopi tempo caba ta cobra e vast recht di 10 florin, cu awor ta bai bira 12.50 cu ta hopi mas cu e 7 florin di e handling fee. Kiermeen e argumento aki tampoco no ta conta.

# 4 Un otro argumento di WEB ta cu biento na Aruba ta mucho fuerte, y pesey mester hisa prijs di coriente. Acaso ta awor biento a bira mas fuerte? Sigur cu no. Biento na Aruba ta mescos cu antes! Kiermeen Urirama ta bai hisa prijs hopi mas anto.

Ningun di e argumentonan aki di WEB ta conbense nos. Nan ta argumentonan fofo, den un intento pa sconde informacion. Fraccion di MEP ta contra e aumento di tarifa, y a exigi pa mira e gastonan di WEB, Elmar y Utitlties den e relatonan financiero di cada compania. Gobierno no kier duna e informacionnan aki. Tanten nos no mira esakinan, miembronan di fraccion di MEP ta haya cu gobierno no por hisa e prijs di coriente.