Johnnyhabibe-Anchorman

Oranjestad-Diadomingo atardi Minister di Cultura, Otmar Oduber tabata presente na Centro di Bario Brasil, unda cu a celebra Nos Cultura en grande. E dia aki tabatin diferente actividad cultural y Mercado di Santa Rosa tabata pariba unda cu nos comunidad un biaha mas a disfruta di e variedad grandi di productonan local.

Pa 3:30 atardi e Gran Parada Cultural a cuminsa cu un cantidad grandi di participante y sigur a resalta Minister Oduber, kende a participa activamente den dje hunto cu dos di su yiunan. El a bisa cu e Parada Cultural aki ta uno hopi bunita y e ta sinti su mes hopi orguyoso y contento di por ta parti di dje.

Riba e pregunta di e pakico el a dicidi di participa activamente den dje, el a contesta cu esaki ta algo cu e ta sinti, cu e tin un amor grandi pa nos cultura y pa tal motibo tambe el a pidi pa por a haya e cartera aki bou di su ministerio. E ta di opinion cu hopi cos grandi por wordo haci pa engrandece nos cultura y ta aplaudi e iniciativa di Centro di Bario Brasil pa organiza un parada una ta rindi homenahe na nos cultura y e biaha aki recordando specialmente nos mama di cultura Bernadina Growell.

Por a compronde cu esaki ta e promer biaha cu un Minister di Cultura ta participa activamente den e parada y Minister Oduber a indica cu esaki ta algo cu el a sinti pa haci, e ta un manera pa promove y duna realce na nos cultura.

El a bisa tambe cu tanto Ministerio di Cultura como Departamento di Cultura lo contribui na engrandece e Parada Cultural di Centro di Bario Brasil. Ya caba e ta bay aparece den e calendario cultural di nos isla. E ta un parada cu no solamente nos hendenan por disfruta di dje, pero tambe nos bishitantenan, asina nan ta haya un bista y sabor di kico nos cultura ta y kico e ta representa.

Finalizando Minister Otmar Oduber a expresa cu e ta recomenda tur hende pa tur aña presencia y participa den e Parada Cultural, pasobra e ta un experiencia unico unda cu nos Cultura ta sobresali. El a felicita Centro di Bario Brasil y tur organizador pa un parada hopi bunita honrando nos cultura.